O fea le Alofa?

22 April 2018, 12:00AM

I  le aso Lua aso 10 Aperila 2018 na faasalalauina ai I le nusipepa o le Observer.

se tusi mo a’u  mai le susuga a Faapale Taumua.

O se tusi faamomoi loto ma o la’u tali atu lea i ai.

Ina ua ou fo’I mai i Samoa mai se fonotaga na faia I le Iunivesite i Aukilani i le mataupu o le “Tulafono o le Pasefika, Tu ma Aganuu ma Tulafono Faavae”, na faia i le aso 12 Fepuari sr’ia oo I le aso 14, 2018 sa ou faitau ma le toto’a  i faaaliga taofi e faasino i ‘ele’ele tau le aganuu faapea ai ma tulafono e faasino i ‘ele’ele.

E sa’o a Faapale, o Samoa ua I luga nei o le gaga.  E lē gata pe faapefea ona puipuimalu ia ‘ele’ele tau le aganuu mai le faatau motu atu i tagata po o kamupani mai fafo, ae pe faapefea ona malupuipuia i tatou mai ā i tatou.  O le a ou faalaua’itele le mataupu lea mulimuli ane.  Tau ia ina ou faapea atu, o le faafitauli aupito I tūgā lea ua feagai ma I tatou,  talu ona ua toe faafo’I mai lo tatou malo tuto’atasi.  

Talu nei ona tatou maua le malo tuto’atasi, e foliga mai ua tatou faatalalē I le tatou tu ma le aga.  E pei ua faitau o tatou Ta’ita’I, afai e maua le Malo Tuto’atasi, e lē toe mafai ona faoa.  Ae o le mou ma le faatuatuana’i i la tatou mau tuufaasolo ma le tatou tu ma le aga, o se mea e ono tupu I se ala e ta’ua le ‘upu, o se tai sua mālie i le vaitau o le tatou nofoaiga.  

Ua manino mai, mo I tatou o ta’ita’I po o faauluuluga o aiga po o le Malo, e ao ona o tatou sa’ili se fofō o le to’atūgā e māfua ona o le numi, po o le laufetōa’I o mau I totonu o le MATAUPU 102 o le Tulafono Faavae o le Malo o Samoa.  E ao ona o tatou ioe pe a fuafua I le molimau manino ma le malamalama, o le numi lea ua I ai nei ua faaaogāina  e nisi  e soloia ai le agaga ma le ‘a’ano o le MATAUPU 102, o lona uiga, ina ia puipui ‘ele’ele tau le aganuu mai le faatau motu atu i ni tagata mai fafo.   O le asō, o la’u talosaga, ona o le atunuu ma le malo o Samoa e faavae I lona faasinomaga ma lona tofi, ma o nei mea e fofoa mai le ‘afu’afu o ‘ele’ele tau le aganuu, e ao iā i tatou ona tatou tutū faatasi e faafoe ma fofō le numi lea ua tula’I mai i le teuteuga o le vaega lea o le Tulafono Faavae.  O le tatou aia tatau lea.  O I tatou o suli o ‘ele’ele tau le aganuu i Samoa, pe alala I Samoa pe leai.

O le gagana o le Faatomuaga o le Tulafono Faavae, o loo talanoa mai I le alofa.  E amata mea le Tulafono Faavae I le faalagi mai o le Atua e faavavau lona alofa.  I le Faatomuaga o le Tulafono Faavae, o loo faamatala mai ia le mafuaaga e ao ai ona tatou taofiofi mamau I le tofi e faasino faapitoa I o tatou tagata.  Fai mai le Tulafono Faavae, o Samoa o le atunuu e faavae I le Atua; o se atunuu e aoao ai le pule to’atasi a le Atua i mea uma.  Ma, o se atunuu e tausi ma puipui e ona tagata I lana tu ma lana aganuu ma lona tofi pa’ia tuufaasolo, e faasoa atu i lea tupulaga ma lea tupulaga se’ia oo i le faavavau.

Fai mai le tu ma le aga a Samoa, o i tatou nei o le fanua ma le ‘ele’ele, o le fanua ma le ‘ele’ele o i tatou fo’I lea.  E faamaonia lea i le tanu o le pute o le pepe ma le fanua o le tinā I le ‘ele’ele po o le fanua.  E leai se faasinomaga e aunoa ma le fanua po o le ‘ele’ele.  E leai fo’I se uiga o se matai pe afai e lē faasino i se ‘ele’ele.  I le tatou tu ma le aga, e leai se faasinomaga pe a leai se ‘ele’ele.  

