LAUGA - “O mamoe a Iesu Keriso”

By Rev. Petaia Setu 25 June 2017, 12:00AM

(Ioane.21:15-17)


Ua tatou faalogo pea i le tele o mea matautia na tutupu i totonu o lotoifale faaleaiga, i le va o matua ma fanau i o tatou nei augatupulaga.

O le sauaina o a tatou fanau teine i totonu o o tatou aiga, o le fasiotia foi o nisi o fanau i totonu lava o aiga. Ua aliali mai ai, ua le malu i fale fanau; ua leai se ola manumanu ma se faapelepele i le tofi mai le Atua. Ua augapiu ma se alofa faamaoni o iai.

Ae iloa mulimuli ane, e ese le tamā; e le o sana tama. Lea foi tatou te maitauina i aso uma lava i le soona faaaogaina o mea totino a le malō, ekalesia, kamupanī, faalapotopotoga ma pisinisi a tagata taitoatasi. E le o popole iai le tagata faigaluega.

E le taitai manumanu ma faapelepele iai auā e le o sana mea. E le o ano tele foi la Peteru i le mea lea e gaua’i mai ai Iesu aua ua le o sana lafu. O mamoe a Iesu Keriso. Fai mai Iesu, Ia e fafaga i A’u tamai mamoe.

I e leoleo i A’u mamoe

Ia e fafaga i A’u mamoe.

 

O le faiva faaleoleo mamoe, e le o se galuega faigofie. Ua tatou faitau i le Tusi Paia ma suesue i talaaga o tagata Palesitina i ona po o le Feagaiga tuai, ma nafa tausi faaleoleo mamoe, e le faigofie. E āsa i le tau malūlū, e faataupepē i le toāfa. E a’e mauga ifo i vanu. E lāina i le ao sautia i le po. E sopo i le gaoā e fetaia’i ma fitā. E moe, e le mă moe; e le manogi foi se mea’ai.

Auā e fai foi o fili tagata, a o manu feai foi ma manu tata’a. O le tootoo e fai ma taiala; o le tootoo foi e fai ma puluvaga. E faitau i le taeao, e faitau foi i le afiafi. E saili i le vao mu’a ma le vao lafulemu, ina ia ma’o’ona lelei le lafu ma saogalemu. E fusifusi i manu’a o le ma’i, ae sapai ma faafuata le manu ua vaivai. 

E sa’o lava! E le faigofie le galuega nei. Se i vaai ifo ia te oe. O atoatoa ona tausi le aiga i tiute uma ua ta’ua? Vaai i le nuu, i le aulotu, i le itumalo? O ’e malamalama i ou nafa tausi, po o fai pea lava oe ma matua tausi? E fua mai fea se ola faaleagaga o le ekalesia, pe afai na o le pepelo ma faaufiufi pea le mea moni e le faaalia? E le taua le umi i le tofi, ae tauleleia le ola ai o le atunuu i le faamaoni. 

E faapefea ona faatino? Ao ai na te amataina? Ia faalogo, - Simona e…pe e te alofa mai ea ia te a’u?” E leai lava se isi malosi i tala atu o le alofa (I Kori.13:1-7). A le o le alofa, se a le uiga o lou ola? E faatolu ona fesiligia Peteru i le fesili lava e tasi. O le ’auga atoa o nei fesili – Pe moni ea lou alofa i le Atua? Ua aga atu Iesu i lona afio a’e i le lagi.

O loo saili se loto e malu iai mamoe. O lima o ai na te faafaileleina tama’i mamoe? E telē se loto o le soo nei e tausi ai le lafu? E gafatia e le malosi o Simona ona fafaga le lalolagi o agaga?

Faamata e ola mamoe i le alofa o i lou loto? Poo e iloa, o mamoe ua tuuina atu e te tausi, fafaga, ma leoleo, o mamoe a Iesu Keriso? ’O ’e iloa le alofa manumanu ma le alofa faapelepele o le Atua i lana fanau? Uso, uso e, ou te ta ta logo atu pea, e leai ni mamoe a oe ma a’u. O ta’ua o faigaluega, o auauna a Keriso i ana mamoe.

