Lauga - ‘O outou o le tusi a Keriso’

Tusia Rev. Petaia Setu ,

356 Hits

Rev. Petaia Setu

Rev. Petaia Setu

‘Ua vivii e le tulī ona vae!’ O muagagana ia a le atunuu i le tagata lotovii. O manatu foi ma lagona ia o loo taa i le fili. ‘O ai Paulo? E iai ni ona faailoga? O a ni ona agavaa? E le o ia o se aposetolo! E iai sona tusi?’ Auā foi o le toatele o a’oa’o ma faiaoga Iutaia o le tulafono e feoai ma tauave o latou tusi, e iloa ai o tagata o le tulafono; e agavaa i le tulafono. O Paulo o le a’oa’o tulafono. Ae fai mai a ia, “ O otaota mea uma na ina ua ou maua Keriso” E aumā tusi? E sili a’e na vaitusi i le Agaga o le Atua Soifua? E faatusalia na papa maa i papa aano o le loto? “ O outou o le tusi a Keriso…. e le i tusia i le vaitusi, a o le Agaga o le Atua Soifua; ua le tusia i le papatusi maa, a o papatusi aano o le loto”. 

E le i faatauvaa i le aposetolo le mataupu ua fetosoa’iina ai le ekalesia, i manatu sesē, ua lolofi mai i totonu. E ui ua foi atu Tito ma se tala fiafia ia Paulo ua toatele lava ua toe mau manatu ma malamalama i le  moni sa totōina ai e le aposetolo le fatu, peitai, ua manatu lava le toeaina e tatau pea lava ona ave sana faafetai, ma se i toe mafolafola ai nai manumi ia sa ta’ua mai i le Ekalesia.

Ua ta’uleaga Paulo e a’oa’o sesē. O la latou mau, o Paulo o se tagata e faafoliga ae le alofa; e faamaualuga ma loto fefete; e le faaaloalo i luma o tagata ma ‘e le agavaa foi o se faifeau a Iesu Keriso. E tatau ona iai ni faamaoniga o lona faatagaina i lea molimau ua ia talaiina, poo se tusi foi e fai ma faamau faailoga o lana galuega folafola. O lona uiga, e manaomia se tusi molimau mai i le au aposetolo poo soo o Iesu, e faamatalaina ai le olaga o Paulo ma le uiga o le tagata o loo ia molimauina. O upu masani a failauga o le atunuu, ‘ E le tau laeiina le maa osofia. E le tau sufiina foi le toga e lelei’ E faamatala lava e le aulelei lona lelei! E tautala foi le anoa i lona atoatoa. Ua tupu le Ekalesia i Korinito. Ua liliuina le toatele ma ua fanaufouina tagata i le Alii. Ua suia le pouliuli i le malamalama. Ua vaaia le amio pulea ma le agalelei o tagata. Se a la e manaomia ai se tusi faamaonia? E toe tau su’e i fea na molimau? Ae mea ane, ua fou le olaga? Ua lelei le amio?

Samoa, o le faavae lea o le lauga a Iesu i luga o le mauga, o le amio. (Mat.5:48). O le amio Atua, o le loto paia lea ma le amio paia. O le amio paia o le amio e matua tatau i le Atua atoa foi ma tagata e tusa ma le Afioga Paia a le Atua (Lev.19:2; 1 Pet.1:16). O le ata tonu lea o le tusi a Keriso na saunia e le aposetolo o Paulo. O foliga paia ia o le ola fou ua vaaia i lea itulagi.