O le ‘autū o la’u lauga, o fea le alofa?  O lona uiga, o fea sona tino, a o le a sona uiga?  Afai ua leai se tino, po ua lē iloa.  O le fesili a Professor Tony Angelo na faia I le fono lea e ta’ua i luga i le Iunivesite o Aukilani, o fea le alofa?  Sosoo ai ma le taliē ma le gugulu o tagata.  Mo a’u, o le fesili e loloto ma  ‘anoa.

Sa ou fesili I se tasi tagata, pe māfua iseā le fesili; ae pe māfua iseā le taliē?  Ae fai mai, ona o le gagana o le alofa, e lē o se vaega lea o le gagana o le tulafono.  Pagā lea e faapea fo’i i le tulafono e aafia ai le tu ma le aganuu.  E māfua ona faatū le fesili, fea le alofa? ona o le gagana ma le agaga o le tatou tulafono ua I ai nei, ua  ta’ita’I ‘ese i tatou mai le faavae ma le ‘autū o le tu ma le aganuu a Samoa o loo fai mai o le alofa e afuamea.  Ma o le mea lea ua iai nei, ua o tatou taumafai e toe a’oa’o  ma toe faafo’I mai le mau faavae, le mana ma le amiotonu I a tatou tulafono.  Ma e tatou te faia lea mea e lē ona o se pule ae ona o le alofa o le tagata Samoa I lona malo, I lona atunuu, I lona aiga ma le aganuu faa-Samoa.  

Toe fo’I le faamatalaga I le numi o le MATAUPU 102 o le Tulafono Faavae.  O le numi, pe faapefea ona soosoo le faa’upuga I le Vaega ‘autū o le MATAUPU ma faa’upuga lagolago aemaise ai le Fuaiupu lagolago muamua.  Se’I o’u sii mai le MATAUPU 102 mai le Tulafono Faavae (2016) mo se faamasinoga.

102. E le faaliliu’eseina atu ‘ele’ele tau le aganuu.

O le a le tusa ai ma le tulafono po o le le mafai e so o se tagata ona faaliliu’eseina atu po o le ‘ave’esea mai ia te ia o ‘ele’ele tau le aganuu po o se itu e tau atu ai i ‘ele’ele tau le aganuu, i se auala o le faatau atu, lisi, laisene, mokesi, po o se tasi lava faiga, o le a le mafaia lava se ‘ele’ele tau le aganuu po o se itu e tau i ai ona avea i le faamaapeina po o le fai ma mea e totogiina ai ni aitalafu a soo se tagata ina ua maliu po o le le mafai ona togia o aitalafu.

VAGANA AI ONA UA FAAPEA, o se Tulafono a le Palemene e mafai ona faatagaina:

(a) Le tuuina atu o se lisi po o se laisene o so o se ‘ele’ele faale-aganuu po o so o se itu e tau atu i ai i lea ‘ele’ele;

(e) Le ‘aveina o so o se ‘ele’ele faale-aganuu po o le tau i ai i lea ‘ele’ele mo galuega tau le Malo.

O le mafuaaga ‘autū o le MATAUPU 102 o loo faamatala manino mai e le ulutala o le MATAUPU: E LE FAALILIU’ESEINA ATU ‘ELE’ELE TAU LE AGANUU.  Ma o le isi vaega o le MATAUPU 102, ua lē manino ona faamatala, talu ai le numi o loo I totonu o faa’upuga.  I le gagana lautele, o loo faapea mai le MATAUPU 102 e solitulafono le faatau motu atu o ‘ele’ele tau le aganuu vagana se Tulafono ua pasia e le Palemene, e faataga ai (i) se lisi poo se laisene o ‘eleele tau le aganuu (ii) le ‘aveina o ‘ele’ele tau le aganuu mo galuega faalemalo.

E le afaina le ‘aveina o ‘ele’ele faaleaganuu mo ni galuega faalemalo pe afai e faamaonia o ni galuega a le malo.  E māfua ona ou ‘ilitata I le nunu lea ua aliali mai ona o le faitauga o le Fuaiupu lagolago o loo faapea mai,  O le tulafono a le Palemene e avanoa ai ona faataga ona faia se lisi po o se laisene o ‘ele’ele tau le aganuu poo se isi lava mea o loo ta’ua ai.  I talane o le faa’upuga ‘autū o le MATAUPU 102 o loo faapea mai, e lē mafai ona faatau motu atu se ‘ele’ele tau le aganuu i le faatau motu, mokesi po o se isi lava auala.  Ma o le Fuaiupu lagolago (a) e leai se faa’upuga o ta’ua ai le mokesi o se lisi.  O le toe faauigaina o upu “po o se isi lava mea o ta’ua” e feteena’I ma le uiga manino  o upu o le vaega ‘autu o le Mataupu, o loo faasa taputapu ai ni mokesi.  O le vaega tonu lea o loo i ai le laufetoa’i o mau e māfua  ai le numi.

