Fuafua le Matagaluega o Faamasinoga e siitia lo latou ofisa mai Tuasivi i Salelologa
O le Ofisa o Faamasinoga o loo i Tuasivi o lo’o fuafua e siitia i Salelologa pe a mae’a ona faatulaga ma fausia le latou nofoaga fou. O lea tulaga na faamaonia mai e le Minisita o Faamasinoga, Afioga Faaolesa Katopau Ainuu i le taimi o le latou asiasiga i le motu tele i Savaii.
Na faaalia e Faaolesa o le faaiuga e siitia ese mai le Ofisa o Faamasinoga ma Tuasivi, e o gatasi ma le fuafuaga a le Malo ina ia siitia uma ofisa a le Malo mai nofoaga o loo iai, i le Taulaga i Salelologa.
“O le tau fuafua mo le galuega e $2 miliona tala, ma e aofia ai le Fale Faamasino, Ofisa mo le Aufaigaluega faapea ni fale o le a vavae ese e fuafua e nonofo ai Faamasino o le Faamasinoga” o le faaopoopo lea a Faaolesa.
Na saunoa foi le Afioga i le Minisita e faapea, “o lenei fuafuaga loo tolo mo se taimi le tumau ona o le utiuti o le seleni. Peita’i ua sauni la matou Matagaluega e tuu atu se talosaga i nisi o paaga a le Malo o Samoa, e faatatau i le faatupeina o lenei atina’e taua mo le motu tele i Salafai.”
Saunoa faaopoopo foi le Minisita Lagolago a le Matagaluega o Faamasinoga Tofa Sooalo Mene e tusa ai ma le taua o le nofoaga o le a siitia iai lenei atina’e e faapea, “o Salelologa e sili atu ona tutotonu ma faigofie mo tagata lautele e maua ai auaunaga a le malo, e pei o auaunaga o loo ofo atu e le Matagaluega o Faamasinoga,” o le saunoaga lea a Sooalo, a’o ia faamamafa le taua o lenei fuafuaga a le malo mo le Taulaga i Salelologa.