Toe mafaufau tasi lava…O se tala moni i se tasi o tama-sasa’o i se tasi o taulaga. O se tagata lauiloa tele ma e tele lona sao i mea-fai a lona nu’u. A’o le fetu-pupula o lenei tala, e le o se faipule po’o se tagata faiPisinisi fo’i. O Keith Howard, e na o se faia’oga o le ‘Au-Solka a se tasi o a’oga, na matua tele sona sao mo soifua o isi latou te silafia. 

E masani lava ona saunoa Keith: “E ‘uma ane lava, e le taitai faia e tamaiti mea e te fai atu ai, a’o mea e te faia ma ola fo’i i ou ‘auala.” Sa ia a’oa’o ma fa’aali i tupulaga tama, le tulaga tonu e ao ona ola ai e ala i ana fa’ata’ita’iga lelei, fa’ata’ita’iga moni ma alofa ma avea o se tagata fa’amoemoeina.  

Toeititi uma le 48 tausaga o Keith o soifua i le taulaga la’itiiti o Lincoln i Alabama. “Pa’epa’e pe meauli, mauoloa pe mativa, e pei lava ‘Oe o se uso ia Keith,” o le fa’aaliga lea a le faia’oga-lagolago o le ‘Au Soka, o Chad Martin. “Leai se faia’oga-soka ‘ou te iloa, e sili atu i lo Keith. ‘Ae ina ua avea a’u ma ona lagolago, sa ia fia iloa lava pe o a’u o se tama-fai-aiga e alofa i tamaiti…Fai le mea lena ona iloa lelei lava lea e tamaiti le olaga e ola ai, nai lo na o le soka,’ o lana fa’aaliga lea.”   

Na toe fa’aopoopo mai fo’i Chad: “Ina ua maliu fa’afuase’i Keith a’o faia se tasi o matou ta’aloga, o le tala mulimuli lava na fai mai ia a’u, fai mai “’Ou te alofa ia ‘Oe”. Na ‘ou fai fo’i iai, “’Ou te alofa fo’i ia ‘Oe Faia’oga”…O la’u faia’oga, o lo’u pule ma o la’u uo-mamae le ali’i sa ‘ou fa’alagolago iai mo mea uma…a’o lea ua malaga.” 

O le mea moni, e leai se tasi o lea taulaga e le’i misia le latou tama-‘autu ina ua maliu le faia’oga-soka o Keith. Ui o Lincoln i Alabama o se nofoaga e matitiva ma maualalalo tupe-maua ma totogi, a o le finau malosi ma le fa’amaoni o Keith, na matua una’ia ai ma fa’aosofia tagata e sa’ili-tupe e fausia ai se faleta’alo tele fa’aona-po-nei mo tupulaga talavou o Lincoln. Saunoa le faia’oga-lagolago: “O Keith o se fa’ata’ita’iga-lelei, o se fautua a’o se uo-lelei. So’o se a’oga lava, e iai lava tagata fa’apea – ae o ia, ua atoatoa iai mea lelei uma.” 

E matua tele ma mananaia tala-fou fa’apea e maua i lea taimi ma lea taimi, a’o tala fa’apea i tagata-iloga, tagata-lelei i so’o se nofoaga, e matua suia ai ma manuia o tatou olaga. Na ogaoga le sao o lea fo’i ali’i o Keith mo tagata uma ae maise o tupulaga. Atonu o e silafia se tasi, po’o nisi fo’i e pei o ia i lou nu’u. Ae aupito taua, le avea o ‘Oe o se tasi e pei o ia. Tatalo nei i Le Atua e pulea atoa e Ia lou tagata ma amata ona suia o lou fatu ma lou tagata atoa, ina ia avea ai ‘Oe ma fa’ata’ita’iga lelei, e te fa’atino ai mea lelei e te gafatia mo le soifua manuia o isi. Toe mafaufau tasi lava...                                    (Fa’aliliu e Maiava).