O LE POGAI O LE PUPǕ UA FAAIGOAINA O LE ‘ALOFA’AGA I TAGA-SAVAII-

22 July 2016, 12:00AM

Mai le Tusi o le “Suaga a le Vaatele”-Faaauau mai Ananafi.

I se tasi faaupuga-e fesoota’i fale uma ma ‘olo i ala savali e fausia i pa –ma’a maualuluga. O soo se ‘olo foi --afai e te tu ai i luga, e maualalo aoa tetele o loo tutupu ai.

E matua maualuga lava ‘olo o le nuu. O nisi ‘olo sa matou maua- o loo saogalemu le tele o ona vaega se’ia vagana ai nai vaega iti ua faaleagaina ona o la’au ua mafulifuli i ai. Sa le’i faigofie ona saili lenei nuu i le taimi na matou faatoa taunuu ai-talu ai-o lea faato’a mavae atu afā tetele na aafia ai le atunuu atoa.

Sa logo mai- e fai lava sina lavelave o le ala. Sa matou finau pea atonu lava e mafai ona sailia se isi auala- e mafai ai ona matou o’o i Fagaloa. Sa matou ala usu i le taeao lava ona ua matou iloa ai lea- e le faigofie ona toe saili lenei nuu tuai.

O le aumaga atoa a le nuu sa auai faatasi ma matou i le tau sailia o le nuu.Sa matou uia le ala taavale ua fausia i totonu o lenei ogaeleele. O se auala mamao tele e tau lava i le sami, peita’i sa matou afe i tua ina ua te’a le auala -ma amata ai loa ona fai le sailiga.

E pei ona ta’ua i luga, o lenei vaega-eleele ua ufitia atoa e le vaomatua. E le o iloa foi le taimi tonu na tuua ai e i latou sa nofoia lea nuu poo lenei nofoaga-ae o le a fo’i le mafuaga. Sa taumafai foi e saili poo ai ni suafa matai o Fagaloa ae poo fea fo’i le nuu o fainuu ai i nei aso-ina ia tau saili ai se tala mautu e uiga i lea nuu.

Fai mai le mau a Taga-na pogai ona tuua e tagata Fagaloa-ona o le afaina so’o i mauga-mu. Fai mai foi nisi- na mafua ona sosola tagata o Fagaloa-ona o le lamatia i osofaiga a tagata Toga-ia e masani ona folau ane -faamalosi tama’ita’i o lea nuu-ae ave faa-pagota isi. Sa faailoa mai fo’i- o nisi o suafa matai o Fagaloa o loo fainuu nei i Papa Puleia-a’o le toatele- ua le iloa poo fea o i ai.

Peitai-o le taofi lava ia o le Tusitala-afai o le itumalo lenei na soifua mai ai le tama’ita’i o Maupenei-lea na usu i ai le Tuitoga, e le taumate na mafua ona sa’i le tama’ita’i-ona na malaga i Toga o manaia lona nuu poo lona itumalo-ae fo’i mai ua Tai-pupū.

Atonu la -o le aafia so’o o lenei vaega-eleele i Mauga-mu-na pogai ai ona tai pupū, ma sosola ese ai tagata o Fagaloa- ae tuua le nuu e pei ona lilofia i aso nei i le vaomatua.

Sa ta’ua muamua o le nuu lenei o Fagaloa-e faafeagai i uta ma Lata. E tele ni mea anamua e pei o to’i-ma’a sa maua ma o loo maua pea i lenei nofoaga.

E le taumate foi- o loo tele pea ni mea faale-aganuu o loo tanumia i lenei eleele. Peitai-o Lata lava ia e faapea se talitonuga- o iinei le nofoaga sa i ai le falevaa o Lata-sa fausia ai le tele o ona vaa-ia sa folau atu ai i aso ua mavae i isi atumotu o le Pasefika. O iinei foi e faapea- na i ai le laau- sa fau ai lona vaa o le “Pualele” lea na ia tuliloa ai le tagata na fasiotia lona tamā.

E tumu foi le eleele lenei o Lata- i maupu’epu’e ma ‘atu-tia’- ia e mafai ona avea ma molimau ola i mea uma sa tutupu ai. O Fagaloa e pei ona ta’ua i luga-o le vaomatua atoa e tau lava i le sami-ma e aofia ai ma le vaega-eleele o loo i ai le “Pupū o Alofa’aga”.

FAI’A’AI-O le “Pa i Fualaga” e pei ona ta’ua so’o e failauga-o loo totoe ai nei na o ni ma’a paepae solo. O le Pa i Fualaga- lea na finagalo Nafanua a pa’ia-ona ‘Sua lea o le Tuli’-aua le Alii o Aiga. O le taua lenei ua faaigoaina-“O le Taua o le “A’ea o Sasa’e” ma le “A’ea o Sisifo”-ma o le Alii o Aiga-o ‘Sealiitu.’

Fai mai le Tala o le vaega-eleele lenei- na lelea ai le tiputa o Nafanua-ona faatoa iloa ai lea-o ia o le Tama’ita’i. O le ala lea o le faaigoa o lea eleele o le “Malae o le Ma.” Fai mai Talatuu-e leai se tasi o ‘Autau na ia iloa muamua- o Nafanua o se tama’ita’i. E tumu lenei eleele i igoa e pogai mai lenei Taua.

 

22 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>