Tausiniō ina ia taunu’u le miti

24 October 2016, 12:00AM

E tofu lava le tagata ma lana miti po’o se mea fo’i e fa’ananau iai lona loto. 

Ae mo le taule’ale’a i a Mangere Su’a, 17 tausaga mai Apia, o lona fa’anaunauta’iga ia avea o ia ma faifa’atoaga i le lumana’i.

O Mangere o lo’o aoga nei i le Kolisi o Avele. 

I le fa’atalatalanoaga ma le Fofoga o Samoa, na ia ta’ua ai, o lenei miti na amata mai lava i lona la’ititi.  “O aso la a’o ou laititi, a ou va’ai nei i fanua ma lauele’ele e le’o fa’aaogaina e tagata, ou te mafaufau lava ai se manaia o nei ‘ele’ele ae fa’aaoga mo ni fa’ato’aga talo ma fuala’au ‘aina i le lumana’i. “Ou mafaufau fo’i loa, e manaia pe a iai ma se fale i le fanua lea ma se avanoa e fai ai le fa’ato’aga. “O i’ina na fa’atupuina ai lo’u naunau ina ia avea a’u ma fai fa’ato’aga.”

O le to’atele la o nisi, a fia avea loa ma faifa’atoaga, e sili ai loa le nofo loa ma le aoga ma amata le fa’ato’aga. 

Ae peita’i ua le fa’apena le auala ua uia e Mangere ina ia taunu’u ai lana miti. 

Na fa’aalia mai e Mangere, na atili ona fa’aosofia lona naunauta’iga e fa’ataunu’u lana miti ina ua ulufale i le Kolisi. 

“Na to’atele lava a’u uo na fesilisili mai ia te au po’o le a se galuega ou te fia faia pe a ou matua. O nisi na fai mai e fia foma’i, o isi o le fa’afaiaoga, loia ma isi.  “Ae ina ua fesili mai i a te a’u na ou fai ai, o a’u ou te mana’o e fai ai ma faifa’atoa’ga.

 “O le ala lena ua ou tau’aveina ai le mataupu lea o le faifa’ato’aga i le olaga. “Ina ua ou ulufale i totonu o le aoga a Avele, na ou manatu ai loa e ave le mataupu lea o le faifa’ato’aga ma le a’oa’oina o fa’a’ele’eleaga. O le mafua’aga ina ia ou iloa ai metotia ma auala ese’ese e tōtō ai la’au ma fuala’au ‘aina.” Na ia ta’ua fo’i, a leai ni miti ma fa’anaunauta’iga i le olaga o so’o se tagata, e leai e aoga. 

“Ou te iloa lava e le’o toe faigofie nei aso ua tatou iai foi i le taugata o le soifuaga, o le ala lea ua ou tinoṻ ai lava ina ia fa’ataunu’uina la’u miti. 

“Ou te iloa fo’i ma malamalama, e le faigofie le amataina o se ma’umaga. E tele fo’i fa’afitauli e feagai ai ma se tagata faifa’ato’aga.

“Ae o le a ou taumafai ina ia aua nei avea lea ma tulaga e fa’avaivaia ai a’u ina ia taunu’u la’u miti.

“E le gata i lea, ou te iloa fo’i o le faifa’atoaga e le fa’apea na’o le alu lava i le fanua ma moemoe i lalo o le paolo o la’au. 

“E fa’amoemoe lava mea uma i le galue malosi ma ia fiafia e fai le galuega. O le ala foi lea ua amata ai mai le la’ititi lenei miti, ina ia mafai ai ona ou au tilotilo ma su’esu’e so’o se ituaiga auala e mafai ai ona fa’afetaia’i faigata o le a feagai ai pe a oo ina matua. 

“O lo’u naunauta’iga lava ina ia maua se lumana’i manuia pe a maea ma i’u lelei le aoga, ina ia mafai ai ona ou fesoasoani i nai ou matua i le tausiga o lo matou aiga.

“I totonu o leo matou aiga, e tele lava ina ou fa’asoa ma talatalanoa fo’i i lo’u aiga e fa’atatau i a’u fuafuaga mo le lumana’i. 

“Ae ou te mana’o ina ia taunu’u uma ia mea. E i ai le fa’aupuga masani e fa’apea, ‘e mafai ona taunu’u lau miti pe a tu’u atoa iai lou malosi e fa’ataunu’u ai. 

“O le itu aupito sili ona taua o le galue malosi, ma aua le fa’atalitali.”

24 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>