Ia lava tapena tagata uma!
O le alo atu ai o le tele o nu’u ma afio’aga ta’itasi mo le Kirisimasi ma le Tausaga Fou e ese’ese lava e pei ona ua maitauina i lenei masina.
Ae mo le tina i a Vaileti Tupa’i, 41 le matua o le soifua o Faleula, e leai lava se isi fiafiaga sili nai lo le fa’afetai ai i le Ali’i i le ola ma le malosi ua mafai ai e le to’atele o na aulia mai ai lenei tausaga i le manuia.
“Ia e pei ona tau mai ai o lenei ua tapena ‘a’ai ma le tele o aiga i totonu o Faleula nei aua le asiasiga i le Aso To’ona’I o lo’o lumana’i nei.
“O la matou asiasiga a le Ekalesia Mamona ia e faia lava i tausaga uma, aua o lea le masani ai i tausaga uma e le gata la i vaega nei ae o lo’o i ai fo’i ma asiasiga i fuala’au ‘aina.
“Ia o le auga atoa o lenei fa’amoemoe e mo le tapenaina lava o totonu o aiga, e ese fo’i la lo’u fiafia i ai i le fa’atinoina ai o vaega nei aua e leai se aiga e tamala mai ai.
“Ia lava tapena tagata uma.
“O lea le auga autu o lenei vaitau.
Na ia fa’ailoa o lea le tele o fa’ailoga o le manaia ai o tapenaga o le Kirisimasi i tausaga uma.
“E pei e le gata ina tapenapena aiga ia ae o le mea e pito sili lava ona taua o le talia o le pepe fou o le Kirisimasi.
“O ia lea o lo tatou Ali’i Fa’aola na maliu lava ina o tatou maua le fa’aolataga.
“E le gata la i nei tapenaga uma e pei ona fa’ailoa muamua atu i totonu o si o matou Ekalesia ia ae fa’apena fo’i tapenaga i totonu o si o matou aiga.
“O lo matou aiga ia o tausaga uma lava e fai ai le se’i, ia e manaia ia aua fo’i e fia va’ai ai lava le tagata ia i lana meaalofa mai le isi tagata.
“O lea fo’i po e tatala ai mea’alofa ia e omai fa’atasi uma ai le aiga, e fiafia, e fa’afetaia le alofa o le Atua ona o le pepe Fou, ia ma tatala ai lava meaalofa a le tagata ia.
“I a te a’u ia o le agaga fa’afetai lea foi ua uma lenei tausaga i feau tiute ma galuega.
“Ia maua e Samoa uma se Kirisimasi Fiafia ma le Tausaga Fou Manuia.