O le usita’i le meaalofa taua
“O a’u ou te le mana’o se meaalofa o le Kirisimasi ae pau lava le meaalofa o lo’o o’u mana’o ai le taimi lenei o le usita’i i o’u matua ma ia alofa fo’i matua i a te a’u.” Joe Tine, o le afio’aga o Malie.
O Joe o se tasi o fanau na fa’atalatalanoa e le Fofoga o Samoa i le aso ananafi ma na ia fa’ailoa o ia e le mana’o i se mea’alofa.
“O lo’u ia lea talitonuga o lo’o i ai i le taimi lenei ia mafai ai lea ona ou nofo ma fa’aaoga lelei le taimi lenei e fai lelei ai se fe’au a lo matou aiga.
“O a’u ia pe meaalofa pe leai fo’i o le itu sili o le maua o le mafutaga ma nai o’u matua aemaise o lo matou aiga ma nai o’u tei.
Na ia fa’ailoa o lona iloa ai o fa’amanuiaga e aumai mai matua, na una’ia ai lava o ia ina ia toaga e usitai i so’o se taimi lava.
“I a te a’u o lea le fa’anaunautaiga, ia manuia lo’u olaga.
“O le mafua’aga fo’i o lo’u alu ai lava e fai a matou fe’au talu ona malolo mai le aoga.
“O le lelei ai fo’i i le pipi’i ai pea i matua, ina ia mafai ai lea ona fa’atino o so’o se taumafaiga o lo’o ua i ai le taimi lenei.
“Ou te mana’o i o’u matua ia alolofa pea mo oe, ma ia mafai ona fa’atino o so’o se mana’oga la’ua te manana’o ai mo a’u i aso uma.
“O le a ou taumafai e fai la’u aoga i le mea e gata ai.
“Ia ae mo le Kirisimasi ma le Tausaga Fou ia ou te nofo lelei ai le fale ma fai se isi feau aoga ia ma tafao atu i nisi o a’u i le isi pito o lo matou nu’u.