Ia galulue pea
I le maua ai o le avanoa a le Fofoga o Samoa ma le tamā i a Malo Tala, 50 le matua o le soifua o Siumu na ia fa’ailoa ai le tulaga faigata ua i ai nei le soifuaga.
“Ia o a’u o lo’u olaga atoa o totonu o si o matou nu’u i Siumu ia ma o lo’u iloa i ai i nei vaitau ua tatou i ai, ua faigata lava mea uma.
“O a’u ua fai lava si leva o avea ma ave ta’avale ma olo’o ua fesoasoani tele lea tupe mo si o’u aiga i le taimi lenei.
“O se itu lelei tele lea i a te a’u aua e pei olea lava o lo’o ua ave i ai le fa’amuamua i a te a’u lava ia.
“Ia o le tele o tausaga sa tausaili lava se galuega e fetaui lelei mo a’u ia lea la ua maua le galuega o se itu lelei tele lea mo a’u lava ia.
“O lenei ua maua le galuega ia e le faigofie fo’i e tau le la ma le timu i aso uma ae o le alofa lava i aiga e pei o lea lava le tulaga e tuleia ai lava lo’u tagata i le fa’atinoina o vaega nei.
“Ia mo le silafia ai o lea fo’i ua amata le tausaga i feau maasani ma ona tiute fa’agasolo ma o le agaga lava ia ia o le taumafai lava.
“E pei ona silafia ai ia ua matua’i alu i luga le tele o le tau o oloa aemaise o auaunaga totogi ma o se itu le lelei tele lea mo le tele o nai o tatou tagata.
“Ua leai lava se isi mea o toe taugofie, ua o’o lava i le u’uina o se tupe tele i se aso e tasi e pei lava ole emo o le mata le alu.
“O lo’u iloa i ai po o le a ma le a le tele mai o nei suiga, ae o le tumau lava ma aua ne’i fiu gofie.
“O lea lava le fa’amoemoega o la’u ia galuega ia e mo le atina’eina lava o nai aiga, aua a fa’atali se vavega ia o lona uiga e le taitai ona tupe se tulaga fa’apena.
‘O se itu e ao ona toe silasila i ai mo le fa’aleleiina.
“Ia ae lava ona galulue pea.