O Pili Lualu o se tamā 42 tusaga le matua le soifua o Savaia Lefaga. O ia foi o se faifa’atoaga. 

Sa maua le fa’atalatalanoaga le Fofoga o Samoa ma lenei tamā i le uma ai o lana fa’ataugatalo i le aso ananafi. O foliga vaaia ma le lelava o lenei tamā sa maitauina ai lona galue ma lona naunau i le fa’atauina o talo mo se tupe maua. 

“O a’u nei o le faifa’atoaga ma o lea foi le tulaga e fa’amoemoe iai lo’u aiga,” o lana lea tala. 

Pei foi ona e tagatagaai mai, ia fa’atoa uma mai lava lenei o la’u fa’atauga talo na ou sau mai lava le aso Gafua lenei fa’atoa ou foi le matou aiga le aso Tofi. 

“Ia o luga lava o le su’eina o se seleni aua se meaai le fanau. 

“ E iva a’u taga talo na aumai, o le uma foi a lea ia fa’atoa alu ai loa le fale. 

“E le mafai ona ou alu le matou fale pe a le lava se seleni ou te alu ma a’u. 

Talu ai o lana fa’atoaga mulimuli lea e fa’atau sa ia taua ai le naunau tele ia maua sina seleni mo le fanau. 

“Ia o la’u fafai mulimuli lenei, e pei o le ala foi lea o le onosai ai lava ia lava sina tupe. 

“O le maketi ua le toe tutusa lava. E le pei o ia aso e lava lelei ma alu lelei le talo ae o nei aso ua to’atele lava le au fa’atau talo ma o le ala foi lea ua laitit ai le alumia o talo. 

“Ia e iva a’u taga talo na mai ia ua uma lelei. 

“O lea foi le o le a alu foi le fale. 

“O la’u toaga mulimuli lava lea na aumai e fa’atau ona toma ai le po sina taimi fa’atoaga toe fai ai se isi maumaga. 

Sa taua e le tamā le fa’ama’i o lo’o maua nei i talo. 

“Ia pei ona silafia o lo’o iai le fa’amai o lo’o aafia ai foi tatou talo. 

“Ia o le ala tonu foi lena o le a le toe faia ai se maumaga ona o le le sefe lava o le fa’ama’i ma e maimaua foi le malosi le alu ae fa’aleagaina uma le fa’ama’i. 

“O sina fautuaga i le au fai fa’atoga, a manumanu lava le malosi aua le toe faia ni maumaga. 

“Sei fai muamua se fofo o le fa’afitauli ona toe amata ai foi lea o fa’atoaga.