O o tatou tua’a ma mātua na fauina le Tulafono Faavae sa latou faatuatua ola tatou te faia ni faai’uga amiotonu e puipui ai o tatou ‘ele’ele tau le aganuu, ni I’uga e avanoa ai  ona o tatou tula’I atu ai e faafeagai ma isi malo o le lalolagi ma le faatuatuaga o la e malu le tatou tulaga tau tupe tusa ai ma mea tatou te moomia faatasi ai ma le faatuatuaga tatou te le’I faatau ia lo tatou tofi.  

O Fuaiupu o le LTRA 2008 ua lagalagā ai le lē talitonu ma le finauga I le MATAUPU 102 tusa ai ma lona agavaa faaletulafono e puipuimalu ai ‘ele’ele tau le aganuu mai le faatau motu atu i fafo.  Faapea ai fo’i ma le molimau a le Malo I le Tulafono Toe Teuteu (ACLAB) i le 2017.  E faasino faapitoa la’u faamatalaga I le Fuaiupu 25 o le LTRA 2008 e molimauina ai le faaaogāina o le Tulafono e faaitiitia ai a tatou aia tatau faasuli, ma i le Fuaiupu 112 o le faamalamalamaga o le ACLAB o se molimau i le auala ua faaaogāina ai le numi o le MATAUPU 102 e avanoa ai ona sao le Tulafono e faataga le mokesiina o ‘ele’ele faaleaganuu (e ui lava o le mokesi e faasino ī lisi).

O le vaega e faasino faapitoa I le mataupu o loo talanoaina, o le Fuaiupu 25 LTRA vaega e (4) (a) (ii).   E faasino lea I le mea ua ta’ua  o le Tusi Faamaonia o le Sa’o Atoatoa.  E faapea le tala o le tusi faamaonia lenei e faasino I le resitalaina o ‘ele’ele e umia sa’oloto, ‘ese mai lisi po o laisene o ‘ele’ele tau le aganuu.  O le faiga mo ‘ele’ele faaleaganuu, e faila le talosaga mo se lisi o ‘ele’ele faaleaganuu I le ofisa o le MNRE.  

 

 

Afai e talia e le MNRE, ona tusia loa lea o le lisi po o le laisene ma e sainia e le Minisita e fai ma sui mo ē ou le ‘ele’ele tau le aganuu.  O le tala ua ou maua e faapea e lē sainia e ē ou le ‘ele’ele ia le lisi po o le laisene ae fai mai fo’I nisi molimau e leai e saini e ē ou le ‘ele’ele ia le lisi po o le laisene.  Taatia ia le tele o suli faapea ai ma le pule faaSa’o (aua ua  usi le faatalatalanoaga o lenei mataupu i faaaliga taofi faalaua’itele).

O le Fuaiupu 25 e tāua mo a’u ona e 2 fesili e laga mai ai:  (i)  Aiseā ua tuu ai lenei paoa I le tagata e to’atasi tainane o ia o le Minisita, i ‘ele’ele tau le aganuu?  (ii) Aiseā ua lē faapea ai ona faia se Tusi Faamaonia o le Sa’o atoatoa I le resitalaina o lisi ma laisene i ‘ele’ele tau le aganuu e pei ona faia mo ‘ele’ele umia sa’oloto?

O le mea tāua I le mataupu lenei o le faamalieina o suli ina ia latou talitonu I tulafono ma aiaiga e puipuimalu ai aiaiga ma aia tatau a tagata e umia ‘ele’ele tau le aganuu, ina ia ‘aua ne’i faaliliu’eseina. 

Tainane e lē o faaaogāina e le LTRA le upu ‘suli’ a o loo faaaogā le upu ‘tagata’ ae  i le aganuu ma le agaifanua a Samoa, pau lava tagata e aia i ‘ele’ele tau le aganuu, o suli.  Ma o aia faasuli i se ‘ele’ele tau le aganuu e tumau e oo i le faavavau.  O le suli ā ia o le suli ma e lē afaina pe alala i Samoa pe leai.  I le tu ma le aga faaSamoa, o se vaega ‘autū lea o le aia tatau faasuli.  O le faatula’I mai o se tulaga faapenei e taofiofi ai pe ‘ave’esea ai le aia faasuli, e feteena’i ma le tu ma le aganuu o loo puipuia e le Tulafono Faavae. 