’Aua le faataligatuli i le fetalaiga a Iesu – “Ou te le i sau ina ia auauna mai tagata ia te a’u, a ia ou auauna atu i tagata.” Manino lelei. O oe ma a’u – auauna; o Iesu – o le ’auga. O le a faapefea la ona ola mamoe pe afai e te fia ’auga foi oe ia? O la tatou auaunaga i le ’auga, o le faapelepele, o le fafaga, tausi, leoleo, ma faafiafia i ana mamoe. O lona uiga, ia faaolaina mamoe a Keriso i lou ola.

O faapefea mai lou leoleo mamoe? E le o oe le isi leoleo mamoe o loo lapo’a ma tino lelei i le ola o nai mamoe? E le ua tamaoaiga ea oe i le mativa o mamoe a Keriso? E le gata i Samoa, a ua ou vaai tino ma faalogo i Amerika, Ausetalia, Niu Sila, ua matua oi le fanau a Iesu Keriso. Ua pa’e’e’e mamoe a Keriso i la le agaga. Ua le ’ai i le vao mu’a, a ua mafatia i au mea kuku’a.

Ua fesulua’i solo i le fia ola, auā ua e le seu silasila i le Atua a o ou lava mana’oga. Ua tatou pepese ma leotetele i le sauaina o fanau; a o loo lilo lava ia i tatou, o loo tatou sauaina le lafumamoe i la tatou molimau ma le faatinoga o le feau (Mata.7:4-5).

O loo lapata’ia ma fautuaina pea le saogalemu o fanau teine a le atunuu mai ma’itaga e le manaomia; ae o loo tausolomua tatou ona faamata’u, ma faamalosia manaoga e inosia e le Atua i fanau a le ekalesia!

O le upu moni, e le mafai ona ola manuia mamoe a Iesu Keriso, pe a mativa oe i le alofa. Ioe, e manaomia e Iesu ni leoleo mamoe alolofa. E manaomia ni faigaluega e agavaa i le galuega faaola.

E pupula faasoloatoa i le ao ma le po mo le saogalemu o mamoe. E le faalogo tiga. E le faailoga mamoe ma alofa faapito. E le inoino i mamoe mama’i ma lē vaai maulalo i le mamoe mativa. E le ’ai mamoe ma tuli mamoe.

Na te saili le mamoe ua leiloa ma fafaga le lafu i le vao mu’a. E saoloto ma ola manuia ai mamoe. O le galuega faaleoleo mamoe, e pulea e le alofa. E limataitaiina e le alofa. E faatumutumu le alofa; e faavae i le alofa. ’O le alofa, e lautua lea i mea uma” (Kolo.3:14). O le alofa, e galo ai tiga; e te’a ai le vaivai; e sola ai le palaai (I Ioa.4:18).

Le au uso e, o ’e iloa lou tulaga i totonu o lou aiga? I lau galuega? Mai lava i le amataga, o tatou o tausi mea o le foafoaga. 

Ua uma ona saa fua le soifua o Iesu Keriso mo oe ma lou aiga; mo a’u ma tatou uma. O lou taimi lenei! O o tatou aso nei!

Samoa e, e le o upu le alofa, a o le faatinoga. E le fesiligia le alofa manuia o Samoa pe afai e te alofa atu i le Alii lou Atua ma lou loto atoa, ma lou agaga atoa, ma lou manatu atoa ma lou malosi atoa. E le o se mea taumate foi le tupu ma le pa’ia o le ekalesia pe afai e te alofa atu i le lafu mamoe faapei o oe lava ia te oe ma lau fanau (Mare.12:30-31). 

Simona e, pe e te alofa mai ea ia te A’U? Ia e fafaga i A’U mamoe.

Samoa e, pe moni ea lou alofa i le Atua? Ia saoloto le atunuu ia te oe. Ia ola le ekalesia i lou ola. Ia fafaga ma tausi lelei tagata uma. Ou te toe faamanatu atu – “O mamoe a Iesu Keriso” 

 

Amene

7737063/7783782

By Rev. Petaia Setu 25 June 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>