Manatu o le Fa’atonu - O le Aso Faraile e Paia

Tusia Mata'afa Keni Lesa ma Faaliliu e Seagaitumua Tupuola ,

137 Hits

O le afiafi ananafi na taunuu mai ai le meli se tusi e matua faanoanoa ai.

O lea tusi na tusia e se tasi e suafa ia N. Williams, lea matou te talitonu o lana olega -o se mea e matua tatau lava ona tatou mafaufau i ai i le asō a’o tatou nonofo i lalo e faamanatu le Aso Faraile Paia. Faa-avanoa lou mafaufau mo ia. Musumusu se tatalo mo ia ma isi tagata uma lava o loo pagatia- ona o se mea o loo feagai ma ia.  O lea la tusi ua faa-ulutalaina “Ua faatolu ona gaoia ma o loo faifai pea.”

“I nai aso ua mavae atu o ni aso faatiga lea mo lo’u aiga,” o le tusi mai lea a le tama’ita’i (silasila i le tusi atoa o loo i lalo). “Ua outou silasila la-afai e faatolu ona gaoia faalausoso’o lou fale i totonu o aso e ttolu……ua amata loa ona e mafaufau pe o le mea ‘ea ua sili atu le paoa o tagata solitulafono i lo le vaega o Leoleo.”

E tusa ai ma le faaaliga a lea tamaitai, o le lisi o mea ta’itasi na gaoia e mafai ona maua ai se tala. 

 “A iloilo e se tasi le lisi o mea ua gaoia, o mea’ai o loo maoa’e i luga o lea lisi faatasi ai ma le tulaga uiga ese o lea tulaga- i totonu o se atunuu e lafulemu? O tagata ‘ea ua aga’i ina matitiva faapena pe o le faasaolo ma le faapalapala?” 

Na toe ta’ua e lea Tamaitai: “O tagata solitulafono e le mai se isi lava paneta ae o loo nonofo lava i totonu o nuu ma i nisi tulaga- e iloa e tagata o nuu poo ai i latou ia-ae masalo e fefefe e tautala. “O nisi o i latou ia e ono mafai ona auai i totonu o le taualumaga tau le toe fuata’ina ae o isi atonu e le mafai lava ona toe suia. O le a  avea ma mea faigata pe afai e amata ona fefefe tagata i pagota poo e solitulafono i lo pulega.”. O se tasi lenei o le tele o faalavelave uiga ese ua tutupu mai totonu o lenei atunuu talu ai nei. 

Ma o loo auina atu ai se fe’au tau faamata’u ia Samoa atoa faatasi ai ma se vaega o le fefe ma le popole. O lea tulaga e matua leai se masalomia o lona uiga faatupu vevesi.

I luga o lona vaega e vaaia, a tatou tilotilo ia Samoa i aso nei, e foliga mai o loo lelei mea uma lava.

O le vaega o atumotu ua faamanuiaina ai tatou ona ua mafai ona tatou faaigoaina o loo tatou aiga-o loo faatatauina pea o le penina o le Pasefika, e pei ona mafai ona molimauina e le toatele o tagata e asiasi mai i lenei atunuu.

Ae peitai-afai e te ‘eli i le loloto o le eleele, o le a e maua ai e faapea e le o faapena mea uma. O le faimea pi’opi’o ua na ulufia le tele o vaega o lo tatou atunuu se’ia o’o lava ina foliga mai ua talia i se tulaga lautele lea tulaga-ma ua i’u lava ina avea ma mea e masani ai.

Mai le malo i ekalesia faasolo atu ai i aiga, e leai se mea o totoe. I le tele o itu, o loo i ai se laina manifinifi o loo soli e le toatele o tagata-i le va o le mea e sa’o ma le mea sese.

O nisi ua latou sopo’ia lea laina ma o latou mata o loo matua pupule ma le iloa lelei e faapea o taunuuga e o mai faatasi ma le faaiuga e fai ai. O isi ua faamalosia ina ia matua fulitua i le laina ina ia mafai ai ona faa-talitonuina i latou lava e matua leai lava sea laina.

O isi ua latou suia va o lea laina ina ia fetaui ma latou mea faamuamua. Ua latou faatinoina lea tulaga i se faiga uiga ese lea e matua le mafai lava ona fulitua i ai.. Matou te le tau faailoa ia te outou nisi mea, o oe ma a’u o loo nonofo i totonu o lenei atunuu, ua tatou vaaia le mea o loo tupu.

Atonu e eseese a tatou faamatalaga ma le faauigaina-ae leai se mea o i ai.  E pule lava le tagata ia. O lenei taeao e faitau afe ma afe tagata o lenei atunuu o le a potopoto i falesa ma malumalu eseese e faamanatu le Aso Faraile Paia.

O iina, o le a folafola ai le fe’au o le faa-satauroina o Iesu Keriso mai lea pulela’a i lea pulela’a. O le a tatou manatua ai le taimi na toso faatātā atu ai le Alo o le Atua-sasa ma tutu’i i fao i luga o se koluse.

O le aso lenei, na sasa ai Iesu, sauaina ma tutu’i i fao i se satauro, o se faiga aupito i saua lea na fuafua e le pulega a Roma mo le faasalaga aupito i maoa’e. O le fesili poo le a le pogai ua maliu ai Keriso i se ala faapea?

O le tali faigofie –na maliu o ia ina ia lavea’i lenei lalolagi ua oti lea o loo mau ai tagata agasala. Na maliu o Ia mo tagata agasala e pei o a’u ma oe; e pei o tagata solitulafono o lenei lalolagi ia o loo faaauau pea ona tuuina atu i tagata o le atunuu le faatiga-loto ma le faatiga-ulu.

O se mea faigata lenei ma ou te iloa e faigata ona talia-ae o le mea moni e faapea na maliu foi Iesu mo tagata solitulafono. O le mea moni, o le Atua o se Atua o avanoa lona lua, lona tolu, lona fa ma le selau o avanoa. 

O le pogai lena na maliu ai Iesu. E le’i maliu o ia mo le mea tonu ma le lelei. Ana faapea e matua lelei atoatoa le lalolagi ma leai se agasala, semanu e leai se aoga e maliu ai o ia. 

O le pogai lea e tatau ai ona tatou maua le loto faafetai i lenei aso. I lenei Aso Faraile Paia, na totogi e Iesu Keriso le taulaga, puapugatia ma maliu i luga o lea satauro.

O lona maliu, na ia lavea’ina ai ma faaolaina i tatou ma e ala ia te Ia, e mafai ai ona tatou maua le meaalofa o le ola e faavavau. Ona pau lava o le mea e ao ona tatou faia-o le talia lea ma ia faafetaia. O lea le uiga o lea mea mo i tatou?

Ia-afai la na maliu Iesu Keriso mo i tatou ina ia faamagaloina ai a tatou agasala, o ai la tatou e saga faaauau ai pea ona ola i le olaga e le faamagalo atu i isi tagata- e o’o lava ia i latou ia na sese ia i tatou? E le o fai mai ‘ea le Tusi Pa’ia-ia tatou alolofa atu i o tatou fili?

O se upu lenei o le lapata’iga. Ioe, o le toto o Iesu Keriso ua faamagaloina ai a tatou agasala. 

Ae peitai- o le agasala e i ai ona taunuuga. E faapena foi le solitulafono. E i ai le tau tatou te totogiina.  Ia outou maua Samoa se Aso Faraile Paia e malolo ai, ma ia faamanuia atu le Atua!

© Samoa Observer 2016

Developed by Samoa Observer in Apia