I le mataupu o le mokesiina o lisi o ‘ele’ele tau le aganuu, o lea e faatula’I mai I le Vaega 1.1.2. o le faamalamalamaga o le ACLAB, e matuiā le faaaogā sesē o le numi  ma le lape i le MATAUPU 102 o le Tulafono Faavae ma e i ai to’atūgā e ono aliali mai ai.  Ae o le mea e sili ona leaga, ona e tatala ai le avanoa e faatau motu ai ia ‘ele’ele tau le aganuu.  Ma o se mea e matuā feteena’i ma le ‘auga ma le agaga o le MATAUPU 102 o le Tulafono Faavae na māfua ona faatula’I mai e mātua ina ia puipuimalu ia ‘ele’ele tau le aganuu.

O le Faaiuga a Alii ma Faipule o Sasina talu ai nei e lisiina o latou ‘ele’ele tau le aganuu i le tau e $250,000 I le tausaga mo le 100 tausaga, e tatala ai le faitoto’a e mokesi pe afai e loto ia tagata o loo lisiina i ai le ‘ele’ele e mokesi le latou lisi, I lalo o le Tulafono ACLAB.  O le mokesiina o lisi e tatala ai le avanoa mo nisi fo’i tagata mai fafo e ofi mai i totonu o ‘ele’ele o  Sasina I le 100 tausaga o i luma.  Ma o le mea mautinoa ua lē avanoa ia ‘ele’ele nei, e atia’e e tagata Sasina I le 100 tausaga o i luma pe tusa o le tolu  pe fa tupulaga.  O le fesili, o ai lea ua  ‘ave’ese le aia tatau mai suli o Sasina e aga’i  ai i ‘ele’ele nei i se vaitau umi faapenei?  O le mafuaaga lea o le fai atu, pe faapefea ona puipui tatou mai ā tatou?

O le selau tausaga o se taimi umi.  A fua i le saosaoa o suiga ia ua faatula’i mai i lenei 30 tausaga, e lē tauiso le mea e ono tupu mai i le 100 tausaga pe afai o le ituaiga ta’iala lea mo tulafono taufaaofi i le aga’I atu i luma.  O le afaina e ono aliali mai e māfua ai le talosaga a Faapale ma Isi, ina ia sufi ia Ta’ita’I o le atunuu ia nofoilo ma ia fuafua se fofō e ao ona fai.  Ua ou lagona lea valaau.

I le tausaga 2008, na fai mai le ta’utinoga a le Loia Sili ia te a’u a ou avea ma Ao o le Malo, e leai ma se mea o le Tulafono Taufaaofi LTR2008 e  aafia pe afaina ai ia aia tatau a suli i ‘ele’ele tau le aganuu.  O le matafaioi a le Loia Sili, ina ia momoli fautuaga aupito lelei faaletulafono I le Ao o le Malo.  E faapea fo’I le tiute tau’ave o le Palemene.; ina ia Iloilo ma le toto’a ma le mae’ae’a ia Tulafono uma e tau faaofi atu i totonu o le Palemene.  Faapea fo’i i le matafaioi a le Palemia.  E ao ia te ia ona tapena ina ia oo atu i le faitauga faatolu ae le’I faamaonia le Tulafono Taufaaofi, o lea na te fautuaina ai le Ao o le Malo ina ia avanoa ai loa ona faamaonia le Tulafono Taufaaofi ma avea ma tulafono. Ua na ia Iloilo uma vaega ‘ese’ese o le tulafono e ono aafia ai tagata lautele.

O loo fai mai le tatou Tulafono Faavae, a ua uia uma loa mea nei, ma ua fautuaina e le Palemia le Ao o le Malo, e ao loa ona faamaonia e le Ao o le Malo.  O le alafua lea  o lo ua faataatia mai e le Tulafono Faavae.  Pei ona fai mai Faapale, o se alafua ma se aiaiga e faavae mai i le talitonuga, o ō tatou Ta’ita’i, e agavaa e tau’ave o latou tiute, o  loo iā i latou le atamai e lagolago ma faataunuuina ai, ma e faia le latou fe’au ma le alofa pei ona moomia e o tatou tua’ā ma o tatou mātua.  O aiaiga ia e taofiofi ma faatonutonu ai le paoa ma le fe’au a le Malo, afai ua feto’I po ua faaletonu, e ao ona sa’ili se fofō.  Le asō, e lē mafai ona ‘alofia, e ao ona tatou ioe o lea e I ai le to’atūgā.  Ma o le tatou tiute tau’ave, ina ia faafoe ma faatonu le faafitauli.

