O LA’U TALA FO’I

123 Hits

1. Matauina i Tala Fou fai mai ua le gata ina matua gugū lava le Palemia e uiga i le tofia o ana Minisita Lagolago e 13 ananafi-ae le o fia talanoa foi i ai pe a fesiligia e tusitala o nusipepa.

Pau lava lana upu fai mai o le a faatauto ia Minisita Lagolago pe a o’o i le taimi e tatau ai……! Na maua foi e le Samoa Observer mai se faamatalaga faatuatuaina e faapea-sa tuu lava le avanoa i Minisita- latou te filifilia ai a latou lava Sui Minisita.

O le matua mata’utia lava o le tulaga lea ua i ai nei le Malo o Samoa-aua afai o le Palemia o le atunuu- ae musu e tali mai i le atunuu-o lona uiga- ua faa-Komunisi le Malo o Samoa.

O Samoa o le Malo Faa-Temokalasi-ma o faiga faa-temokalasi e faapea-afai o se Palemia poo se Ta’ita’i na fililifia e le atunuu- e noatia lava o ia i taimi uma –ina ia tali mai i le atunuu-tusa lava pe le fia tali mai.

Afai la e musu e tali mai e uiga i le filifiliga o ana Minisita Lagolago-o lona uiga la- e na o ia lava le Pule aoao o Samoa! A tatou tilotilo la i le faitau miliona ma miliona o tupe a le atunuu na maumau i faiga pi’opi’o a lana faigamalo-ae musu e ave i le Faamasinoga-o le faailoga moni lena o le fiapule toatasi ma le fiapule aoao ia Samoa!

O temokalasi la Samoa pe o lea ua Komunisi? O le a sou taofi?

2. Matauina i aso nei le matua faateleina lava o taavale i totonu o le atunuu-ma o le mea moni lava –o le tulaga lea o le a avea ma faafitauli tele i se taimi e le o toe mamao.

O le faafitauli la e aupito i sili ona mata’utia-o le maliliu ai o tagata-aua- pe e te talitonu i ai pe leai- masalo pe sili atu i le 50 pasene o avetaavale o loo feoa’i i ala tetele i le taimi nei- e le’i aoaoina i ni Tulafono Tau Feoa’iga i Ala Tetele-ae le gata i lea-e leai foi ni o latou laisene avetaavale.

E mafua lea ona o le manatu e faapea ia tofu lava le aiga ma le taavale. Ae a tatou tilotilo lelei i lea tulaga- o isi aiga-ua sili atu i le 3.4,5,taavale mai fanau ma aiga i fafo-o lona uiga la- o le a taumafai lava le aiga e faaaoga uma lava ia taavale i le taimi e tasi!

Afai la o le numera lea o taavale a aiga uma o Samoa-e o’o mai le taimi- e na o solo taavale le mea o le a i ai-ma o le a matua faatuai ai feoa’iga i ala tetele ma maumau ai le faamoemoe moni na aumai ai ia taavale. O le a soou taofi?

3. A matau atu i faalavelave tutupu i atunuu i fafo ona o faiga a tagata faatupu faalavelave-masalo e sese pe a tatou faapea o loo manuia lava Samoa! Ia e moni lava o faalavelave e mafua mai tagata faatupu faalavelave ma ua fasiotia ai nisi i fafo!

Ae a tatou tilotilo lelei la i ia faalavelave-ia atonu o lea ua tupu-ona mou ese atu lea! A e a tuu mai ia Samoa-e leai ni faalavelave faapea ma ni tagata faatupu faalavelave e pei o fafo! Ae peita’i- e matua feoloolo ia faalavelave ma mea e tiga ai-pea tuu mai ia Samoa.

E moni e leai ni tagata faatupu faalavelave iinei; e leai foi ni pomu o tatao solo i Apia-ae a tuu mai loa i aso fai pea ma le tulaga pagatia o le atunuu ona o le mativa ma le le tagolima- e matua sili atu lava ona pagatia Samoa.

O lea ua mae’a le faalavelave I Peleseuma ma ua to’afilemu aua o lea matu gaoioi le malo e saili ma saisai I latou na mafua ai lea faalavelave. A fua mai la ia Samoa-o le a se fuafuaga a le Malo ua fai- e fo’ia ai ma faaleleia le tulaga o le mativa masaesae ua i ai nei le atunuu?

Afai la e leai se mea o faia e le Malo i lea itu-o lona uiga la-e le o kea i ai le Malo-vagana ai lava le naunau e pule aoao i le atunuu se’ia o’o i le faavavau! O le a sou taofi?

© Samoa Observer 2016

Developed by Samoa Observer in Apia