Ua uma ona fofola mai e le atalii o Sepetaio i le amataga; “Ua pupula mai foi le malamalama i le pouliuli, ae le i talia e le pouliuli... Ua maliu mai o ia i lona lava nuu, ae le i talia o ia e ona lava tagata.”(Ioane.1:5,11).

Na fetōtōa’i le susuga Lufilufi ma faaletonu le faautautaga a Leulumoega ina ua pa’ū le malelega a le tupu, o lona atalii - fai o Tupua Fuiavailiili e sosoo ma ia i le nofoalii.

O le mafuaaga lea o le “saesaega laufa’i a Tumua.” Se i saili se gafa o le tama lea! Auā o le mau faamuagagana, ’e le mālo se moa folau. O leo ia o loo ua vāvāō ai le aai o Ierusalema!

E le sau fua le Kalilaia vivini i le aai a Tavita! O le mau a le tusitala, ua vaeluaina ai le motu o tagata ia Iesu. O le fesili, Aisea? Tali, o le lē malamalama.

O le aso mulimuli lea o le tausamiga o fale apitaga. O le aso sili foi lea ona taūa e pei o la tatou foi faa Samoa, o le “toe aso nai Moamoa.” O lona uiga, o le aso e tatau ai ona tuu lima atu se oso e fo’i ma tagata uma taitoatasi i lona nuu ma lona aiga (f.37-38).

E taūa faamanatu  nei auā e toe maua ai feiloaiga ma mafutaga ma toe faatasia ai le fanau a Aperaamo. E ui ua le i malamalama lava Iutaia, o le tama lea mai Kalilaia o ona lava tino ma aano.

O Iutaia, o tagata faumālo i le Atua. Ua manatu lava latou o le Atua, e faapitoa na o latou lava. O mea uma foi tau le Atua, e fofoa uma mai i ona tupuaga ma ona laueleele ma talitonuga.

E le oso mai la i fafo atu o Iuta ni mea a le Atua poo ni fuafuaga a le Atua. E le tupu mai foi la i Kalilaia se Keriso. Manino lelei le Tusi, e tupu mai le Keriso i le fanauga a Tavita, mai Peteleema foi, o le aai a Tavita.

Afai la o le perofeta, poo le Keriso, poo le Mesia o loo taulagi nei e se isi vaega o le motu o tagata, e mai Kalilaia, e leai la.

O manatu ia o Iutaia! E te silafia Samoa, tatou te ofo pe le fiafia foi i nisi taimi i manatu ma uiga o Iutaia, ma lo tatou le mafaufau lelei, o le olaga tonu lava foi lea o lo’o o’u fesēa’i ai ma e faavalevalea ai.

E te le fiafia pe a ou faia se galuega lelei e faaolaina ai se isi tagata. Ua tiga ia te oe ona taitai atu o ni agaga i le Alii. O le fiafia ia o Iutaia e taulagi, o latou o tagata o le Atua. A o le savali i le amiotonu ma le finagalo alofa o le Atua e fuamoa!

E faalālā le lotu i luga; a o loto ma mea latou te fai na o seoli lava le iuga. O le fesili tele lava, E afua i se ā ona faapea? O le tali faigofie lava, e le malamalama ia Iesu Keriso, o le Alo o le Atua Soifua.

Ua latou le iloa, o le tama lea, o loo tanu lona pute i Peteleema i le aai a le Tupu! Na faafailele i le aai o Nasareta, ae faa’autagata Peteleema. O tala faavae faa-suli, o le suli a o le suli. Poo fea lava e kaa ai le suli, e le aveesea e se isi lona nanamu, o ia o le suli.

Le au uso e, soia tatou te tusitusi lima poo ai ua sa’o a o ai foi ua le a’o. ’Aua tatou te fematea’i i a tatou feau ma o tatou faiva; a ia e malamalama ma tatou mautinoa lelei Lē e ana ia le galuega ma lo tatou valaauina.

O la Paulo, “e le o lē tōtō; e le o lē faasūsū; ae peitai o le Atua o Lē na te faatupuina. A o lē totō foi ma lē faasūsū; e tasi lava i la’ua, ae taitasi ma lona lava taui e maua, e tusa ma lana lava galuega.”(I Kori.3:7-8).

Manatua foi, e fua mea uma e te faia i lou iloa o le Alo o le Atua. E le tauilo pe maifea le alofa ma le faimeatonu. Maifea le agamalū ma le faapalepale, le agaga maulalo ma le loto faamagalo? O le malamalama lelei i le Alii o Iesu Keriso ma lona natura.

O lona uiga, tatou te fiu e lalafi ma taumafai e ola faafoliga, e ta’u mai lava e lau amio ma au taga le telē ma le itiiti o lou iloa ma lou malamalama i le Alo o le Atua. O ā mai la tatou? O mafai e lau amio ona faapaleni lou olaga mafuta i le Alii?

O tutusa au upu ma lou loto? O ’e faataitai i le amio ma le soifua o le Keriso o loo e laugaina? Ne i pei tatou o Iutaia; e taulagi le atunuu lotu, e faamamapo i le Atua, ae leai ma se mea e kaulia.

