Manatu o le Fa’atonu - Fa’ataua lau palota

25 February 2016, 12:00AM

Tusia - Mata’afa Keni Lesa

Fa’aliliu - Maiava

 

La lea ua malama ulu-galu ua fola pepa a tama – ia po’o lole fo’i, a le HRPP ma le Tautua ma ua ta’oto atu nei i le atu-tia, o malae-toto’a ma malae o le vavau e fili-tagaga iai le tofa ma le moe a’o le uta tu’u-mamao fo’i, po’o fea i le vao-filifili o iai se la’au-taia, aua se foe o lou sa. 

Atonu o mau-to’ovae pea le HRPP ona o galuega fa’atino o le 34 tausaga ua alu-atū - a’o foe-mua ai, ma foliga fo’i ua maua’a e toe lilifa atu finagalo o le atunu’u mo le isi lima tausaga, ae le tamatama ai le finau a le Tautua ua loa o alalaga, o le taimi lenei mo se suiga.

A fua i Anavatau ua fefulisa’i-solo nei ma talanoaina e le atunu’u, e faigofie lava ona iloa le sa ua se’e-tuagalu ua mafatautai. 

O le tele o le sisipeni, tele fausa ma mautu i so’o se mea e mo’omia, ua manino ai, o le Anavatau e 19 laupepa a le HRPP ua matua lava-tapena e talatalapipi mea ‘uma, e le pei o le Anavatau a le Itu Agai, e na o le tasi lava le laupepa.  

 ‘Ese mai la i lena, e taua tele le silasila lelei i Anavatau ia e lua. O le fautuaga, silasila toto’a iai a’o le’i faia lau filifiliga po’o ai e palota iai – pe afai lena e le’i faia lava sau fa’ai’uga. 

O le mea moni e tatau ona iai, o Anavatau nei e tatau ona fua iai le taunu’uga o le palota.  O le uiga o lea tala, o mata’upu nei e tatau ona fua iai filifiliga ma fa’ai’uga-fai a tagata-palota. Po’o a mea o le a taumafai lea vaega ma lea vaega e fa’atino aua le manuia o tagata-palota. E faigofie lava. 

A o le fa’alavelave la e pei ona tatou iloa, e seasea tupu se mea fa’apena i Samoa nei. Pei sa sili ai ona tu’u ia faigā-manifeso ma faigā-anavatau, pe a te’i ua e fesili mai. Ae a faiga-fa’atosina ma faiga-‘ai fa’aalatua e faia matilatila lava ona o finauga mo tagata-palota. Ta’ilo fo’i i finauga a mea nei o ta’ifau! 

Se’i tatou va’ai tasi atu ia i Anavatau ia e lua.

Ina ua fa’alauiloa le Anavatau a le Tautua i le vaiaso talu ai, o le tasi o vaega sa folafola mai e fa’ataunu’u pe a malo i faiga-palota, o le mafai lea ona palota o tagata Samoa uma o lo’o i fafo, mai atunu’u o lo’o aumau ai.

O lo’o folafola fo’i e le Itu Agai – lea o lo’o lima-ta’ita’ia e le latou mau o le “Aia Tutusa mo Tagata Uma”  - le si’itia o totogi mo faia’oga, o foma’i ma tausi-soifua fa’apea le ‘aufaigaluega uma a le soifua maloloina, o se vaega o a latou fuafuaga mo le fa’aleleia o tulaga tau-A’oa’oga ma le Soifua Maloloina.  

I le Vaega o Tulafono ma le Fa’atinoga o le Amiotonu o le Anavatau a le Itu Agai, o lo’o tamau ai pea i le fa’atuina o se Vaega e Tete’e ai Faiga Pi’opi’o, e fo’ia ma taofiofia ai fa’atinoga o faiga pi’opi’o i totonu o galuega a le malo. 

O lo’o fuafua fo’i le Itu Agai e fa’aitiitia le taimi e avea ai se tasi ma Palemia, i le na o le lua nofoa’iga.

O’o ane i le “Fa’asoasoaina tutusa o le Tamaoaiga”, o lo’o fuafua le Tautua e si’itia le totogi aupito maulalo mai le $2.30 i le $3.00. O le vaega lea o a latou fuafuaga e tau fa’afetauia ai le tau o le soifuaga mo le mamalu o le atunu’u, fa’atasi ma le fa’amoemoe ‘autu, ia fa’aitiitia le tau o le soifuaga. 

una’ia ai 

O le vaega mulimuli o le Anavatau lea, o lo’o lagā ai fuafuaga e fa’afetauia ai lu’itau o le si’osi’omaga o feagai nei ma Samoa. O le tasi o vaega muamua i lalo o le “Tausia- lelei o le Si’osi’omaga”, o le fa’aleleia atili lea o vaega e pu’eina ai ma maua le suavai fa’apea le una’ia o le fa’aaogaina o le malosi-fa’afouina. 

O lo’o fuafua fo’i e toe iloilo tulafono o iai nei, e fa’atatau i ‘ele’ele ma fanua umia fa’aleAganu’u fa’apea fanua umia-sa’oloto. 