O le aai ua sili ona aulelei Korinito i ia onapo. E pisi tele foi ona taulaga ma tumutumu i fefaatauaiga. A o se aai foi sa logologoa i fefinauaiga i le poto ma le tele o le mau tapuaiga eseese. Ao totonu o lea tumutumu ma le pisi, na lolomi ai e Paulo le tusi na mamanu i foliga o Keriso, ma ua faitauina e tagata eseese o Iutaia atoa foi na nuu ese. E sefuluvalu masina na tapena ai e Paulo le tusi nei. Na taumafai le fili e sasae ese lea tusi ma Korinito. Peitai, e osofia le maa; e lelei le toga; e tupu pea lava le Atua. Viia le Atua! O le upu a Kamalielu o le tasi o faiaoga o le tulafono, ‘Tuu pea ia te i latou; auā afai ua tupu mai tagata lena sauniga ma lena galuega, e faaumatia ia; ae afai ua tupu mai le Atua, tou te le mafai ona faaumatia; ina ne i iloa ua outou fai taua i le Atua lava’ (Galuega.5:38-39). O le upu a Paulo i le ekalesia, ‘O outou o le tusi a Keriso’. A o la Ioane i ona soo, ‘E ao ina tupu pea o ia’ (Ioa 3:30) Ioe, e fiu le tiapolo e tau valivali i foliga o le lalolagi (Kalatia.5:19-21), e iloga lava le tusi a Keriso i le amio Atua ma le amio paia (Kalatia.5:22-26). Ioe, ua iloga lava le tamālii i lana aga faatamālii. E lē siligia foi le tausala i lana tiu! Ae faapefea le fanau a le Atua? E iloa i le peleue ma le fusiua, poo le toaga i le lotu ma le telē o le taulaga? E faapefea ona fai oe ma tusi a le Atua? O le fau o le mau fale tetele, poo le suia o taimi ma aso o le Silisili Ese? Uso e, o le tusi e manaia ma fiafia iai tagata, o le tusi ua iai le alofa; ua iai le filemu ma le moni. E ‘anoa ma faatupu manatu, auā na te faaalia le saolotoga ma faamanuiaga o le ola. Na te tauaveina faailoga ma foliga o Keriso; na te fofōina ma faamalie le galala o le au faitau. Amuia Korinito, e ui ina tumutumu i le faalemigao ma le au faapaupau, ae na maua iai foliga o Keriso iai latou sa amataina le ekalesia. Ua fai ai lava i latou ma ata e vaai iai tagata o le lalolagi i aso uma ma liliu ai. Ua avea ai lava lo latou loto mau ma le faatuatua i le Alii o le Toetu e fai ma tusi faitau i le toatele o le au faapaupau. O Samoa, ua iloa e le lalolagi uma e faavae i le Atua. O ona upu fai ma lona ola tapuai. Ae talofa e, na o le vaitusi ma papamaa o loo iloa ai. Na o le su’ega o le tamaoaiga o le tagata i lona taimi, ma le vivii e le tulī o ona lava vae! Ua uma atu augatupulaga sa tatou aooga ma faitau ai i le tamalii’aga o Keriso i o latou soifuaga. O ā fa au? Faapefea le lumanai o fanau?

Samoa e, pe le o le amio ea o loo saili mai ai le Atua ia te oe ma a’u? Ia faavae lou aiga i le Atua. Ia e manatua le upu a le poto, ‘A’oa’o  le tama e tusa ma ona ala….’ Ioe, e tupu a’e ma ola ai i foliga o Le na faia i tatou. Ua le maua i le mālō ma le ekalesia se tusi a Keriso mo Samoa. Ae talosia a tatou fanau mo a taeao, atoa foi ma lo tatou finau mo se ola toefuataiina i la le agaga o le ekalesia. Tatou tutū faatasi, e toe fau ni foliga fou ua iai le amio Atua ma le amio paia, ua tamauina i papa aano o o tatou loto, ina ia maua ai se Samoa toetu o taeao, ma se ekalesia faaolaina ia Keriso Iesu. Poo iloa ia foliga matagofie o Keriso ia te oe?

Uso e, o loo faitau oe e tagata uma i aso uma. O tagata uma o Keriso ua mamanuina ai foliga o Keriso i papa aano o o latou loto taitoatasi. O le agamalu, o le loto maulalo, o le onosai ma le faapalepale, o le loto faamagalo ma le alofa faamaoni; o le usitai ma le mata’u i le Atua; o amioga uma faapena Samoa, o loo faaalia ai Keriso i lou olaga. O foliga na o loo faitauina ai le kerisiano moni e tagata, e molimauina ai le mamalu o Iesu toe tu. A o oe, se a se ituaiga tagata o iai lou kerisiano?

Se tusi oe a ai?

 

Amene.

7737063

© Samoa Observer 2016

Developed by Samoa Observer in Apia