Ua tupu lo tatou tamaoaiga faatasi ma le olaga le popoi ma le lē mafaufau, a ua pa’ū le ola faale agaga ona o le faa’afa’afa ona molimau o le feau. A silasila i luga a’e o fuaiupu ia, o loo valaauina ai e Iesu tagata uma  -  soo se tagata.

E mălie ia te ia lou gālala. E maua ia te ia lou malamalama. E ola foi ia te ia lou agaga. E tasi le mea o loo tulimata’i ai oe e le Alii, o lou loto. Ia e malamalama. Ia talitonu lou loto, o le Keriso lava lea.(f.37,38,41).

Ona tafe mai lea o faamanuiaga ma le oloa tele o le olataga mai ia te ia e faamălieina ai oe; e faafiafia ai oe; e faasaolotoina ai oe; e faamaloloina ai oe; ma faaeaina ai oe i le ola fou.

Samoa e, e le ‘alofia lou aiga e faafitauli masani o le olaga. E fai pea le ‘oa a le lalolagi, ma ona tuinanauga eseese ma faalavelave ia te oe. O le sekone lava e tasi e faasesēina ai oe e le tiapolo.

E malepe ai la oulua feagaiga. E ta’ape ai fanau ma aiga. E faaletonu ai lou taumafai. E fevaevaea’i ai nuu; fematea’i ai galuega fai. E i’u i taua ma misa. Aisea? Ua e le malamalama i le Keriso.

Auā foi o lo tatou iloa e ioe nei ae leai nanei. E talia i le asō ae teena taeao. Feiiloai nei o ‘suli’; ae taeaoa’ena ua ‘fuli’. E taulagi lou moa fanua, ae e te le o malamalama lelei i le Alii lou Atua.

O iinā e ala ai ona vevesi. O iinā tonu lava foi e sao mai ai faafitauli. A o lē tumau lona talitonuga i lona iloa lelei o le Alii, e faaolaina lava ia(Mata.24:13). Poo a lava faigata ma faafitauli e foli mai, e le gāsē vale.

E le fitivale. Auā foi ua talitonu, o lona Alii, o le Alo lava ia o le Atua Soifua. O le vai ola ia ua saunia e le Atua mo tagata uma(Isaia.44:3). 

Samoa e, e le mafai ona tupu mai i lou loto se mea lelei pe a le talitonu lelei i le Atua. E le faapea foi a lolotu tele tatou ma mau tofi i le ekalesia o se faailoga lena o lou malamalama lelei ma talitonu i le Atua!

Fai mai le isi toeaina, E sala sala ā! Ioe, o upu masani a failauga o le atunuu, o si o ta lima lava e pa’ia ai si o ta mata. Manatua le tagi auēuē a le fafine o Salemuliaga ina ua fasia Fatuaiupolu e ona lava tino ma aano?

‘E! Fatuaiupolu e, si a’u tama pele e, ua fasia lava oe...a o fea Tuatō ma Tolovaa? O fea Togia’i ma Faala’a? Fea oe Leuu ma Sealiimalietoa? A o fea o iai Tevaga ma Vaifale?’ Aisea? Le malamalama! Taulagi e Iutaia lo latou Mesia, a o Iutaia lava na fasia.

E le o faamauina se tagi tautala a Maria, a o le Mesia – “Lo’u Atua e, aiseā...?”(Mare.15:34). Le malamalama. A ’e malamalama, ona malamalama foi lea o le isi tagata o loo sili ona latalata ia te oe. Ona faasaoina foi lea o nisi agaga o loo i fafo pea i le tā’aga.

La lea ua talia e nuu ese Iesu o le perofeta. O le toatele foi o e sa i le tausamiga ua latou ta’utino o Iesu lava o le Keriso(f.40,41). A o oe, se a lau molimau? E te talitonu, o le tama lea, o le tama lava o le eleele, ua inu ai le lalolagi uma ma faaolaina ai le toatele? E te talitonu o le Keriso lea na foaiina mai e le Atua e tatala noataga o lou olaga? O ’e molimauina atu i nisi tagata le faamaoni o le Atua ia te oe ma lou aiga e ala ia Iesu Keriso?

Aiga e, ma uo, e le Saumaniafaese le Alii. O le suli tupolata. O ou ivi ma o’u toto. Ae sa fai ma moa folau, ina ia matala i tua lau molimau. Ia fai lau mau ma maopoopoga o aiga ma fanau. Molimau i le ‘Moni’ e faaolaina ai tagata uma. O le Moni, o le Keriso lava lenei. E le ia te ia se pouliuli, a o le malamalama. E le o ia te ia se fevaevaea’i, a o le fealofani ma le ola fetausia’i. O le Alii ia o le leleiga. E malamalama ai oe ma lou aiga. Po ua e talitonu ea ma talia Iesu Keriso i lou loto, o le Alo ia o le Atua Soifua? 

 Amene

Petaia Setu

7737063/7783782