 

 

 

E ao iā i tatou ona o tatou ioeina e i ai le faafitauli i le MATAUPU 102 o le Tulafono Faavae:  Ma o le numi lea o loo i ai nei e ao ona o tatou galulue e faatonutonu ina ia tafi ‘ese le numi e māfua ona o le laufetoa’I o mau.  Ma e ao iā i latou ua lautogia e faafoe ma faatonutonu le faafitauli ona ‘apo mai le alofa mai totonu o le tulafono e faasino I le tu ma le aganuu a Samoa ina ia avanoa ai ona pese I se fati e lagimalie ona e soosoo lelei le pule ma le tulafono, le amiotonu e manino ma malamalama.  E ao iā i latou ona maua se fofō o le numi ma le laufetoa’I i se auala e lē gata e faala’ei’au ai tagata ma le tu ma le aga ae faamalosia ai fo’I ma le tulafono.  Ma e ao fo’i iā i latou ona aumai se teuteuga o le tulafono MATAUPU 102;  a oo la ina tuu atu i se palota faalaua’itele tusa ai o le MATAUPU 109 o le Tulafono Faavae, ae ua lava saunia ia tagata e faia se I’uga e tusa ai ma lo latou lagona fuatiaifo.  

O lo tatou tiute tau’ave, ia ‘apo’apo mai ni tagata lelei ma agavaa, i lo tatou lafoa’I o le faaitu’au ma le faapolokiki ina ia avanoa ai ona tatou galulue faatasi e faamautūina le paleni o mea ma le puipuimalu o loo moomia e tou tua’ā ma o matou mātua pei ona i ai i le MATAUPU 102 o le Tulafono Faavae – le paleni I le atia’e o le tatou tamaoaiga mo tagata uma ma nuu uma, ae o loo malupuipuia le tu ma le aganuu a Samoa faapea ai ma ‘ele’ele tau le aganuu.

I le 30 tausaga ua tuana’I,  e aliali mai ua sui ia le mau faavae. Ua tatou see ‘ese mai le faaSamoa e fealoaloa’I aI le pule ma le alofa, I se tulaga ua faatuatuana’i I le fealoaloa’I ae ua ‘ave le faamuamua I le pule tuto’atasi.

I lea faavae fou, ua suia le pule a le Sa’o e soalaupule ma le ‘auaiga a ua pule to’atasi le Sa’o e aunoa ma se fealoaloa’I ma se soalaupule ma le auaiga.  E matua feteena’I lenei mau ma le tu ma le aga faaSamoa.  O le pulega faamatai, e faavae I luga o le fealoaloa’I ma le felagolagoma’I o le matai ma le ‘auaiga.  O le faavae fo’I lea mo Tama a Aiga ma le faafeagai ai ma Aiga.

Ina ua sa’ili le malo tuto’atasi I le Mau, e noa le ta’ita’Iga a Tama a Aiga pe a na leai le alofa, le faaaloalo ma le lagolago a o latou Aiga.  Ina ua pa pa fana I le aso lea ua ta’ua o le aso To’ana’i pogisa, e le’I toe faatali Tamasese, na savali loa faatasi ma isi Ta’ita’I o le Mau I le mea o I ai le ‘au manunu’a tainane e iloa e ono maliliu ai. E māfua iseā?  E māfua ona o le fe’au o le tulaga ta’ita’I, e lē gata o le tautua, a o le faitaulaga . E māfua ona o le alofa ma le fia puipui I le ‘ele’ele, I le aiga ma le tofi o Samoa. 

O le alofa e fealoaloa’I, e faaosofia le faitaulaga mo le manuia lautele. O le alofa fealoaloa’i lea e māfua ai le alofa o mātua i fanau, le alofa o fanau i mātua, le alofa o le matai I le ‘auaiga, le alofa o le ‘auaiga I  le matai,  le alofa o Alii ma Faipule I le puletua ma  le alofa o le puletua I Alii ma Faipule.  Ma o le ‘afu’afu fo’I lea e fanau mai ai le lotonuu, “O a’u nei o le Samoa”. 

