Toe manatu tasi lava...Ia Taunu’u Vave le Fe’au

24 August 2016, 12:00AM

Toe mafaufau tasi lava…I a Sam Morse, se tasi o tagata iloga i totonu o Amerika. O le mea moni, o ia lea na ‘ave iai le fa’aaloalo na te tusia ai se ata mo le Fale Pa’epa’e, le nofoaga o le Peresetene o Amerika.

O le tasi po a’o fai ana galuega, na momoli ane iai se fe’au-tusitusia ma ina ua mae’a ona faitau, na tu’ua vave lava lana galuega lea ua leva o momo’o iai, ae tu’uva’a loa mo Europa. 

Na malaga Sam i Pale i Farani ona na fa’alogo, e iai se ‘auala fou ua latou fausia, e momoli ai fe’au. Peita’i e taunu’u atu si ali’i ma iloa ai, e le mafai e le faiga-fou lea ona lafo o ni fe’au i se nofoaga mamao. 

E matua le-‘ilafia e Sam se mea tau-‘eletise ae sa matua naunau lava e fia iloa fai se ‘auala e momoli ai ni fe’au fa’avavevave mo nofoaga mamao. Tele tausaga o tusi ata a Sama i le ao, e totogi ai le faiga o ana galuega ma fa’ata’ita’iga, lea e tele ina faia i le po. Tele fa’aletonu ma mea fesasia’i na fetaia’i ma Sam i lana galuega lea, peita’i na i’u lava ina manuia ma ia ‘ausia ai i ana ulua’i su’esu’ega, le faiga na fa’aigoaina, o le Morse Cose, lea na matua logologoa i ia taimi, mo le ‘auina atu o fe’au. O le mea moni, o le gagana lea sa fa’aaogaina tele mo feso’ota’iga i totonu o Amerika atoa. Tele soifua na fa’asaoina ona o fe’au se ‘auina atu e ala i le Morse Code. O se tulaga e manatua ai pea lea ali’i – ma se tama’ita’i fo’i e to’atasi.  

Manatua fo’i, e iai le mea na tupu i le aso mulimuli a’o iai Sam i le Fale Pa’epa’e, na mafua ai ona ia tu’ua lana galuega sa fa’ananau iai lona mafaufau ma amata ai loa ona ia a’oa’o tekonolosi fou tau-feso’ota’iga. O le afiafi lea na tu’uina atu iai se fe’au mai lona aiga i Connecticut. O lea fe’au na momoli atu e se tagata na ti’eti’e atu i se solofanua i aso e fitu, e ta’u atu ai ia Sam, ua maliu si ona faletua. 

Na matua fa’anoanoa lava Sam ona o lea mea, ae maise fo’i, ‘ana vave maua le fe’au, atonu lava e o’o atu o soifua pea lona to’alua. Mai lava la i lena taimi, na maumaututu ai lona mafaufau, e le tatau ona toe tupu o se mea fa’apea, i se isi lava tamaloa, pe a mo’omia e sona to’alua. O le mafuaga tonu lava lea na matua una’ia ai o ia, ia fausia le telekalafi. Le feso’ota’iga o uaea e momoli atu ai o so’o se fe’au i so’o se itu o Amerika i tausaga e tele ua mavae – o se ‘ausaga e manatua ai le tama’ita’i, lona to’alua e alofa fa’apelepele iai. Na maliu to’atasi lava na o ia, a o le Morse Code lea a Sam, o se galuega-alofa ina ia le-toe o’o ai ni fa’afitauli fa’apea i nai ta’ito’alua o lo’o nofo-valavala. 

E iai fo’i le ‘auala a Le Atua e momoli mai ai Ana fe’au mo tatou, e ala i Lona Alo o Iesu Keriso – ina ia ‘aua lava nei tatou maliliu ta’ito’atasi,  e aunoa ma Ia e fa’avavau. Ae a pe a tali nei iai; i Ana fe’au o le alofa i lenei aso? Tatalo ina ia fa’amagalo ‘Oe ona o au agasala ma ou ala sese o lo’o ola ai pea, ma ia pulea e Ia lou ola fou na maliu ai ona o ‘Oe. Toe mafaufau tasi lava…                                            (Fa’aliliu e Maiava).

24 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>