O le Aso Faraile talu ai na talimalo ai le Amepasa o le Malo o Amerika i Samoa nei, mo se aso fa’amanatu fiafia mo fanau o lo’o tausia e le To’omaga mo e Puapuagatia. O lea fa’aaloalo maualuga sa faia lava i le Maota o le Amepasa Amerika i Vailima. 

Sa ‘auai lana afioga, le tama’ita’i Amepasa o Angelina Wilkinson, o lona aiga ma le ‘aufaigaluega sa fiafia fa’atasi ai ma ‘aufaigaluega fesoasoani fa’apea le ‘aufaigaluega a le Vaega o le To’omaga Mo E Puapuagatia. 

O lea fa’aaloalo, o aga-masani lava ia a le Ofisa o le Amepasa o Amerika, e fa’asoa fa’atasi ai le agaga o le Eseta ma fanau ua puapuagatia ona o sauaga ‘ese’ese ma o lo’o i lalo nei o le va’aiga a le Vaega o To’omaga.

Tele ta’aloga ‘ese’ese ma fa’afiafiaga sa ‘auai ai fanau nie, e aofia ai le valiina o ata o le Eseta, o le tu’u-fa’atasia o ata ma isi mea fai-tino, o le fausia o ‘ato-mea’ai fa’apea le tele o ta’aloga. 

Sa ta’amilo solo le Tama’ita’i Amepasa e fesoasoani ma fa’atonutonu fanau nei ma ‘auai fo’i i ta’aloga sa fa’atino e tamaiti.

Mo nai fanau nei – e fa’asiasia ma le fiafia i le tele o taimi ona o sauaga ma a’afiaga na latou feagai totonu o aiga, o le Aso Faraile talu ai, o se tasi o aso sa matua fiafia ai i le tele o ta’aloga ma isi fa’atinoga sa faia, ua pei ai o isi fanau masani.

‘Ese le mata’ina o le taliē-fiafia, le mafanafana o le alofai le mafuta fa’atasi ma fealofani a’o taumafai le Tama’ita’i Amepasa, lona aiga ma le ‘Aufaigaluega e fa’asoa fa’atasi le agaga o le Eseta ma nai fanau puapuagatia. 

E latatala i le 50 tamaiti sa ‘auai i lea fa’amoemoe e tolu itula le ‘umi ae na taualuga mea ‘uma i le sa’iliga o Fuamoa o le Eseta.

A’o alo atu le lalolagi e fa’amanatu le maliu ma le toetu mai o lo tatou Fa’aola o Iesu Keriso, fa’amolemole ia manatua ane nai fanau nei e i le A’ai o le Fa’amoemoe, i a tou talosaga. 

Na matua fa’afiafiaina lava le Peresetene o le Vaega a le To’omaga, o Siliniu Lina Chang ona o lea fa’aaloalo maualuga mo nai fanau.

“Lau Afioga a le Tama’ita’i Amepasa, Angelina Wilkinson, le Aiga ma le ‘Aufaigaluega, ‘ou te fa’afetai tele atu ona o le agalelei e fa’asoa ai le agaga o le Eseta ma fanau nei i le Nofoaga o le Fa’amoemoe,” o lana fa’afetai lea.

“O lo’o outou fa’aauau pea lenei fa’aaloalo masani na foafoa mai e isi Amepasa muamua, aua fanau i le taimi lenei o le Eseta. Fa’afetai, Fa’afetai, Fa’afetai tele lava!”