“Nonofo i Ierusalema, seia maua e outou le mana mai luga.”

By Rev. Petaia Setu 25 November 2018, 12:00AM

(Luka. 24:49)

A o Ierusalema sa pa ai le pomu i le vaiaso na se i mavae atu nei. Na maliliu ai le to’a valu ae manunu’a ai le toatele! A o le uiga foi o le igoa Ierusalema, ‘o le nofoaga o le filemu’ O lē fea ituaiga filemu ae mea ane, o le aai lea sa fafau ai tiga o le Keriso ma faasatauroina ai se’ia o’o ina maliu? Ui i lea, o le toe tu manumalo o Iesu ma le itu aso o lona afio a’e i le lagi sa ia fetalai atu ai i lona au soo, “Ua faapea ona tusia, e faapea foi ona tatau ina tiga o le Keriso ma toe tu nai e ua oti i le aso tolu; ina ia talaiina foi le salamo ma le faamagaloina o agasala i nuu uma i lona igoa e amata mai i Ierusalema. Faauta foi, ou te auina mai ia te outou lē na folafolaina e lo’u Tamā; a ia outou nonofo i le aai o Ierusalema, seia maua e outou le mana mai luga.”

Aiseā Ierusalema? Ae faapefea Peteleema o le aai na fanau ai le Tupu o tupu? Faapefea Peteli o le eleele sa fesilafa’i ai le Atua ma Iakopo? Ae a Nasareta sa faafaileleina ai le Faaola? E malu le mau i Ierusalema? Ou te manatu o le a le afaina lea itu; a o le faatonuga, o Ierusalema. O le valoaga mai anamuā, e to’ala fanau Ierusalema i le talalelei (Isaia. 2:3). O le aai ua tusia. O lona uiga, e tatau ona amata mai Ierusalema le galuega molimau o le talalelei o le faaolataga. Fai mai Iesu, “… a ia outou nonofo i le aai o Ierusalema.” E le siligia le tele ma le ogaoga o faafitauli o loo fatu mai totonu o le aai nei. A o le aai ua iloga, o le aai a le Atua (Salamo. 46:4). O Siona (Sala.48:12); o le aai paia (Isaia. 48:2 + 52:1); o le aai a le Tupu silisili (Sala. 48:2). E foliga mai la e faigofie, ae leai; o le matuā avega mamafa lava. A o le faatonuga, e amata ai iinā (Ierusalema). Ioe, e le tatau ona e laa i ou tafā fale, ae le i teuteua lelei lou lotoifale. E le o le soona masau i au tagata faigaluega, a o lau fanau ma lou aiga e faave’ave’a ma faasevaseva. E amata atu ia te a’u ma oe. Tapena oe ma lou aiga. O le uluai faaleaoga lava o lou aiga. O le faamoemoe autu lea o Iesu i ona uso a soo. Ia potopoto ma mafuta faatasi i le nofoaga e tasi. E maua mafanafana i mafutaga. Ae maua le ola fou i le mafanafana. O le tāua lea o le mafuta faatasi ma finafinau i le tatalo. Samoa, o le filemu o Ierusalema e le o se filemu nofonofo. A o le magafagafa; mataala. O le filemu finafinau (Galu. 1:14). E saili malo. E tali malo. E molimau i malo (Galu. 2:14). Auā o la Iesu, ‘e mai ia Iutaia le faaolataga’ (Ioane. 4:22)

Ua uma le a’oga sa vaai ai ma faalogo le au soo i le tolu tausaga ia Iesu. O loo faatali nei i le faauuga auā o le taunuuga lea. E le mafai e le au soo ona fai le galuega e aunoa ma lo latou faauuina. O le potopoto la i Ierusalema, o le nofo faatalitali. O le nofo faalologo i le taimi a le Atua. Faatalitali ma le mautinoa. Ua saunia mo le ola tuu loa.

Samoa, o le taimi faatalitali i le Atua (Meditation), o lou taimi sili lea ona tāua. A o le vaitau foi lenei o loo tulimatai ai e tatou uma le faaiuga o le taumafai o fanau a’oga i lenei tausaga. O togi ma tulaga. O tusi pasi ma faailoga tikerī. O mea lelei, ma le aogā ia i tatou uma i le ola nei. E tatau iai le faamālō ma le faafetai. Ae ou te faamanatu atu pea Samoa le faatonuga a lo tatou Alii, Meditate, seia maua e outou le power, le mana, le atoatoa, ona viia lea o le Atua, ma ta’uleleia lau tautua. O lona uiga, ‘aua le maua loa le tusi pasi poo le faailoga oso loa. Uma le tolu tausaga o le au soo ae fai mai Iesu ina o le a alu a’e i le lagi, ’Ō e faatalitali faatasi; finafinau faatasi i le tatalo. Sefulu aso o faasifo i le loto e tasi. Punonou ma le loto gaua’i. O le aso na faauu ai le vasega lea, ua fai nei ma aso fanau o le Ekalesia Kerisiano i le lalolagi atoa. Ioe, Viia le Alii!