 E I ai le muagagana faa-Leulumoega:  O le matua o Leulumoega e le se matua e fafaga I fale, o le matua gasese.  O lona uiga, o le tulaga ta’ita’I o Leulumoega, e lē māfua ona o se tulaga mati’e o Tumua. E māfua ona o le alofa ma le tautua I tagata o le nuu ma le itumalo ma le tauia o lena alofa ma lena gāsese e le alofa ma le faaa’a’e a le nuu ma le itumalo.  O le ‘ave o le faamuamua I le pule e aunoa ma le alofa, o se mea lea e faoa ai le lagolago e māfua ai ona mamalu ma ganea le upu a le Tumua o Leulumoega. O le pule e aunoa ma le alofa, o le pule e lamatia ma e ono foua.

Toe fo’i i le fesili, fea le alofa?  O le mau faavae lea ua tula’I mai nei, ua matuā lūlūina ai le faavae e malu ai le pule mai le faamaualuga tuuvale ma le faaloloto e lē faatuā’oia.  Afai tatou te tuufau ia Tulafono nei e tula’I mai, o loo faufau e ‘ave’ese le alofa mai le Tulafono, ua o tatou opogi ia faiga faakolone.  O le pulega faakolone fou lea, ua lē o se isi mai fafo e faamalosia I tatou e faia se mea tatou te le loto I ai.  O lea ua alala le faiga faakolone lea I o tatou agaga ma mea tatou te fai.  Ma ua limata’ita’I tatou I le musumusu mai, e leai se isi auala e atia’e ai Samoa vaganā ua faatau ona ‘ele’ele tau le aganuu.

Na silafia lelei e ō tatou mātua.  Na latou valo’ia o le mea lea o le a tupu; aua o le mafuaaaga lea o le MATAUPU 102 ma le MATAUPU 109 I totonu o le tatou Tulafono Faavae.  O lea tatou te iloa, o le faatau motu o ‘ele’ele tau le aganuu, ua lē na o le pau lea o le ala e atina’e ai a tatou ‘ele’ele.  

O le pinefaamau, e i ai ni matai Samoa ua iloga le latou sao I le atina’ega o faato’aga.  Ua latou faia laufasi ma tiapula, fau e latou masini ia ala galue, su’e e latou ia maketi I fafo, fai e latou ‘aufaigaluega ia pepa o faa’ele’eleaga e ‘ave I fafo, sa’ili e latou ia faa’unegtupe e atina’e ai faato’aga.  E mae’u le tulaga siitia o faa’ele’eleaga a Samoa lea ua ‘ave nei i fafo mai a latou taumafaiga.  

Na silafia lelei e ō tatou tua’a ma matua lenei mea, ma o loo faatula’I mai le lu’itau, ia tatou ō e puipui tatou mai iā tatou, puipui tatou mai le soona faatau motu atu i tua o ‘ele’ele tau le aganuu, ‘ele’ele sa latou galulue tinoū e puipui ma taofiofi. Ina ia tau ma tino le faamoemoe, e ao ona tatou toe faaolaola le tu ma le aga; la tatou gagana ma le tatou fealoaloa’I, le tāua o le alofa, le  tāua o le alofa o ō tatou matua. 

O le a faai’u la’u tautalaga I le tala mai Sataua.  O se tasi o tala I le mafuaaga o le fuaiupu, “ua segia le mauli”.   Pau lea o se tala o loo faaolaolaina le upu ‘mauli’ mo le ‘agaga’.  O le tala e uiga iā Fine ma Sau ma lo la atalii o Mataulufotu.  Faapea le tala o Mataulufotu sa ia mafai ona segi le mauli ma maliu ai le tagata.  Ma sa na toe mafai fo’i ona toe faaola le tagata I le faafo’I mai o le mauli.  

E to’atele le fanau a Fine ma Sau.  Soo se taimi e maua ai se fanau tama, sa o latou foa’i e fai ma mea’ai a le pusi o le sami.  I le isi aso, ua le toe mana’o  le tamā e foa’I le la fanau I le pusi.  Ona fai atu lea I lona to’alua, e ā pe a sosola I le togavao e lalafi ai mai le pusi.  Mea ane ua nonofo I uta I le togavao ona fanau ai lea o le isi tama, ona faaigoa ai lea ia Mataulufotu.  Ona ua alu le tamā e sa’ili mea’ai, ae ua faamuli le tinā ma le tama i le isi aso, o le tinā e ‘ai tagata ma ua tonu ai e fasioti lana tama, tanu le ulu I lalo o le ‘ulu ae ‘ai lona tino.  Ina ua fo’I mai le tamā ona fesili lea po o fea lona atalii. Tali le tinā, na te lē iloa.  Ona a’e lea o le tamaloa I le ‘ulu, ma ona ua oo atu i le tumutumu, ua ia faalogo mai I le ulu o lona atalii o loo tuuvalaau atu ia te ia e tilotilo mai I le mea lea e ta’oto atu ai.

