Galue matua mo le lumana’i o fanau

By Fetalai Tuilulu’u 24 February 2017, 12:00AM

O le Le’emo Tifaga o se tama 38 tausaga le matua mai le afioaga o Letogo o lo’o faigaluega nei i se ulugali’i Vaitele i le faiga o le elei. 

Na maua le fa’atalatalanoaga ma le Fofoga o Samoa o lo’o aga’i atu i lana galuega le taeao le aso ananafi.

O lona manatu fa’alia o le tofi lava o le matua o le tausi aiga ma galuega malosi aua se manuia o fanau. 

“O la’u galuega e le’o se galuega faigofie, aua ua tele foi na su’e galuega i le taulaga e lei maua lava se laki ae fa’afetai ua maua si lea galuega e tausi ai si o’u aiga.

“O le tele foi o galuega i le taulaga e manaomia lava le fasi pepa e iloa ai sa aoga lelei peitai o lo’u nei tagata e lei i’u le aoga e fai loa le aiga ma le fanau.

Sa taua e Le’emo o le elei a le ulugali’i lea o lo’o faigaluega ai e fa’atau i atunu’u i fafo ae le gata foi i lea o uo mamae i le taulaga.

“I lana tupe maua e $170 i le vaiaso ma nai taua e lava ma totoe lelei mo le fa’asoa i aoga i si ana fanau. 

E taua foi e le tama le tele o taimi e alu i lana galuega ae galo ai le fanau ae peitai e malamalama lava le fanua o le galuega o lo’o maua ai le seleni.

“O le tele o taimi e ova ai i le galuega ma i’u ai lava le toa o’o le fale pe a o’o le aso to’onai, ae ui i lea o le galuega lava maua ai le tupe.

Sa fesiligia i ni fa’afitauli sa tali, o lea lava e tele lava fa’afitauli o lo’o feagai ma ia i le feagai ai ma galuega.

“Ia silafia foi e tele lava fa’afitauli ae tasi a le tali o le lē galuega ma le finaua’i.

“O la’u galuega e faigata tele ona e tatau lava na ova atu ma le 50 ie e elei i le aso e tasi e oo ail ava ina ova i le po atoa ona o le galuega. 

“Ou te le faitio ai aua so’o se galuega e tau kamupani e su’e lava le tupe mama aua le galuega e le pei o galuega a le mālo e fa’atulaga lava le taimi e amata ai ma uma ai. 

O le naunautaiga o le tama ia Le’emo ona o le taugata le soifuaga e sili lava ia ia le fai lelei o lana galuega ma fa’amaoni ai aua ua ona iloa lelei le faiagata na toe maua ni avanoa faigaluega i lenei vaitau. 

By Fetalai Tuilulu’u 24 February 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>