Na ta’ua e Palusalue i lana saunoaga ‘autu, ua o’o i le taimi mo se suiga o le malo. Na saunoa, ua matua ogaoga ‘aitalafu a le atunu’u i fafo lea ua o’o i le tasi-tesi-fa piliona tala ($1.4 piliona tala) ma lapata’ia ai le feagai o tupulaga o Samoa i le lumana’i ma fa’afitauli o le toe totogiina o ‘aitalafu so’ona-fai a le malo.

Na saunoa fo’i, ua fa’asolo ina galoma atu le alolofa o le HRPP i tagata o le atunu’u talu ai ua malosi le paoa ua le toe fa’alogo ai i ni fautuaga. Na fa’atusa fo’i e Palusalue le Anavatau a le Tautua Samoa, na faia ma fa’avae i luga o le alofa ma le mana’o, e fai ni suiga mo le manuia o tagata uma. 

 “Samoa, e le o taimi tatau lenei mo se suiga o le tatou malo,” o lana tu’ualalo lea. “Afai ua e lagona ua tatou mo’omia se suiga, tu’u mai lou fa’atuatuaga.” 

A silasila i le isi itu, ona iloa lea le to’amalie o le HRPP i le taimi nei, aua ua mae’a lelei ona fuafua le isi lima tausaga e fa’aauau ai pea le pulega o le malo. A ua tatau ai pe a silasila i nofoa e 18 ole Palemene lea ua mautinoa a’o le’i faia filifiliga a le atunu’u. 

A ua manino mai fo’i i le latou Anavatau, ua mautinoa le toe fo’i mai e ta’ita’i le malo.

“O le fa’amoemoe ‘autu o le anavatau lenei, o le fa’aauauina atili lea o le fa’aleleia o le soifua manuia o tagata Samoa uma i lalo o le ta’ita’iga mausali a le HRPP,” o le mau lea o lo’o i le Anavatau.

 “O le tasi o poutu o lena fa’amoemoe, o le fa’ateleina lea o avanoa faigaluega mo o tatou tupulega talavou e i’u mai a’oga ae maise i latou e na o le feoa’i le-aoga solo i totonu o afio’aga ma alalafaga.

“O le fa’amoemoe la, o lo’o fa’a’autu i le atina’e o tagata fa’atasi ma le fa’anaunauta’iga o le a si’itia maualuga tulaga tau-tamaoaiga ma aga’i ai e fa’atino vaega talafeagai uma e fuafuaina ai, fa’atupe ma fa’atinoina e le HRPP ana polokalame tau-atina’e.

“O le fa’atinoina lelei o fuafuaga tau-atina’e o lo’o ‘auina atu i le anavatau lenei, o le a ‘ausia ai se tulaga maualuga ma le manuia lelei mo o tatou tagata.”

E matua mata’utia ma mananaia na’ua nei fa’a’upuga. O ni fa’amoemoe ‘anoa tele e leai se masalosalo. Aua o le tulaga lava lea tatou te feto’ai i taimi fa’apenei.

E matua anoanoa’i fuafuaga ma fa’amuamua a le HRPP e mautinoa e le ofi uma i lenei tama’i-avanoa.

Ae na fa’ai’u mai saunoaga a le Palemia fa’apea: “O lenei Anavatau ua na o se fuafuaga fa’ata’atia. E le mailoa po’o a mea o le a tutupu i le lumana’i. Ma e leai se tagata soifua e mafai ona vavalo ma ia silafia le mea e tupu a-taeao. Ua na o lo tatou Tapa’au i le Lagi na te silafia mea uma. Ona pau le mea e mafai e le tagata soifua, o le fuafua ma tatalo ma fa’amoemoe i le Atua na te fa’ataunu’u mea uma mo tagata Samoa. O le mea tonu lea sa fai pea lava pea e le HRPP. 

“E leai se manatu i le HRPP e fafau ni fuafuaga e so’ona si’itia ai tupe maua ma totogi po’o fa’amanuiaga tau-penisione ona o fa’atosina mo faiga-palota – Le ‘auala  e FAI MEA UMA E AUNOA MA LE MANA’O I TUPE FOU E FA’AOPOPO I LE PUSA; aua o le mea e tupu, e gau-a’ano ai le tamaoaiga ma tulaga tau-tupe a le atunu’u. E le o se tulaga lelei lena mea ma e le tatau lava ona tatou fa’atamalama fa’apena.  

“O lo’o afifi i le Anavatau lenei, le agaga ia tatou galulue fa’atasi. E le mafai lava ona na ona tatou fa’alagolago i le alolofa mai o aiga o lo’o i fafo fa’apea a tatou pa’aga fa’aAtina’e o lo’o lagolago mai pea i a tatou taumafaiga i le tele o tausaga ua tuana’i.

“E mo’omia lo tatou saga’i fa’atasi ane mo le atina’eina o lo tatou atunu’u. E tatau ona galulue le malo, e fa’apena fo’i Ekalesia, o afio’aga ma alalafaga ta’itasi ae maise tagata ta’ito’atasi uma, e tatau ona galulue punoua’i aua le tausiga o aiga. A tatou galulue fa’atasi, o le a manuia le tamaoaiga o Samoa ma o le a soifua fiafia tagata uma. ‘Ou te toe fa’apea atu ai Samoa, Palota mo le HRPP.” 

Lena Samoa. Tautua po’o le HRPP?

O lau lava filifiliga sa’oloto. Fa’aaoga lelei lau aia-tatau ma fa’aaoga lau palota. Fa’amanuia Le Atua!



25 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>