Ona aga’I mai loa lea i lalo o le tama ma ua foufou e fasi le to’alua.  Ae fai atu lona atalii o loo alofa pea I le tinā, ‘aua ne’I fasiotia lona tinā ae lalaga se ‘ato laufala e fe’avea’i ai lona ulu.  Ma le isi, ua tatau ona o latou tuumuli.  O le ‘ato lea e I ai le ulu, ua tuu e fata e le tinā I lona papātua.  Ona omai loa lea o le faigamalaga ua taunuu I le nuu o Sataua.  Ae o loo talimalo le nuu I se faigamalaga.  Ua ulufale ia le faigamalaga i le sisi o pola ma ō atu I luma o le fale.  Ona fai atu lea o tagata o loo I totonu o le fale, ‘aua  ne’I sisia pola ne’I mea ane ua alu atu le mālūlū I totonu o le fale ae sili pe a ō atu e ui mai tua.

Ina ua mae’a ona aai le ‘aumalaga lea na talimalo ai le nuu ona momoe lea. Latou te le’I ofoina ni mea’ai i le tamaloa, lona to’alua po o le ulu.  Ina ua vivini moa I le taeao, ona fai atu lea o le ulu I lona tinā e fafagu lona tamā ona ua oo I le taimi latou te ō ‘ese ai.   

Ina ua o ‘ese, ae ua maliliu uma ia tagata ia sa I le fale, ua segia e le ulu o latou mauli.  Ona o lea o le ulugalii ma le la tama ae mea ane ua tau atu i le vaa na malaga mai Fiti e su’e se fofō mo le afafine o le Tui Fiti.  O le vaa ua foufou e toe fo’I I Fiti, ae valaau atu le ulu I lona tamā, e logo le auvaa o latou e fia malaga faatasi ma I latou i Fiti.  Ona faapena lea ona fai e le tamā ae ua le amana’ia e le auvaa ma ua faaauau ona aga’I ‘ese atu le vaa mai le mea sa tau ai.

Ona taofi lea e le ulu o le vaa ina ia maualafia ona ō atu ai le ulugalii ma le ulu I totonu o le vaa.  Ona ua lalata le latou vaa I Fiti ona o latou tau atu lea I se ava na mana’o le auvaa e ‘alo’ese ai ona faapea e i ai le ‘anae oso o le i’a a Sina, e ono lamatia ai o latou ola.  Ona fai atu lea o le ulu I lona tamā e fai I le auvaa ia faaauau pea ona uia le ava, ‘aua ne’i fefefe e leai se mea e tupu.  Na faatautai e le auvaa ina ia ofi filemu atu le vaa I le ava ae ua latou faailoa atu fo’I I le tamā ma le tinā ma le ulu, afai ae sa’e le vaa latou te fasiotia  I latou.

Na avatu e le ulu I le auvaa se pese latou te lagia e ta’ita’I saogalemu ai le vaa I totonu o le ava.  Na taunuu manuia le vaa I le matafaga.  I le natafaga, sa ta’oto ai le afafine o le Tui Fiti e ufiufi i le ie toga.  Sa talanoa atu le ulu I ona mātua, sa ia fai atu ia I la’ua e ō i uta, ‘aua ne’i ‘alo mai le tino o le tama’ita’I a ia nonofo ai i talane.

Na talileleia e le Tui Fiti ia le toeaina ma le loomatua.  Na ia fai atu, na ō ia ona tagata I Samoa e sa’ili ai se fofō mo lona afafine ae ua lē maua se isi.  Na fai atu le ulu I lona tamā e ta’u i le Tui Fiti o loo taumafai pea e toe faaola ia lona afafine.  Ma o lea o le a alu le ulu I le lagi e taumafai ona toe faafo’I mai le mauli o Sina le alo o le Tui Fiti.

Na alu le ulu I luga I le Lagituaiva e vaai ia Fulu’ula- a- le- matoto, o se tama’ita’i e ‘ai tagata.  Ona ua taunuu atu, e lē o i ai Fulu’ulaalematoto vaganā ai lana tama tama.  I le pou faalava o le fale, na iloa atu ai e le ulu ia le ‘ato e foliga o se ‘ato faato’ā lalaga;  ona fesili lea o le ulu i le tama, po o le ā le mea o i totonu o le ‘ato fou?  Ae tali le tama, o le mauli o le afafine o le Tui Fiti na aumai e lona tinā. Ona aapa atu loa lea o Mataulufotu ua aumai le mauli o Sina. Ma ina ua toe faafo’I le mauli iā Sina ona toe ola mai lea o le tama’ita’i.

