Fia le fesoasoani e se aiga mo le latou pili o e suavai

Tusia Deidre Fanene ,

50 Hits

Tina ia Malia Laufika.

Tina ia Malia Laufika.

O le tinā ia Malia Laufika, 33 le matua o le soifua o se tagata o lo’o nofo ma le tele o fa’afitauli i lona mafaufau.

Mai le tele o mafatiaga ma fa’afitauli o lo’o tauaveina e leni tinā, o le fa’afitauli pitoisili ona mamafa i lona mafaufau o le leai lea o se suavai mo ia ma lona aiga.

O lenei tinā e to’alua nai ona alo ma e mai le afioaga o Afega.

S aia ta’ua o lo’o nonofo aitalafu i le Pulega o le Suavai, ma se’iloga lava e totogi le latou pili ona fa’atoa mafai lea ona fa’aola mai le latou suavai.

O se olaga faigata tele le leai o se seleni mautu e tua iai lenei aiga e totogi ai le tele o pili o lo’o mamafa i le mafaufau.

Aemaise lava pe a fa’apea o se aiga e fa’alagolago lo latou tamaoaiga i le fa’atoaga lea ua fa’akeagaina uma fo’i e le afā o Gita mo le ola saoloto e talitonu le tinā o lo’o mamao lava le fa’amoemoega o latou.

“E toa’tolu aiga, o lona uiga e tolu fale eseese, ae tasi lava le vai e ola uma ai matou ma matou fa’aaogaina, ae ona o lea ua tipi le vai o lea fo’i la ua safa uma ai matou,” o lana saunoaga lea i le Fofoga o Samoa.

“E $500 le tinoitupe e tatau ona totogi fa’atoa mafai lea ona toe fa’aola mai le suavai, o isi aiga e lua e to’alua tagata faigaluega ae fai lava si to’atele o tagata e nonofo ai, ae o a’u e leai se tasi e faigaluega.”

Sa fa’ailoa mai e Laufika, a’o le’i fa’aleagaina le latou fa’atoaga o le latou alagatupe e maua mai i le vaiaso e $200, ae ona o lea ua fa’aleagaina uma lava e Gita le itu e maua ai le tamaoaiga a lenei aiga, o lea ala lea ua safa ai lenei tinā.

“I le taimi lea, o le seleni e matou te maua, e fa’atau ai vaila’au ma meatotino e mana’omia e I le ola lelei o le toga fuala’auiana ma le fa’atoaga.

“O meatotino uma lava ma vaila’au e fa’aaogaina i le fa’atoaga ua fa’aleagaina uma.

 “E mana’omia tele fo’i meafaigaluega fa’apea ai ma vaila’au e toe amata ai le fa’atoaga ona o le alagatupe lea o lea e fa’alagolago ai lenei aiga.

“Tele ma anoanoa’i isi mea o lo’o mana’omia ae peita’i e leai se tupe e fa’atau mai ai nei mea uma.”

E fa’alagolago lenei tinā i lona fa’atoaga e tausi ai lana fanau e to’alua ma matua o lona to’alua aemaise e fa’atupe ai meafaia  le eekalesia fa’apea le nuu.

O le tulaga fo’i lea sa iai i le taimi o le afā o Eveni i le tausaga e 2012.

“Ina ua sau Eveni sa fa’aleagaina uma le matou fale. E o’o i le taualuga ma alu lava Eveni ma ave.

 “Pau le itu na laki ai ona sa iai le isi matou fale sa tu latalata i le sami, o lea sa aumai ai meafale uma lava o le matou fale lena e toe fai ai le isi fale.”

Sa ia ta’ua ua ono nei tausaga talu ona fa’atali i ni folafolaga mai nisi o pulega e fa’atatau i tane vai i le tausaga e 2012.

O le talitonuga a lenei tinā pau lea o le itu e fa’amama avega ai mo i latou o le tane vai.“Sa omai le vaega ale Koluse Mumu i le tausaga e 2012 asiasi mai i le matou fale ina ua fa’aleagaina uma e Eveni.

“O iina sa matou talosagaina ai se matou tane vai, sa latou tusitusia uma lava i lalo matou fa’amatalaga ma le mafuaaga e manaomai ai se tane vai ina ua mae’a le latou asiasiga.

“Mai lava i le tausaga e 2012 seia o’o mai i le taimi nei e leai ma se fesoasoani ua o’o mai ma o lenei lava e fa’atali.

“Sa omai tufa tane vai i nai isi aiga e le mamao atu, ae misi matou.

“E leiloa pe aisea, ae o matou lea sa talosagaina ni tane vai ao lenei e oo mai lava i le tausaga nei 2018 lea lava matou te fa’atalitali i le folafolaga sa aumai.

Afai e te fia fesoasoani i le aiga o lenei tinā fa’afeso’ota’i le numera o lana telefoni 7246750.

© Samoa Observer 2016

Developed by Samoa Observer in Apia