1.  Toe tatala le Kolisi o Avele

Ua faamaonia e le Kapeneta le toe tatala o le Kolisi o Avele e afua atu i le Aso Lulu, 18 o Me 2016.

O le toe tatalaina o le kolisi, e faavae i tuutuuga ma aiaiga ua faataoto e le Kapeneta, e pei ona taua i lalo, faaopoopo i le polokalame ua faataoto mai e le Faalapotopotoga o Tama ma Teine Tuai o Avele ma Faiaoga, ua latou faamaonia ma sainia o le a latou faatinoina e tapu’e atili ai le amio pulea o fanau aoga.

O tuutuuga e aofia ai:

    O le a faaauau pea galuega a leoleo i fanau aoga ua molia, ma o nei foi fanau aoga e le toe taliaina i le Kolisi o Avele;

    Ia galulue faatasi le sosaiete a matua, faiaoga, ma le asosi o tama ma teine tuai o le Kolisi o Avele e faatino polokalame e faamalosia ai tu ma aga a Samoa o le faaaloalo, fefaapalepalea’i ma le fetausia’i, ina ia maua’a le totoina i loto o fanau aoga le taua tele o nei aga mo o latou olaga faalea’oa’oga;

    Ia faamalosia le faatinoina o polokalame e tapu’e ai le ola faaleagaga o fanau aoga i Avele, ina ia i ai le mata’u ma le ava i le Atua, ma ia a’oa’oina i ala o le Atua. O nei polokalame e faaauau ma o le a avea o ni vaega taua o faatinoga a le Kolisi i tausaga uma;

    Mataitu ma faamalosia le tapu o le tagofia e tamaiti aoga uma o telefoni feaveai i le aoga. Ia fausia lelei ni aulape e aoai ai tamaiti e le usitaia lenei tulaga i taimi o aoga;

    Faatu le Komiti Faufautua mo le amio pulea e gafa ma le faafoeina o polokalame ma faatinoga uma mo le soloia o amioga pa’aa ma lē taupulea o fanau aoga i Avele. O lenei komiti e aofia ai se faifeau, sui o le komiti a le aoga, ma se tagata tomai faapitoa i tulaga tau apoapoa’i. E galulue soosoo tauau le komiti lenei ma le Matagaluega o Leoleo ma le Matagaluega o Aoga;

    O le avanoa mulimuli lenei e tuuina atu i le aoga a Avele. Afai e toe tulai mai se isi mataupu i le lumanai e atagia ai le faatupu vevesi o fanau aoga mai Avele, o le a tapunia tumau loa ma le aoga, e aunoa ma se faatalanoaga e toe faia ma faafoi uma ai loa le toatele i isi aoga a le Malo.

Ua faatonuina foi le Matagaluega o aoga ina ia faamalosia loa le vaevaega o aoga ma ia faamalosia loa le aooga o fanau i o latou lava itumalo. O lenei faiga o le a taofia ai le saga omai pea o fanau mai Savaii ma isi itumalo i tua e aooga i aoga i le taulaga, ma tupu ai pea uiga vevesi o lo o taumafai le Malo e taofia.

Ua faatonuina foi le Matagaluega o Aoga ina ia toe iloilo igoa o lo o faaigoa ai Kolisi a le Malo, ina ia ogatasi ma le vaevaega faaitumalo ua i ai nei. O le tasi lea faiga e soloia ai manatu tuai ma uiga pa’aa e mafua mai ona o le mimita faaletagata i le igoa o le aoga.

Ia ta’i tolu masina ma tuuina mai e le Matagaluega o Aoga i le Kapeneta lipoti e uiga i faatinoga o tuutuuga ua taua i luga, i le 12 masina o lo o lumanai ai.

2. Toe fausia le auala laupapa i Leonē

Ua faamaonia e le Kapeneta le tuuina atu o le konekarate i le kamupani a le China Railway First Group Fiji Co. Ltd. mo le toe fausia o le auala laupapa i Leonē.

O le auala laupapa lenei na faaleagaina i le vaitaimi o le Afa o Evani.

O lenei tauofoga na faasalalauina mo le silafia lautele ma e fa kamupani na tuuina ane tusi tauofo.

Na faia le iloiloga a le Soa  Komiti i nei tauofoga e tusa ai ma aiaiga i totonu o le tusi o tauofoga ma tuuina mai ai le fautuaga i le Kapeneta mo le faia o le faaiuga.

3.  Tulafono Faatonutonu o Tulaga o Tagatanuu i le Teufaafaigaluegaina o Tupe mai Fafo 2015

Ua taliaina e le Kapeneta le Tulafono Faatonutonu o Tulaga o Tagatanuu i le Teufaafaigaluegaina o Tupe mai Fafo 2015.

