Ma o loo i ai a tatou faafitauli o loo totoe, i le itu taumatau ma le ogatotonu. E te faalogoina e peiseai o le mamafa o le lalolagi ua matua saofa’i tonu lava i luga o tatou tau’au. Ae peitai-o se manatu lenei. O lenei la Aso- o se aso uiga ese lea o le soifua. O le mea moni-ua matua tumu lenei olaga i lu’itau. I totonu o lenei atunuu i le asŏ-ma isi nuu uma lava i le lalolagi nei e tusa ai ma lea mataupu-o loo tatou vaaia faafitauli.

O ia faafitauli e o mai i totonu o foliga eseese uma ma o latou tino mai. Ae peitai-o le a le aoga o le ola e aunoa ma ni faafitauli, e i ai se malaga e aunoa ma ni faafitauli? E le ua avea lena ma mea ua tatou malolosi tele ai ona o le finau pea?

O ia faiga tau le sailia o le malosi o le a iloa ai e faapea e faatoa tupu musele pe a faaauau pea ona masofasofa i latou i lea aso ma lea aso. E le faafuase’i ona latou aliali mai, e tatau ona e galue ma galue.  E faatoa mafai ona latou aliali mai pe a mavae atu loimata ma le mataga o foliga i le faagasologa o le faamalosi tino. Ioe-e le o se mea manaia ae o se lagona lelei lea pe a ‘ausia le tini. 

Ia-e te manatu la o i ai ni a tatou faafitauli. O le mea moni-e i ai. E tofu tagata uma lava ma le faafitauli.  E le faapito ia Samoa le i ai o faafitauli. Mai le atunuu aupito itiiti o le lalolagi i le malo aupito i telē, latou te faafesaga’i uma lava ma lu’itau i le taimi nei ma ieluā.

Ae mafaufau i le muagagana ua leva e faapea e masani lava ona mata’utia faafitauli a isi i lo oe. O le mea moni, afai e te manatu o au faafitauli e matuiā, ona e manatu lea ua e laki. E sili atu ona leaga faafitauli a le isi tagata. Afai o e pagatia ona ua le mafai ona e totogi se selau tala, mafaufau i le tagata o loo nofo aitalafu i se afe, sefulu afe, selau afe pe o’o lava i le faitau miliona ma miliona. Afai e te manatu ua e afaina i tale leaga, mafaufau i le tagata o loo i le falemai o loo tau faaola.

Afai e te manatu ua e fiu i lenei olaga ma le lava o le malosi e fealua’i ai, mafaufau i le tagata ua matua le mafai lava ona gaoioi. O le a latou tuuina mai soo se mea ina ia mafai ai ona fai le mea o loo e faia. O le mea moni lava lena. Ioe-tatou te feagai uma lava ma lu’itau. Ae peitai-o a’u lu’itau e le tutusa ma a outou lu’itau. O a outou lu’i8tau e le tutusa ma lu’itau a le tagata o loo latalata atu ia te oe ma isi lava mea. 

O le itu e tatau ona tatou faafetaia  i se tasi itu o le meaalofa o le ola ma le mea moni e faapea o lea tatou te iinei i le asŏ. O le mea lea-e ese ai tali-tiga, musumusu se tatalo o le faafetai i le Atua Silisili Ese mo le aumai o i tatou i lenei aso. Faafetai ia te ia mo vaifofo mo ia faafitauli. 

.Ma ia mafaufau i le asŏ o se meaalofa, o se aso tau tele e faamanatu ai le maua o le ola. O ai na fai mai e tatau ona tatou faatali mo tatou aso fanau e faamanatu ai ? Fesili i le ‘au-matutua o loo outou mafuta ona latou ta’u atu lea e faapea o aso uma lva mo i latou o se meaalofa lea. Latou te faafetai lona uiga.

