Lauga - “Ia ola faapaiaina”

Tusia Rev. Petaia Setu ,

103 Hits

Rev. Petaia Setu

Rev. Petaia Setu

(2 Korinito 6:14-18)

Ua tatou iloa a uō le gaoi ma le lē gaoi e i’u lava ina gaoi atu ai ma le lē gaoi. Poo le a lava lou lelei e maua loa oe i taaga, ona e aafia loa foi lea i leaga o le olaga. O le tagi a le aposetolo o Paulo i le au faatuatua o i Korinito, ’Aua tou te amo faalegatasi ma ē le talitonu, a ia outou vavae ese mai nai ia te i latou.

O le ola faapaiaina, o le olaga lea o loo pulunaunauina ai e le aposetolo le au faatuatua ia soifua ai ma tumau ai e tusa ma le finaglao o le Atua. O se mea ua paia, o lona uiga ua ‘sa’. O le ‘sa’ i le faa Samoa, o lona uiga ua ‘tapu’. Ua iai lona faaeteetega i mea uma. Ua faapitoa sona faamoemoe. A o le autu o sea faamoemoe, ia ola. Ola mamā, e le pōnā. Ola tausaafia, e amana’ia ma alofagia. Ua faapea le manatu o Paulo i le ola faapaiaina. O le olaga ua ta vavae ese mai i le olaga tuai. Ua aveesea ma ii se siosiomaga ua filogia ma na pulepule solo i mamanu a le lalolagi. O le faasaoina mai i se siomiaga ua nanamu i le oti. Faapei ona valaau ai le Atua ia Aperamo e alu ese mai le agasala. 

E ui o lona tamā ma lona aiga, peitai  e le tutusa loto. Fai mai le aposetolo, ‘Aua le amo faalegatasi ma e ua leaga. Alu ese mai ai. ‘Aua le faauō i le tagata lē alofa. ‘Aua le pipii  i le tagata amio leaga. Afai e le paleni lelei lau amo, o lona uiga a le to’ulu ma masaa uma i lalo, pe e te matuā tigaina ai lava. E faapena ona inosia ma tauvalea; falepuipui pe falemai ai oe pe ’a ’e pipii i kama sesē na. O la Ieremia le perofeta a le Atua i tagata o lona nuu, Inā sosola ia outou ai totonu o Papelonia, ia taitasi ma faasaoina lona ola; ’aua ne’i fano outou i lana agasala (Ieremia. 51:6). Fai mai foi Ioane le atalii o Sepetaio, ua faalogo i le leo mai le lagi ua faapea mai, Lo’u nuu e, ia outou o ese ia te ia, ina ne’i faatasia outou i ana agasala, ina ne’i tofusia foi outou i ona mala (Faaaliga. 18:4) O le toilalo ma le malaia o Papelonia, o loo ua valaauina ai le nuu o le Atua ia o ese ne’i pisia ane ai i le agasala a Papelonia.

Ua toe tulaga lelei mai le ekalesia i Korinito. Toatele ua talia ma ua malamalama i le uluai tusi atu iai a le aposetolo. Peitai ua tatou iloa, poo fea lava o iai lelei, e faavāvā atu ai lava leaga ma ana mailei. Ia o ai foi, o a’oa’o lava ma faifeau o le lotu Iutaia. E iloa le Atua i le tulafono, ae misi atoa i le loto. E faamamapo le lotu, ae le malamalama ma ola le talitonu. Le manatu la lea e mafi ai tele la tatou faamamapo! Ua manatu ane lava ua matua selau pasene le sa’o o ana tulafono faaopoopo ma pulega faaletagata o loo fetosoaiina faapa’utolo a loi ai le nuu, le ekalesia, ma le atunuu! O le tau-mumusu a le isi toeaina Faasalelega i lana fanau, ‘Sh, makapoko, vaai maka ma sesi i lavea!’

