O le naunautaiga lea o le taule’ale’a o Primo Tamasese, 18-tausaga le matua mai Ululoloa ma Susega.

O lo’o faigaluega nei i le Koluse Mumu. O le lona tolu o le fanau e toaono a ona matua.

“Ou te fiafia e fesoasoani i soo se tagata,  o le ala foi lea ua ou faigaluega ai I le Koluse Mumu” o lana tala lea I le Fofoga o Samoa I le aso ananafi.

O lo’o nonofo nei ma lona aiga i Ululoloa ma Siusega, o ona matua ma matua o lona tina, ma e silia ma le lua sefulu tagata o lo’o nonofo nei i le aiga o Primo.

“E faigata le tausiga o le matou aiga, aua ape a fua atu i le toatele, e tele mea e moomia , o le itu i tupe mo faalavelave aemaise o ma fai i totonu o le aiga ma le nuu aemaise le ekalesia.

Ae mo Primo ma ona matua ma lona ia aiga , o I laua ma lona tama o lo’o feagai ma le tausiga o lona aiga i le itu tau tupe.

“O le ala foi lea ua ou faigaluega ai ona o lo’u fia fesoasoani I lo’u tama aua matou mea fai ma tamaiti aoga.

O le faamoemoe o lenei talavou, o lo’o faatali a latou pepa Malaga mo Ausetalia e saili manuia ai mo ia ma lona aiga aemaise sona ia lumanai manuia.

“Out e naunau ina ia faauma lelei la’u aoga, ina ia maua ai sa’u galuega lelei e tautua ai i nai o’u matua aemaise lo’u aiga.

Ua ia maitauina foi le taugata o le soifuaga, pe a faatusatusa atu iai i lenei olaga ma le tau o mea ua maua;

“A palasi mai i le matou aiga, fa’I o le toatele, ae o mea e fai foi latou.

I le olaga talavou o Primo ua iai lona manaoga, ina ia galue malosi mo ona matua aemaise ai o lona ola tuputupa’e, ina ia ona iloa ai foi ona atia’e lona ia lumanai.

O lana foi lea feau taua mo tagata lautele ua le gata na’o tupulaga talavou ae mo tagata matutua uma;

“Aua tatou te faamomoe ma faalagolago i isi tagata e omai e fai o tatou aiga, faaaoga tatau le malosi ma ia aoga lou malosi mo nai ou matua aemaise o lou oe ia lumanai pe oo ina fai lou aiga ma lau fanau.