Sena e, a ’e le maua le A.P (Agaga Paia), e le nanea lou tikerī. A misi oe ma le faauuga mai le lagi, ona le ’ese lea o ou faailoga ma aputi o saito ua lelea i le matagi.

Mātua, fai ia lou loto ma nofoaga o le filemu. E to’a iai le āu. E gase iai le taetafe. Fai oe ma Ierusalema fou i lau fanau ma lou aiga. Fai oe ma paolo e talitalia ai meaalofa a le Atua. O lana faasoa i e ua faatalitali ma le loto faatuatua. Ia i latou sa punoua’i ma le mautinoa; Finafinau ma le loto atoa.

Samoa e, e leai so tatou malosi. Tatou te le faatalitali i ni pulega faale lalolagi ma ni malosi mai nisi atunuu i fafo. Tatou te faatalitali i le silisili ese o le Atua. O Le ua faavae ai lo tatou atunuu. Ua na o ia e mafaia mea uma; e pule aoao i mea uma; e manuia ai tatou uma; e ola saoloto ai tagata uma. Po’o ai o mafatia, ma saisaitia i faafitauli ma tiga o le ola nei, ia to’afilemu lou loto. Mafaufau ma tatalo. Finau i le tatalo ma le anapogi. Faatalitali ma le loto faatuatua i le Alii. Fai mai le perofeta o Isaia, “E te le iloa ea, o le Atua o le vavau, o Ieova o lē na faia tuluiga o le lalolagi, e le vaivai o ia? O ē faatalitali ia Ieova e toe faafouina lo latou malosi; e le vaivai, e le tigaina” (Is. 40:28-31).

Le ekalesia e, o ou faiva molimau, e faalologo i lē ana le feau. ‘Aua le faia i so tatou poto. ‘Aua le tuleia faamalosi i o tatou tulaga faa ta’ita’i. O le pogai lea o le faatonuga e nonofo i Ierusalema. Se i tālia le pule mai lugā. Auā o la Iesu, tou te le mafai ona fai o se mea e tasi pe a a’u le iai. E le fausia le galuega faaola i so’u iloa po o sou mătua; a o le faatuatua ma le mata’u i le Atua. A lē maua le mana mai lugā, e pei lava e lauga i le papa alā. Le au uso e, o le malosi faale agaga o le ekalesia, o le pulea ma taitai e le Agaga Paia. A faatuatuai le Agaga Paia, ’aua le faananatia! O le taimi a le Atua, e faaifo ina ua e lava saunia. Tatalo. Tatalo ma le loto ua moni. Ia faamaoni i lau anapogi. Vivii i le Alii ma le ’olioli. O ai ua le i faalogo ma faitau i le mana o le Agaga Paia sa faaalia i le Aso Penetekoso? Oka! E matautia le Atua! E silisili lava ia! E te iloa Samoa, sa lauga Peteru i lana ia lava gagana. Ae faaliliu e le mana o le Agaga i gagana eseese, a tagata eseese mai ’i ma ’o o le lalolagi sa tumutumu atu i Ierusalema i le vaitau lea. O le mau a Luka, ua faaopoopoina le aofai o tagata ua faaolaina, pe tolu afe. Aleluia!

Uso e, faatalitali i le Alii lou Atua (Sala. 118:8). O le taimi lava e te faaavanoa ai lou loto mo le Agaga Paia, e te saoloto ai, ma e galue malo ai mo le Alii. E te maua loa le mana o le Agaga e taitaia lou olaga, ona sa’o loa lea o au faaiuga; ua e alofa tutusa i tagata uma; ua tuu loa lou ola e auauna ai i le Alii e tusa ma lou faauuga; ma ua faatauvaa ia te oe luitau ma faafitauli uma.

Faatalitali ma le loto filemu, seia maua e outou le mana mai luga.

 

Amene.

 

7737063/7783782

E-mail: [email protected]

By Rev. Petaia Setu 25 November 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>