Ua matuā ‘oli’oli le Tui Fiti a ua ia lagona e leai se meaalofa e talafeagai e ‘ave mo le ulu ma ona mātua.  Ma o lea na ia foa’ia ai le I’a a Sina, o le anae oso na fai ma faamomoli o mātua ma le ulu I Samoa.  A oo ina a’e le anae oso I Savaii, ona faapea lea o tagata, o le ‘alugaloa na I Sataua…o le malaga na ‘ave e Mataulufotu o latou agaga.  O lona uiga, o le malaga na momoe i ‘ali ‘ofe I Sataua lea na segia e Mataulufotu ia ō latou mauli.  

O le lagi o le alalafaga o le Atua e avanoa ai ona toe faafo’I mai ia mauli.  I lona aga’I atu I le lagi ina ia maua le mauli o Sina, ua ia faailoa mai ai e Mataulufotu, o mauli o tagata lelei pei o Sina, e mafai ona toe faafo’I mai.  A o le mauli o tagata ia e lē alolofa, e lē toe mafai ona faafo’I mai.

I le su’eina poo ai mauli e faafo’I a o ai e lē faafo’ia, o le mea e ‘ave I ai le faamuamua, ia faatūtū lava le taumua o le vaa I le lagi.

O le fe’au o le alofa ma le faaaloalo o le mea lea e ola ai le mauli, o lea lava o loo faaataata mai.  Afai ua segia le mauli, e pau lava le lavea’I, o le alofa.

O le mataupu o ‘ele’ele tau le aganuu lea tatou te vāvāō ai nei, e foliga mai e au ina segia ai le mauli.  O le laufetoa’I, o se mea e ao ona tatou galulue ina ‘alofia.  Ina ia o tatou ‘alofia le faafitauli lea, e ao lava ona toe fuata’I i le fatu ma le mafaufau, i ā tatou tulafono, le tofa ma le faautaga o a tatou tu ma aganuu Samoa ma le tatou tofi pa’ia tuufaasolo.  Ma e lē mafai ona tatou maua lea mea vagana ua tatou toe faafo’I le alofa i  tatou tulafono.

E tele lu’itau sa feagai ma le tatou atunuu talu ona faafo’I mai le tatou malo tuto’atasi, ae o  le lu’itau lenei e aupito sili ona faigatā.  Ina ia mafai ona tatou  manumalo I le lu’itau lenei, e ao lava ona o tatou malamalama lelei, o le lu’itau e lē o se lu’itau e afua mai fafo, ae o le lu’itau mai totonu o le lotoifale.  E ao ona tatou nofouta  e pei o Iosua ma le fanauga a Isaraelu.  Pau lava le ala e mafai ona tatou  savalia ai le vai ma ‘apo’apo ia o tatou mauli, o le tatou malamalama I le tofa ma le faautaga a o tatou mātua ma le tatou faatuatua I le Atua.

Ia  Iosua 4:2-7, o loo faapea mai le Atua:  Ia outou ō atu I le atolaau a le Alii lo outou Atua I le ogatotonu o Ioritana, tofu outou ma le maa i ō tou tau’au tusa ai ma le fuainumera o fanauga a Isaraelu e fai ma se faailoilo o outou.  I se aso I le lumana’I, a fesili a tou fanau, māfua iseā nei maa? ona outou fai lea I ai, na vavaeina le vai o Ioritana e le Alii; ma ua ui atu ai le fanauga a Isaraelu.  Ma ua faatūina e Iosua ia maa e sefulu lua I totonu o Ioritana I le mea na tutū ai vae o faitaulaga o ē na ‘ave le atolaaau o le feagaiga.  E faia fo’I na maa ma faamanatuga I le fanauga a Isaraelu e faavavau.

O la tatou tetee I se solifaavae o se tulafono a le Palemene e foua le MATAUPU 102 o le Tulafono Faavae ma le tāua o le faamanino o se vaega ua numi ua avanoa ai ona faauiga sesē, o ō tatou maa faamanatu ia i lo tatou faasopolia o le Ioritana lea tatou te faafeagai.  Po o le ā le mamafa o maa, e ao ona tatou tauamo ma tuuina atu i le vai ina ia mafai ona teetee le tafe o le vai.  Pe a oo I se aso ae fesili mai suli, o fea le alofa?  E mafai ona tatou tali atu, a e ā maa ia?

 

Soifua 

22 April 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>