O lu’i lava aso uma
O le tele o suiga ua i ai nei o se tasi lea o vaega tele o lo’o ua ‘a’afia ai le tau o le soifuaga o lo’o ua i ai nei.
O lea le talitonuga o le tamā i a Ioane Su’a Vise o Tanumapua.
“O lo’o sologa lelei lava mea uma i aso uma.” O lana tala mai lea i le Fofoga o Samoa.
“Ia aepeita’i o si o tatou atunu’u o lo’o tele lava ina o tatou fa’aaogaina le lauele’ele mo mea’ai aemkaise o le ola ma le tausiga o aiga i aso ta’itasi.
“O lo’u ia iloa i ai o lo’o fa’apena lava fo’i i totonu o si o tatou atunu’u.
“O le taimi lenei ia o lo’o leai lava se aiga o lo’o finau ina ia lelei le tausia o fanau aemaise o aiga i aso uma.
Na ia fa’ailoa o le taimi lenei o lo’o ia taumafai lava i le mafai e galue mo le tausia lelei o aifa.
“Ia o a’u e i ai fo’i la’u pito i Gagaifo Lefaga, i le vaega tonu o lo’o galue ma nonofo ai.
“E leai lava se isi mea i lo tatou ola i le taimi lenei o le taumafai lava, aua e le fa’apea o le a sau fa’atagata ni manuia o se tagata.
O Ioane e to’alua lana fanau teine.
“Ia o le taimi lenei e pei o lo’o ave lava le fa’amuamua mo le tausia lelei o la’u fanau.
“Ou te iloa o so’o se matua lava o lea lava le tulaga o lo’o finau ai le taimi lenei ia mafai lea ona ola lelei o fanau aemaise lava i le itu tau a’oa’oga.
‘Ia o le taimi lenei o lo’o o’u galue i se tasi o kamupani ma e pei o le galuega o lo’o fesoasoani malosi i a te a’u le tausiga o si o’u aiga.
“I lo’u iloa i ai, ia o lea lava le tulaga o lo’o feagai ma le to’atele o nai o tatou tagata i taimi uma.
“O le taimi lenei, ia o a’u o se tamā o lo’o nofo to’atasi le taimi lenei, o le uiga o la’u tala ia e fai fe’au fa’atamā ma feau fa’atinā.
“O le taimi lenei o lo’o taumafai lava ,e pei ona ou fa’ailoa muamua atu.
O le taimi lenei o lo’o ave lana fa’amuamua i lana fanau ina ia manuia a’oa’oga.