O FAGAFAU I SAVAII - Mai le Tusi o le “Suaga a le Vaatele”

23 July 2016, 12:00AM

O iinei o loo i ai se mato tele i luga o le sami ua faaigoaina o le “Liumai’a.” Fai mai le Talatuu a le nuu- sa nofotane se tama’ita’i o Vaitogi Tutuila i se alii Fagafau-ona maua ai lea o le la tama.

Na muamua maliu le toeaina-ona nonofo ai lava lea o le olomatua ma lana tama i le aiga o le toeaina i Fagafau. O loo mafai lava ona vaaia pea le tulagā-fale o le toeaina ma le olomatua i aso nei- e latalata i le mato. Fai mai sa oge tele le nuu-ona amata loa lea ona le tausia  e le aiga si olomatua ma lana tama.

Ua tauaso foi si olomatua ma ua le amana’ia e le aiga. Ua tula’i mai nei se oge tele i le nuu ma ua faigata ona maua ni mea’ai i aso ta’itasi. Ua tau le fafagaina foi si olomatua ma si ana tama. 

O aso uma e lagona ai e si olomatua le pisapisao o le aiga i le gasesega o taumafa-peitai- e na o le sasala lava o le suavai susu’e-e sogi i ai -ae leai lava se mea’ai e avane i si olomatua.

O le tulaga masani lea o aso uma lava.Ua tupu le ita o le olomatua-ma o se lagona e le mafai e se tasi ona onosa’ia. Ua o’o i le tasi aso- ona ave lea e le olomatua o lana tama ma aga’i atu i le mato i luga o le sami.

Ua la taunuu i lea mea- ona aapa atu lea o le olomatua ua fusi i lana tama ma tulioso loa i lalo. Fai mai le mau a Fagafau-o lea olomatua ma lana tama na liua e avea ma “malie ma le laumei”-ma e mafai lava ona manu a’e i luga-pe a valaau i ai tagata o le latou nuuu.

O le faamatalaga a le ‘au-matutua fai mai –a fia matamata tagata o le nuu i le laumei ma le malie-ona usu lea o se pese. Sa faaalia foi- ua vaaia soo lava lea laumei ma le malie i Vaitogi Tutuila-ona o le mana’o lava o le olomatua-e ave lana tama i lona aiga-peitai-e vaaia foi i Fagafau i le taimi lava e usu ai le pese.

E tai tutusa le talatuu a Fagafau e pei ona faaalia i luga ma le tala a Vaitogi i Tutuila. Fai mai o se ulugalii talavou sa nonofo i Savaii-o Fonuea le igoa o le fafine ae le o iloa le igoa o le tamaloa.

Ina ua o’o le faasologa o aso o Malietoa i le tane a Fonuea, sa sosola loa i Tutuila-ma nonofo ma le alii o Letuli i le Tualā-uta. Sa agalelei i ai lenei alii ona nonofo ai lava lea o le ulugalii.

Ua o’o i le tasi aso, ua manatu i la’ua-ua tele na’ua le alofa o Letuli-ae leai se mea la te mafaia ona taui ai. Ona la o ane lea i le tasi aso ina ua tonu i o la loto-o le a feosofi i le sami i Vaitogi lava-ma liua ai Fonuea i le laumei ae liua lana tane e avea ma malie. Fai mai e faalogo mai loa le laumeni ma le malie o ta’u atu le igoa o Letuli-ona o ane lea i luga ma faailoa mai.

O lea la na fatu ai loa e tagata o Vaitogi le pese i le laumei ma le malie. O le pese lenei e usu e tamaiti o Vaitogi-ona faaopeope mai lea o le launei ma le malie.

O upu la nei o lea Pese:- Fonuea, Fonuea-Laulau mai se manamea-Poo Sa o i luga nei-Sa Letuli o i luga nei-A uaina, a uaina-A solo e mata’ina-Lou galu tu la le I’a-Lalelei, Lalelei-Lalelei!

23 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>