Galulue faatasi ma aiga

By Aruna Lolani 22 July 2017, 12:00AM

Pe e te mau’oa pe e te mativa, e tatau lava ona e faalagolago lava oe ia te oe.

O le talitonuga lena a Vaitimu Levika mai Afega ma Tuanai. 

E 46 le matua o lona soifua ma e toaono lana fanau, ae toalua ua faigaluega.

“O le taimi nei, o loo matou feinu mai le vai a le matou tuaoi aua foi e leai se matou vai faapena foi se eletise, o le taimi nei o loo faaaoga le moli sela.

Sa taua e Vaitimu, o ia sa ulaula ma inu ile taimi muamua ae ua taofia ona o lona silafia, o le tasi lena o seleni maimau ma o loo taumafai o ia e sefe aua se suavai ma le eletise.

“O le vaitaimi nei ua le toe taugofie le soifuaga, e oo lava i tiapula ua le toe taugofie ae tau sue lava se seleni e faatau ai ni tiapula e toto. 

“O au ia ou te le fia faamoemoe i isi tagata e tausi mai au ma lou aiga.

“Ou te manao a au ia ou te ola, tagi ma taele i galuega a ou lava lima.

“Ma o le mafuaaga foi lena o loo matou galulue faatasi ai ma le tina ole aiga faapea le fanau aua se lelei o le matou aiga.”

Sa taua e Vaitimu o lo’o taumafai lava o ia e atia’e lona faatoaga o loo iai nei aua o le taimi muamua sa faaleagaina ai e le lolovaia lana toga kapisi.

“O se itu a lena sa ou talosagaina ai se fesoasoani mai le malo aua le tosoina o se paipa e alu ai totonu le lolovaia pea timu. 

“Na ou manao lava i lea fesoasoani aua au meatoto aemaise lava lau toga kapisi ae o lea ua faaleagaina uma. 

“Ua fiu a ou te fai ile malo ae lea e oo mai le taimi nei e leai ma se fesoasoani.

“O mea uma ia o loo maua mai ai le seleni aua le tausiga o le aiga ae e tusa lava poo lea le lelei, e timuga loa, e leai ma se mea e toe aoga.”

By Aruna Lolani 22 July 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>