O LA’U TALA FO’I

25 June 2016, 12:00AM

1.  Matauina i Tala Fou fai mai ua lapata’ina e le Sui Fofoga Fetalai o Nafoitua Talaimanu Keti le Malo-“e le mafai e Samoa ona faalagolago pea i fesoasoani mai fafo e faavavau.”Ma ona o lea ua tilotilo le atunuu i sana aitalafu i fafo lea ua sopo atu i lo le $1.5 piliona-fai mai Nafoitoa-o le pogai lea e taua ai i le Palemene ma le malo -ona ta’iala e tusa ai ma le faaupuga-“ia soifua e tusa ai ma mea e mafai ona maua..”!

Ina fo’ia la lea tulaga –fai mai Nafoitoa-‘e lelei fesoasoani mai fafo-ae tatau ona tatou manatua- e i ai le taimi o le a motusia ai lea fesoasoani. E tatau ona tatou soifua uma e tusa ma mea e mafai ona tatou maua-ma o se vaega lea o se ‘saunoga faa-taupou’ a le Sui Usufono- ae afai ua suamalie  le lole e maua fua i le mitimiti-ailoga a tua i ni a le finagalo o le faipule! O le a sou taofi?

2. Matauina foi i Tala Fou se ulutala fai mai-O se fesoasoani na lavea’ina ai le ola o se tagata e ma’i fatu-ma o lea alii talavou e ma’i fatu- o Taulava Atonio mai Mutiatele Aleipata. A tatou tilotilo la i nei sailiga fesoasoani-o le fesili- e faapea ona lavea’ina si nei tamaitiiti pe ana le seanoa tagata alolofa ma faalapotopotoga.

O fea o i ai ta’ita’i o le Malo o Samoa ma faipule o le Palemene? Aisea ua le mafai ai ona maua se auaunaga faapenei i totonu o Samoa ae o lea ua 54 tausaga talu ona Tuto’atasi-ae ua savalia le 40 tausaga talu ona pulea le atunuu e le faigamalo a le HRPP?

O le faiga lava lenei o le a tatou alu ai-o le saili lava e tagata ma’i ia se fesoasoani mo sona togafitiga i fafo? Ana avane la le faitau miliona ma miliona o tupe a le atunuu ia ua goto i le moana sausau talu ai faiga pi’opi’o a le Malo- e faatupe ai se auaunaga faapenei i Motootua-semanu e le saili fesoasoani solo nei matua! Afai la o Motootua le Falema’i Tele o le Atunuu-ave la nisi fesoasoani e tele na e la’u mai nei- e matua faalelei ai le Falema’i-ae tuu isi mea e leai se aoga!

E mafua ona fai atu ona o le atunuu atoa e aafia i tulaga faigata faapenei-ae le aafia ai ta’ita’i o le malo-aua o le taimi lava e gasegase ai-ave loa i Niu Sila poo se isi atunuu mo togafitiga-ae leai se mea faapena o faia mo tagata uma o le atunuu! O le a sou taofi?

3. Matauina foi i Tala Fou fai mai-“Na auina atu e le Palemia se fe’au i le Manu Samoa lea e le’i maua se manumalo….! O ia la upu- na fai a’o auai le Faia’oga o Namulauulu Alama Ieremia ma le ‘au i lona Ofisa. Fai mai sa le faatagaina sui o nusipepa ona auai-ona fai mai le Fa’ia’oga e leai lava se isi mea o loo mana’o i ai le Palemia vagana ai le manumalo ia Tonga….!

Ia –atonu e le o se fe’au fou lea i le atunuu-ma e le na o le Palemia foi o loo mana’o ia manumalo le Manu Samoa-e faapena foi le mana’o o le atunuu atoa! Ia –talosia ia manuia le faamoemoe o le Manu Samoa! Ae ia manatua foi le upu-‘e te fiu lava e sasa le manu ua mate-ua mate lava!

Ae ia manatua-e le’i o’o le Manu Samoa i se tulaga faapenei i le amataga. Sa matua ta’uta’ua le Manu Samoa 15 ma le Manu Samoa Ta’ito’afitu! Afai la ua tulaga faaletonu taumafaiga a le Manu Samoa-o lona uiga-e i ai lava le mea o loo faaletonu-ma o lena faaletonu-o le aafia o le lakapi i polokiki.

Afai la e leai lava se isi tagata lakapi e mafai ona ia pulea le Iuni Lakapi a Samoa-o le pogai lena o le malaia o taumafaiga a fanau. Tiga lava ona aumai faia’oa mai fafo- ae leaga lava-ae leai se leaga faapea a’o fai e tama fanau moni a Samoa sa lakapi! O le a sou taofi? 

25 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>