Ma e tatau ia i tatou uma ona tatou faia faapea. O se mea itiiti poo se mea tele, e tatau lava ona tatou faafeetaia. Ia tatou faafetai tagata o loo tatou mafuta; ia tatou faafetaia o tatou aiga, ekalesia, nuu ma uo lelei. Ia tatou faafetaia o tatou taitai i totonu o le malo, ekalesia ma nuu. Afai o oe o se tamā, ia e maua le loto faafetai i lou to’alua ma le fanau. Afai o oe o se tina, ia e faafetaia lou to’alua ma le aiga. Afai o oe o se taitai i lea fea lava matatā, ia e faafetaia tagata o loo i lalo o lau taitaiga. You cannot be a leader unless you have people to lead.

.Afai o oe o se faife’au, ia e faafetaia sui auai o lau ekalesis. Afai o oe o le pule o le galuega, ia e faafetaia tagata uma lava o lau fale faigaluega , e o’o lava i lalo i le alii poo se tamaitai na te faamamaina le fale’ese. E tofu tagata uma ma lana e fai. 

 Ia tatou faafetaia foi a tatou faafitauli ma tagata ua mafua ai ona faigata le olaga.

Mafaufau ia i latou e avea ma lu’itau, o se avanoa e ati a’e ai le loto onosa’i, faapalepale ma le talitiga i taimi uma. O mea uma lava o le olaga o se avanoa lea e tupu a’e ai; o le avanoa lea e aoaoina ai ma o se avanoa e faaleleia atili ai.

.E ao foi ina tatou faafetaia o tatou fili. Ua latou faia i tatou e avea ma tagata lelei. O le mea moni e faapea e tutupu mea leaga i taimi uma. E o’o lava i tagata lelei e le faasaoina ai. I totonu o Samoa i aso nei, o loo tatou uia se vaitaimi ua tofotofoina ai lo tatou lotonuu i le avea ma malo.  

Ae peitai o le itu e sili ona taua o le tatou tali atu lea i ia mataupu. O a lesona e mafai ona tatou aoaoina mai nei mea? E faapefea ona tatou suia i tatou ina ia le mafai ai ona tatou le faia lea lava mea sese i le isi taimi? Ia ‘aua nei galo ia i tatou e faapea o le olga e le faasino i le tele o taimi tatou te to’ilalo ai. Ae faasino pe faapefea ona tatou toe tutu i luga pe a uma ona tatou pa’u’ū. O iina e fua ai le amio a le tagata. 

O le mea moni, o le asŏ o se aso ese lea o le olaga. O le olaga  o le mea lea tatou te faia. Ma ia iloa e mafai ona aveeseina mai ia i tatou i soo se taimi ma soo se aso. I nisi taimi ua na o se faaupuga le mautinoa ona faaapea e sa’asa’o le olaga nei.

O le mea e tatau ona tatou faia o le faafiafiaina ma le tatau i le ola ma faaaoga ma le tatau lona vaega tele. E tusa ai ma upu a Ralph Marston: O le Asŏ o se aso uiga ese mo le soifuaga ae o le asŏ e mafai ai ona e faia ni mea.

E mafai ona e faataatia se fuafuaga, faatulaga lelei se ala, ia e su’esu’e i lou lava tulaga ma faaaoga e fai ai se tau fou. E te le manaomia se faatagata a se tasi e te soifua fiafia mai ma le matua faamalieina. E te le faatali mo nisi tulaga ia ia faatulaga i se ala lelei.” O lenei aso o se aso uiga ese lea o le soifua, e galue ai, e faatino ai ma faataunuu mea sili e mafai ona e fai. Ma o le taimi nei ia e matua pisi ai e faatino ia mea uma. 

Ma e tusa ai ma upu a le Tupu o Tavita i totonu o le Salamo: “O le aso lenei ua faia e le Alii Tatou te olioli ma fiafia ai. 

O le mea lea uso e, aveese le ita ma le loto tiga e na o lou auleaga le mea e maua ai. Faasoa atu se mata ataata, faamagalo se tasi  ma ia matua faaaoga ma le tatau lenei aso. . 

Ia outou maua Samoa se aso uiga ese, ma ia faamanuia atu le Atua!