E le’i mafai ona tu’uina mai e le Loia Sili, Lemalu Hermann Retzlaff se tali maumaututū e tusa ai ma le fa’atonuga ale ali’i palemia, Tuilaepa Sa’ilele Malielegaoi ina ia fai loa se fa’aiuga i tagata nei o lo’o lalafi mai tua o le itulau ale ‘O LE PALEMIA.’

E tusa au ma le taumafai atu ale Samoa observer mo se fa’atalanoaga, ma asiasi atu i lona ofisa e le’i mafai ona tali mai o ia.

E o’o fo’i i imeli sa tu’uina atu e le’i mafai ona maua mai se tali.

I le vaiaso na te’a nei, sa fa’aailoa mai ai e Tuilaepa i le Weekend Observer, ua mae’a ona ia fa’atonuina le Loia Sili e tusa ai ma lea mataupu.

Sa fesiligia fo’i mo sina taimi pu’upu’u e fa’atalanoa ai i lona ofisa ae leai lava.

Ae sa tali mai le falilautusi a Lemalu e fa’apea, “O lo’o alu atu le loia sili i ana fonotaga, ae o le a ou fa’ailoa iai lau mataupu ona toe logoina atu lea o ‘oe pe mana’o e fai se lua fa’atalanoaga.

Sa fa’ailoa e Tuilaepa i le vaiaso na te’a nei ua mae’a ona ia fa’atonuina le loia sili ina ia fai loa se fa’aiuga i nei tagata o lo’o masalomia.

 “O e manatua na ou faiatu ia te oe e leai se mea e lilo i lenei lalolagi, o la’u tala lea e fai atu so’o lava ia te oe.

E le’i fa’amaninoa mai e Tuilaepa po’o le a le fa’aiuga a le loia sili o le a fau.

Pe na te ta’uina mai fo’i igoa o nei tagata o le a faia ai le fa’aiuga ale loia sili. 

Sa le mafai fo’i ona ia fa’ailoa mai pe to’afia i latou lea ua ia silafiaina.

O le itulau lenei ale ‘Ole Palemia’ i luga o le facebook ua avea ma mataupu o lo’o fa’amuamua e le malo ina ia su’esu’eina po’o ai o lo’o lafi mai ai i tua.

 I le vaiaso na te’a nei sa ave’ese ai e le pulega ale facebook lenei itulau ona ua le usitaia nisi o tulafono. 

Ae i lea lava aso sa toe alia’e ane ai le isi itulau fou.

E tusa ai ma ripoti muamua lea sa fa’ailoa mai ai e Tuilaepa o nei itulau uma e iai le facebook, twitter ma isi o atina’e fa’atekonolsi ia a le malo e fesoasoani ai i mea tau feso’otaiga.

 “O vaega uma nei o le atina’e a le malo,” o lana saunoaga lea.

“O e manatua le taimi lea na faia ai lenei tulafono i le 1999, sa tele fo’i faitioga sa fai aima isi pulega.

 “Afai na e faitau i la’u tusi lea sa ou tu’uina ai Minista e toa’lua ina la’ua vaia lenei vaega ae peita’i e le’I mafai ona la’ua faia le galuega.

 “O lea na ou tu’uina ai le matagaluega lea ina ia ou faia, ma fa’aauau ai poloketi olo’o mana’o e fai.

Sa fa’aalia e Tuilaepa o le a tulafono sa faia ina ia tu’ueseese ai le vaega o I.T. ma le vaega o feso’ota’iga lea na mafai ai ona ofi mai ai i totonu le Digicel Samoa.

 “Ina ua faia auala fa’atekonolosi ia, o le a nei le mea ua tupu o latou ia ua tau leaga ulu lea ua latou fa’aaoga seseina auala fa’atekonolosi nei.

 “O lea ua latou fa’aaogaina e tu’ua’ia sese ai isi tagata, ae o nei mea uma o vaega uma nei o atina’e a Samoa.

“O le facebook fo’i e iai ana tulafono ma afai la ua solia e nei tagata tulafono o le iuga lea o le ave’ese ma le itulau.”

Sa fesiligia Tuilaepa pe le’o tilotilo le malo i le fa’asaina o le facebook sa ta’ue e Tuilaepa o nei vaega uma o lo’o silasila ai le malo.