E maopoopo Nuu i le lelei o taitaiga a Matai

Tusia Seia Soloi ,

81 Hits

O le tama ia A’ana Tovia e ma ii le afioaga o Samatau, 49 tausaga le matua.

O le tama ia A’ana Tovia e ma ii le afioaga o Samatau, 49 tausaga le matua. (Photo: Sei’a Soloi)

A maopoopo faiga nuu e ala i le galuega mamalu a Alii ma Faipule, e le taumate le manuia ma le ola saogalemu ai o soo se tagata e ola a’e i totonu o le nuu ma le afioaga.

Ma o le mamalu foi lea e mafai ai ona taitaina ai pulega a Tina ma Tamaitai i mea fai i totonu o le nuu i le latou pitolaau.

O le manatu maualuga lea o le tama ia A’ana Tovia Meleisea o lona ia talitonuga e mafua ona maopoopo soo se nuu ma se afioaga ona o le lelei o faiganuu, o matai e faauluulu ai aiga ma nuu.

“O la’u ia maitau iai, e pei e mamalu atu ai faiganuu i nuu i tua nai lo aiga o lo’o aumau i le taulaga aua e maua mea uma i nuu i tua ma le fiemu ma e iloa foi ona ola sefe ma iloa faaaoga tatau mea uma’

O le tama ia A’ana Tovia e ma ii le afioaga o Samatau, 49 tausaga le matua o lona talitonuga e sili nuu i tua e maua ai le ola saoloto i mea ua maua

“Maua aufai ma le pusaapa e auaua’i mo le fanau, o le cashpower $20 ma le pili o le vai e $20 maua mea uma ma le fiafia i nuu i tua toe ola saoloto ai le tele o tagata” o lana tala lea i le Fofoga o Samoa

E iloa se faiganuu lelei e ala i le mamalu o le taitaiga a Alii ma Faipule, o le faauluuluga ia o soo se afioaga.

‘E tai masina ma faia fonotaga aua le talanoaina o tulafono aua le malu puipuia ai o tagata o le nuu, aua soo se afioaga lava e iai lava tapu aua le ola ai o tagata o le nuu, ma a tulai mai foi se faaletonu i totonu o le nuu o lo’o iai lava le pulega a matai latou te faia faaiuga aua le nofo lelei ai o soo se tagata.

Ua le gata na’o le galuega a Alii ma Faipule, ae o lo’o iai foi le pitolaau a Tina ma Tamaitai o lo’o faia ina ia fesoasoani ma soosootauau ai aua le tausiga lava o le va nofo lelei a ii totonu o le afioaga

“O Tina la ma Tamaitai latou te faia tulafono patino lava i teine ma o latou lavalava i lenei vaitau aua ua tatou lau silafia uma le tele o suiga ua iai nei e ala lea i lavalava, e tatala lava le avanoa pe a oo i Apia ae o totonu lava ia o le nuu, e faia lava tapu aua le ola mamalu ai o tamaitai o le nuu.

I le maitau ai a le tama ia A’ana, o le ala foi lea e ala ona naunau ina ia maopoopo pulega a Matai o le afioaga pe a tulai mai ni vevesi i le lotoifale o aiga o le afioaga

“O le ava fatafata lava mea uma i totonu o le va nonofo ai ma tagata o le nuu e le pei o Apia tele faalavelave ua tutupu mai ai ao i nuu i tua o le mamalu lava o le puipuiga a Matai o le nuu, e saogalemu ai soo se tagata o le nuu.

O le maua a le tama, e sili ai lava le aumau a ii nuu i tua nai lo nuu tu i le taulaga aua e maua ai maopoopoga o tagata o le afioaga ma ana galuega fai

“E tagofia uma lava e le saofaiga a matai soo se tagata o le nuu e oo lava i tupuaga talavou e faia lava tulafono mo le ola saogalemu ma le nofo fealofani.

© Samoa Observer 2016

Developed by Samoa Observer in Apia