E i ai lo matou sao - Filoi

By Ilia L Likou 22 October 2017, 12:00AM

O matafaioi o i latou o lo’o nonofo i aiga e fai le faiva o tapuaiga ma tiute aua lava le atina’eina o aiga – e le faigofie.

O lea le talitonuga o Filoi Pesamino i le fa’atalatalanoaga ma le Fofoga o Samoa i le aso ananafi.

O Filoi e to’atasi le alo ma lona to’alua.

“O le mea moni lava ma le mautinoa e to’atele i latou o lo’o fa’apea mai e faigofie ae a o a’u lava ia e le faigofie aua e tele feau ma galuega e fa’atino.”

“O se itu e ao lava ona o tatou malamalama i ai, ae e pei o matou e o le aufaigaluega e galulue ae pei o matou e nonofo i aiga e pau  ai le tele o le mau tiute mai lea aso i lea aso.”

“E pei la o le onomea lava o i latou e nonofo i aiga, o e malolosi, aua o lo’u iloa i ai o le fa’aaoga tatau lava o le malosi o le itu pito sili lea ona taua.”

O lea fa’atalatalanoaga na ia fa’ailoa ai le tele o tiute tauave o lo’o ua feagai ai nei.

“Ia e pei o lea lava le tulaga o lo’o feagai ma le tele o le au nofo fale aua e fai o tamaiti, o le va’aia o nai matua matutua ae o le tele lava o feau mai lea aso i lea aso.”

“I lo’u iloa i ai , a tu’u lava i ai le malosi ia ma le fa’amoemoe lava i le Atua e manuia ai fo’i taumafaiga uma o lo’o o tatou va’ava’ai atu ai.”

“O se itu e le fa’apea fo’i na o le au nofo fale e faia le mau feau, e tatau fo’i le au galulue ona omai ma va’avaai mai ia e le faigofie lava le tulaga e pei ona ua i ai nei.”

Na ia ta’ua o le mamafa lava o feau o aiga e mafuli lava i nai tinā.

“Ia e pei o lea le tulaga o lo’o i ai le taimi lenei, ma o se itu lelei tele lea e ao ona silafia fo’i e le fa’apea na o le nonofo le fale o le au nofo fale ae leai ni galuega olo’o fa’atinoina.”

“Ae o lo’o sologa lelei lava mea uma.”

By Ilia L Likou 22 October 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>