Lauga - “Faatalitali ma le onosai”

Tusia Rev. Petaia Setu ,

199 Hits

Rev. Petaia Setu

Rev. Petaia Setu

O le iva masina ua le o se taimi puupuu, ae le o se taimi faigofie foi lea i tina maitaga. O taimi ma’ale’ale ia o tina. E faafaufau ma faaivaiva; e maitaita ma faafuafua; e tosogata ma augata. E matanana ma ‘aifilifili; e mata’ai ma fia faalii. E faalogoina le lelava ma le tiga; o le oi ma le oono ma lagona uma faapena. O tiga ma lagona ia o le iva masina. O le piliota lea o le faatalitali manu. Taimi onosai o tina. O’ono i sa’i o ma’i.

E le i talitonu le nuu o le Atua e 70 tausaga se uiui e faatafea ai! A o le faatonuga a le Atua, Ia fau ni o outou fale lelei e nonofo ai i Papelonia, fai ni a outou faatoaga ma lafu manu; fai ava ma nofo tane ai; nonofo ai ma faatalitali mo le taimi a le Atua (Iere.29:10).

E leaga le mea o le puleesea. E tiga le faapapatea. A o le tofa avea ma le fautuaga ua faaopeaopea! E leai se mea e tupu fua. E le vale foi le tofa paia a le Atua. O lou faleaoga Kaletaia; se i toe tapena mai ai le olaga o Isaraelu faa-manaia. O lona uiga, e le tatau ona tatou faavaivai pe faigofie. E leai se mea i le olaga nei e maua ma se filemu. Ioe, e iai togafiti a le lalolagi, ae lelei puupuu toe tua i ma’i. O o tatou lelei ma mea le lelei. Samoa, e le mafai ona faia sau filifiliga itu tasi. O le ala foi lea na tuu ai e le Atua le laau e tasi (e iloa ai le lelei ma le leaga), e feagai ma isi mea uma o le foafoaga, ina ia fai ai le filifiliga a le uluai tagata. E faapena foi ia i tatou uma. Ua faataga e le Atua  mea mamafa ma mea mama, faigofie ma faigata, mea lelei ma mea e su’e ai lou lelei. O le ata manino lena na tuu e le Atua i augatupulaga o le Esoto. Ou te tuuina atu i ou luma le ola ma le oti, o le manuia  ma le malaia…(Teu.30:19-20).

Ioe, ua ila le nuu. Ua fiu le faatalitali. Ua gase foi le onosai. Ua agiga i le ‘ea le mapuea a Iakopo. Ua lagona le leo o Isaraelu! (f.27,28). Ua lilo ia Isaraelu, e faamaoni le Atua i lana upu. Ua vave ona galo i le nuu le silisili ese ma le matautia o le Atua na faia le lagi ma le lalolagi! Le Atua o iai le ola ,a le malosi o mea uma na faia. E mata’utia; e silisili ese lona malosi. Fai mai Isaia, Na te avatua le malosi i le ua vaivai; a o e ua leai se malosi, n ate faatuputele iai le malosi.

Samoa, o le Atua o loo faavae ai lou malo ma lo tatou atunuu, o le Atua malosi. E faamaoni. Na te silafia lou loto. E le lilo oe i ona fofoga. Ia e silafia, e mai le Atua lona malosi. E popole la i se a? E le alofagia oe o faafitauli o le olaga. E le mafai foi ona tatou ola faafifilemu i aso uma lava, Ia e iloa, o le tele ia o mea leleie saunia e le Atua moo e. Ae tele foi mea tutu’a o loo aumai e le Atua e gaepu ai lou faatuatua. O lona uiga la, o lo tatou ola e tofotofoina pea i aso uma. A o le tofotofoina, fai mai le aposetolo o Iakopo, e tupu mai ai le onosai (Iako.1:3). Ae fai mai Paulo, O le onosai tupu mai ai le faamoemoe (Rom.5:4). A o le faamoemoe Samoa o le faatalitali ma le onosa’i, o le ola (Luk.21:19)

E tua lelei le faatalitali ma le onosa’i. O le faitotoa lea i le manumalo ma le faaeaina. Fai mai le perofeta, e toe faafouina lo latou malosi. E le fefevale pe fe’alo’alofai; e le vaivai pe fiugofie. E le sela pe tigaina, ae ola saoloto ma faamanuiaina. O le vaai mamao lea a le perofeta o Isaia o loo faamalosiau ai i le nuu puapuagatia. Ia galulue ma faatalitali. O le faamalosi foi lea a Paulo i le ekalesia i Tesalonia. Galulue ma faatalitali; tatalo ma tulimata’i. Ioe, e galo I le fafine ona tiga pe a faalogo i le leo o le tagata fou. E le toe manatua puapuaga ma faigata pe a faaeaina i le faatalitali ma le onosai. Aua o la le perofeta, latou te femo’ei, ae le vaivai; latou te savavali, ae le tigaina.

 

 

 Amene

7737063

© Samoa Observer 2016

Developed by Samoa Observer in Apia