O le a tuuina atu loa lenei Tulafono i le Ofisa o le Fono Aoao Faitulafono mo le faaliliuina i le gagana Samoa,  ma o le a tuuina atu foi i le Ofisa ole Loia Sili mo tapenaga aua le faamaonia e le Afioga Mamalu i le Ao o le Malo.

E tolu vaega tetele ua vaevaeina i ai lenei tulafono:

    Vaega 1: Igoa o le Tulafono Faatonutonu, ma le faailoaina o uiga o upu ma le faaaogaina o upu ma vaega eseese o le tulafono.

    Vaega 2: Taiala mo le faatinoina o le iloiloina o talosaga faapea le totogi ole faatinoina o lea iloiloga faapitoa.

    Vaega 3: Isi Mataupu e aofia ai le numera faatapula’a o tagatanuu o Samoa, ma tagata e le o ni tagatanuu o Samoa e mafai ona faafaigaluega i se atinae agavaa i lalo ole polokalame. E le gata i lea o le tau o totogi mai e tagata talosaga e agavaa e talosaga mai lalo o lenei polokalame lea ua faatulagaina.

4.  Konesale o le Poloketi o le Faaleleia o le tali atu i suiga o le tau

Ua faamaonia e le Kapeneta le tuuina atu o le konekarate i le konesale o Leilani Duffy-Iosefa mo le faatinoina o le galuega Konesale mo le Poloketi o le Faaleleia o le Tali atu i Suiga o le tau i talafatai ma afioaga.

O le tauofoga mo lenei galuega na faasalalauina mo le silafia lautele ma e toatolu i latou na tuuina ane tauofoga.

Sa iloiloina tauofoga e le Soa Komiti e fua i aiaiga o lo o aofia i totonu o le tusi o tauofoga ma tuuina mai ai le fautuaga mo le faia o le faaiuga a le Kapeneta.

5.  Faatauina, faapipiina ma le faaolaina o le masini faafoma’i (lithotripsy laser)

Ua faamaonia e le Kapeneta le tuuina atu o le konekarate i le kamupani a le South Austral Pty Ltd. mo le faatauina, faapipiina ma le faaolaina o le masini faapitoa mo togafitiga o maa i fatuga’o (lithotripsy laser) mo le Maota Gasegase i Motootua.

O lenei tauofoga na faasalalauina mo le silafia lautele ma e lua kamupani na tuuina ane tusi tauofo.

Na faia le iloiloga i tauofoga e tusa ai ma aiaiga manaomia ma tuuina mai ai loa le fautuaga mo le faia o le faaiuga a le Kapeneta.

6.  Aso mo le faamamaina o le taulaga aua le faamanatuina o le 54 Tausaga o le Tutoatasi

Ua faamaonia e le Kapeneta le avea o le Aso Toonai 28 o Me 2016, ma aso faapitoa mo le faamamaina o le taulaga i Apia aua le faamanatuina o le 54 Tausaga o le Malo Tutoatasi o Samoa.

E faaaogaina foi Matagaluega ma Faalapotopotoga a le Malo latou te faatinoina lenei galuega ma ua talosagaina foi faauluuluga uma ina ia lagolagoina lenei faamoemoe. O le a gafa foi pisinisi i totonu o le taulaga ma le faamamaina o vaega o lo o i ai a latou pisinisi.

7.  Fono faapitoa mo tulaga tau aoaoga i Fiti

Ua faamaonia e le Kapeneta le auai atu o sui o Samoa i le fono o le Polokalame Faapitoa mo Aoaoga e taua o le PaBER lea o lo o faagasolo nei i Fiti mai le aso 11 – 20 o Me 2016.

O lenei fono ua faaautu i le tuufaatasia o galuega uma sa faatino i lalo o lenei polokalame mai le tausaga 2012 seia oo mai i le asō.

O lenei polokalame, lea e fitoitonu i le mataituina o faiga o lo o faia ai aoaoga i totonu o le atunuu faapea ma le vaavaai agai i faatinoga o aoaoga i isi atunuu aemaise tulaga o tulafono e limataitaiina ai aoaoga faapea ma polokalame e mafai ona siitia atili ai tulaga o aoaoga aemaise o iuga o suega.

O le usugafono a Samoa e aofia ai le Ofisa Sili o Pulega a le Matagaluega o Aoga, Taaloga ma Aganuu, Dr. Karoline Afamasaga-Fuatai; Ofisa Sili Lagolago, Leota Valma Galuvao ma le Sui o le Polokalame o le PaBER, Maimoana Petaia.