Fa’aleaogaina e le Fa’amasinoga moliaga o le gaoi

Tusia Pai Mulitalo Ale ma Fa’aliliu e Maiava ,

217 Hits

O le vaiaso talu ai, na fa’aleaogina ai e le Fa’amasino o Vaepule Vaemoa Va’ai i le Fa’amasinoga Fa’aItumalo, moliaga o le gaoi fa’asaga i le tama’ita’i o Eterei Fa’atupunu’u, e 20 tausaga.

O lea fa’ai’uga sa fua i molimau na tu’uina atu i le fa’amasinoga i le vaiaso  talu ai, e le na tagi, o Moasegi Tito Leasiolagi – e 70 tausaga o le soifua.

Na tu’ua’ia Eterei i lona gaoia o se pepa-tala-tupe a le tama-matua lea atoa ma lona talaina i tua o se tupe e silia i le tolu afe tala ($3,000.00) mai lana teuga-tupe.

O le o lo’o talosaga nei, o se ali’i ua ritaea mai le Iunaite Setete o Amerika ma sa avea o se ave-ta’avale i ta’avale la’u-pasese laiti, a’o le’i fa’aauauina e lona faletua ina ua tupu o lea fa’aletonu. 

Na fa’amatala e Moasegi, o ia sa alu e tali se telefoni na alu atu i le latou fale-ta’avale, o se pasese e ‘aumai se nofoaga e iai se BBQ i Moaa’a, ae taunu’u atu, ae oso ane ai le tama’ita’i o lo’o molia nei.

Ona alu lea e fa’ati’eti’e le tama’ita’i lea aga’i i Aleipata, fa’asolo ane ai i Falealili ma toe fo’i mai ai, e ui mai i Tiavi.

Na ta’ua, sa ia tu’ua le tama’ita’i i le aso lava lea, ma lona le-iloa ua leiloa lana pepa-tala-tupe (ATM card).

I lana molimau, na ta’ua ai, sa afifi lana pepa-tala-tupe i le pepa o lo’o tusia ai le numera fa’alilolili (pin-number) ae na fa’atoa ua ‘ave e se tasi ina ua aga’i e siaki lana tupe o totoe.

Sa fesiligia e le ua molia ia Moasegi, pe sa ia avatua ia te ia lana ATM card ma ta’u atu le pin number?

Peita’i na te’ena e Moasegi, ma tali, leai n ate le’i avatua ia te ia se card.

Na ta’utino fo’i e Eterei ia Moasegi, sa le-mana’o e ‘ave se card ae sa mana’o lava na te avea, ona e mana’o la te toe feiloa’i i se faletalimalo i le amataga o le vaiaso e soso’o ai.

Na matua te’ena e Moasegi lea fa’aaliga. 

I le molimau a le na molia, sa ia ta’utino ai, e moni na o ma Moasegi e ti’eti’e aga’i i Aleipata ma Falealili ona ua uma ona fai o le la tonu, lua aso i luma atu. Na ta’ua fo’i, na piki o ia e Moasegi mai se nofoaga i Moata’a pe tusa o le 12 i le aoauli ma alu loa le ti’eti’ega. Na tu le ta’avale i le aiga o Moasegi i Falealili.

Na fa’amatala e Eterei, o ia sa i le nofoa i tua o le ta’avale i le taimi atoa na malaga ai ae na fa’atoa se’e ane i le nofoaga i luma ina ua ia aveina le ta’avale mai Tiavi i Apia. 

“Sa tago tu’u mai ia a’u le ATM card ma fai mai, e fai le mea ‘ou te mana’o ai ae ma te toe fetaui i le faletalimalo o le Harbour View i le Aso Gafua,” o lana fa’aaliga lea i le Fa’amasinoga.

Sa ia te’ena tu’ua’iga a le vaega o moliaga fa’apea, ua ia fa’aaoga-sese le matua o le ua tagi e fa’atino sa’oloto ai ona mana’oga fa’aleTagata. Sa tu’ua’ia e Lucy Sio o le vaega o moliaga fa’apea, o lo’o silafia lelei lava e Eterei, e iai le ATM card a le toa’ina fia-fai-teine, fa’apea le pin number o lo’o i le pepa sa afifi ai.  E le gata i lea, ae silafia lelei fo’i, e le-lelei le fa’alogo a le toea’ina ma ua amata ona tau-galogalo mea i lona mafaufau.

Peita’i na ta’ua e Eterei, e leai se tulaga fa’apea sa i lona mafaufau, aua na te iloa lelei, e leaga le fa’alogo a le toea’ina ma e leai fo’i sona manatu e fa’amoemoe ai i se tupe po’o se isi lava mea mai ia te ia. “Na nofo lava ‘aumai ia a’u le card ma ta’u mai le pin number talu ai, na mana’o e fai se ma faiga-uo, ma o le mafuaga lena,” o lana tali lea i le fa’amasinoga.

E le’i fa’amalieina le fa’amasinoga ona o molimau sa tu’uina atu e Moasegi fa’apea, na te le’i avea le ATM card ia Eterei.

Peita’i na talia lava e le fa’amasinoga le molimau a le na molia. 

Ua fa’aleaogaina nei lea mata’upu, i le pule a le fa’amasinoga.  Peita’i o le a toe tula’i lava Eterei i le fa’amasinoga i le Aso 24 o Aukuso, e tusa o le tupe sa ia ‘ave’esea mai teugatupe a le na tagi. 

© Samoa Observer 2016

Developed by Samoa Observer in Apia