Mafatiaga o le aiga i aso uma

By Deidre Fanene 22 February 2018, 12:00AM

I le tau o le soifuaga lea ua i ai nei, tatou te mana’omia le sefeina o le seleni auā mana’oga o aso uma fa’apea ai aoga ale fanau aemaise lava i le tausiga o le aiga.

O isi tulaga uma e tatou te toe mafaufau tasi lava pe ono talafeagai le fa’aaluina ai o le seleni.

Afai la e fa’aaluina le ova ma le afe tala i le tausaga ona o le totogiina o le ta’avale e la’u mai ai le suavai  o le a se fa’alogona o iai.

O le ituaiga olaga lea o lo’o ola ai le aiga o Iuni Iuni mai le afioaga o Satapuala.

Sa ia fa’ailoa i le Fofoga o Samoa ua ova ma le 20 tausaga talu ona nofoia lea nofoaga e le’i o’I atu lava se suavai i le nofoaga o lo’o i ai.

Sa ia fa’aalia fo’i o le latou masani i aso uma o le totogiina lea o ta’avale a nai isi aiga ina ia mafai ona latou o e la’u mai ai le latou suavai.

 “O le tulaga lena lea o lo’o matou i ai i le vaitau lenei.

“O lo’o matou nonofo nei i se nofoaga e ta’u o le poloka ma e mamao mai lava i uta nei mai le a’ai.

“E pei o lou savali mai le auala a le malo se’ia o’o atu i le faleoloa o le Saina o lo’o i Satapuala.

“E $30 le tupe e totogi ai le ta’avale ina ia mafai ai ona matou o e la’u mai ai matou vai, afai la e alu fa’atolu le ta’avale o lona uiga e $90.

“E tigā na le lava le fa’asoa ae fai lava ona o le mana’omiaga o le suavai i meafai ale aiga aemaise ai o le taumafa ma gasesega.”

Sa ia ta’ua fo’i o lo’o fa’agasolo atu lava asiasiga a matagaluega mo aiga o lo’o mana’omia le fesoasoani i le itu tau suavai i lea nofoaga.

O lesi itu sa fa’ailoa mai e lenei tamā o le leai o se tane vai e fai ma mapusaga o latou mafatiaga.

 “O se avega mamafa lea mo matou i aso uma o le olaga.It’s a real struggle. Everyday,” he said.

“A fa’aopoopo tupe ia e fa’aaluina i le totogiina o le ta’avale i aso uma e aumai ai le vai e o’o atu lava i le $10,000.

“E telē lenei seleni e fa’aaluina, ae ana fa’apea o lea e I ai se suavai semanu e laititi atu le tupe e totogi ai le pili o le vai ae sefe mai lesi avega e fai ai meafai a le nuu ma le ekalesia.

 “Sa matou nofoia lenei nofoaga ae fa’atoa 12 lena o o’u tausaga, ma o le matou galuega lea e fai i aso uma, ona e toatele le matou aiga.

 “Ou te iloa e manaomia se talosaga mai i aiga o lo’o nofoia lenei nofoaga e avatu i le ofisa fa’atoa mafai lea ona tosoina mai le matou vai, ae o tupe alu foi e feoa’i ai i le taulaga.

“E le nao matou olo’o i ai nei mafatiaga fai lava si to’atele o nai aiga ia o lo’o maua i lenei mafatiaga.”

Sa ia ta’ua e tatau ona oatu se asiasiga i le nofoaga o lo’o latou aumau ai.

“O le laina paipa a le malo e le o’o mai i le matou fale, ma e ono a’afia ai olaga o le fanau o lo’o tuputupu a’e.

“E leai se fanau a Iuni, ae e toasefulu tagata o le latou aiga, ae na o le to’alua tagata faigaluega, e na’o o lona tuafafine ma lona to’alua.

“Matou te nonofo fa’atasi lava ma matou matua, o suo ma tuafafine ma latou fanau.

“E to’avalu tamaiti o le aiga nei ae aooga uma fo’i.”

Sa fa’aalia fo’i e Iuni pau le fesoasoani lea latou te mauaina i nisi o taimi o le fa’amanuiaga a le ali’i e ala mai i le timu.

O lenei fo’i aiga e fa’amoemoe lava i le sami ma le fa’atoaga mo le seleni e fesoasoani ai i tagata e to’alua o le aiga o lo’o faigaluega.

Afai e te fia fesoasoani i lenei aiga fa’afeso’ota’i le numera o le telefoni 7253365.

By Deidre Fanene 22 February 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>