Samoa, o gafea o Korinito o loo e iai, o fafo poo totonu? O ’e faakerisiano poo e faaIutaia? O loo naunau mai le Atua ia te oe i se olaga mamā ma se olaga ua vavae ese mai i le leaga. Ua finagalo le Atua e vavae ese mai oe mai ia i latou o loo fiafia pea i le lalolagi ma ua le faamaoni o latou loto i le Atua. O le amo faalegatasi, o le faifai mea faatasi ma Satani. O lou milo atu ai ma oe i leaga o le lalolagi. Auā pe faapefea ona faatasi o le amiotonu ma le amioleaga? Pe faapefea ona mafuta o le malamalama ma le pouliuli? E le mafai ona loto faatasi Keriso ma Pelialo (o le upu Eperu e ta’u ai ituaiga tagata ulavavale, faatuputupu leaga, malepe ai aiga, nuu ma faalapotopotoga, mf). E faapefea ona loto faatasi o outou ma tupua ua leai ni ola o iai? ’Aua ne’i faaseseina i tatou i le suamalie o upu ma le feilafi mai o fafo! Ua le o le malū o le tai taeao e seetia ai sou finagalo; a o le faautauta ma taula i le ola tatalo. Ia manatua, e le alofia i tatou e leaga. Ae le o tuua foi fautuaga faa-tamā a le aposetolo, ’Aua le faatoilaloina oe i le leaga, a ia ’e faatoilaloina le leaga i le lelei (Roma. 12:21).

E faapefea ona faapaiaina lou tagata lotu? Poo e malamalama i le uiga ma le natura paia lea o le Atua? Pe e te le i au silafia ea o loo saili mai le Atua ia te oe i le amio Atua? Le loto paia ma le amio paia e pei ona faamanatu atu pea i vaiaso taitasi? Le loto ua faasāina mo le Alii. Le amio ua uma ona tapui mo le Atua.

Ua fia ni ulugalii femisaa’i i le amo faalegatasi? A ua atu fia ona fefaamasinoa’i i le amo faaimamago? Mai fea ona tupu pea o ia vaivaiga? Ona ua pisipisia pea lou olaga i ou manaoga faaletagata. Le au uso e, o le amio Atua o le ola faapaiaina. (Levi. 19:2). A o le olaga faapaiaina, o le ola ua pulea atoatoa e le Atua. ua taitaiina e le Agaga o le Atua soifua. O le ola ua oloa luuluu i faamanuiâga ma meaalofa a le Agaga (Kala. 5:22-23). E leai se mea e tasi e mativa ai le Atua. Ioe, auā o ’i tonu lava lea o loo satia ai lou faasāina. E te lotu, ae e te gamble! E faamamapo lou kerisiano, ae faamamafa i le lalolagi lau amo! E feamoa’i le tofi, a o le agaga e matuā oti! E faalālā i luma le ekalesia, a o se faaleleiga ma se loto faamagalo e le talia. E faapefea la ona faapaleni le amo?

Samoa pele e, vaai i le maopoopoga. Saili i le saolotoga, ma tumau ai i le ola. O le ola lena o Paulo i le galuega. O lona onosai ma lona faamaoni sa faamatalaina lona faasāina mo le Atua. Ua vavaeeseina mai i ona tulaga faafaresaio ma talitonuga o le lotu Iutaia ina ia faaolaina i le amio Atua. O la le perofeta o Isaia, o ese ia, ina o ese outou, ia outou o atu nai lea mea; ‘aua ne’i pa’i atu i se mea leaga (Isaia. 52:11).

Ua le finagalo le Atua e filogia lo tatou ola i otaota o lenei lalolagi. Ae pei ona paia o ia na valaauina outou, ia faapea foi outou ona paia i a outou amio uma (I Pet. 1:15). O le finau a Paulo, ia e alu ese mai le leaga, auā e le faaolaina ai oe. ’Aua foi tou te papa’i atu i se mea leaga. Tou te silafia la lona taunuuga manaia, e le gata ina talia ai i tatou e le Alii, ae o le a ta’u ataliiina ai ma afafine i tatou o le Alii lo tatou Atua. Maifea ia faamanuiaga? O le ola faapaiaina. Faasaga nei loa le la o lou vaa ia Iesu, ma avea o ia e fai ma atoaga o lou ola faapaiaina.

 

Amene

7737063/7783782

E-mail: petaiasetu@gmail.com

© Samoa Observer 2016

Developed by Samoa Observer in Apia