Tālia pea se tali a le malo

By Vatapuia Maiava 20 September 2016, 12:00AM

“O le mea lea e i ai ua matua’i fiu e tatali se tali mai a le malo i le tele o talosaga na tu’uina  mo le vai i uta neie leai lava ma se tali mai,” Kerisiano  Fale o le afio’aga o Leulumoega-Uta i le fa’atalatalanoaga ma le Fofoga o Samoa i le aso ananafi.

Na saunoa Kerisiano, 64 le matua o le soifua e fa’apea, o ia ua leva ona nonofo ma lona aiga i vaega nei o le afio’aga ae o le   fa’afitauli o lo’o feagai nei – o le leai o se suavai mai le tele o tausaga.

 “E leai se suavai ua o’o mai i tua nei.

 “Ua laki o lea ua uma ona fai le ta’avale e la’u mai ai le vai mai tai, aua o le mea moni lava na masani ona fai e la’a i tai ma tauamo mai i uta i’inei le suavai.

 “Ua silia ma le 40 tausaga talu ona o matou i uta nei ma o le fa’afitauli lava lea o lo’o feagai  ma i matou, aua o le tele o aso ua alu, ia na o le alofa i tamaiti aua e tutuli i tai e amo mai paelo vai.

 ‘Ua fiu e talosaga le sui faipule ma e pau lava le tali o lea o le a o’o mai le vai ae o’o mai lava i le taimi lenei e leai se mea o faia.

 “E o’o lava i moli i le auala, e lipi ola….aua o le talosaga mo moli auala ona o le va’ai alofa i le fanau ona o le pogisa o le auala i le taimi e usu ai.

 “Ia ua faifai talosaga ua tauau na sau ai ma le tiga o le ulu – ia o’u mafaufau atu, ia e sili ona tu’u ia latou e fai lo latou fiafia.

Na ta’ua e Kerisiano o ia ua lelava saini le mau pepa e o’o atu ma le tele o ofisa a le malo.

 “Ina ua tu’uina atu i le malo le talosaga mo se vai i nai tausaga e le’i mamao atu, ia na o’o mai ma fa’asaini le tele o tagata i uta nei…ia ua leiloa po o fea o tia’i ai le tele o na mau pepa.

 “Ia o lo’o i ai le tane vai na matou fa’atauina, o le mea malie, na aumai tane vai ma fa’a’auala mai i se tasi o sui ina ia tufatufaina e aunoa ma se tau , ae o’o mai i a’i matou ua $300 i le tane e tasi…ua fai ai le pisinisi a le laititi lea na ave ai tane, ia ae ua fa’atau lava ona ua o matou iloa e leai se isi fa’amoemoe  i ai.

 “Ua tolu nei tausaga  o le tanevai.

E ui i le tele o le mau ta’utinoga i le taimi o le palota ae e o’o mai i le taimi lenei e leai ma se mea e tasi o fa’atinoina.

 “Ia o lena, le tulaga o lo’o i ai nei, e mo le silafia ai e leai ma se isi o faigaluega o le aiga nei , o le mea lea e i ai ia o le galue lava aua le aiga ma lona tausiga.

 “O lo’o i ai le fanau i atunu’u i mamao, ma o lo’o fesoasoani mai i e tele o vaega, ia ae le’o taimi uma.

 “Ia a’u ia e le lelei lea mea o le vili so’o vili so’o e lafo mai tupe aua o lo’o tele fo’i  a latou fuafuaga o lo’o fai.

O le isi tulaga o lo’o feagai ma Kerisiano o le pe pe lea o moli o le auala, ma ua fai ma faigata i nisi o lana fanau i le po aemaise le taimi e usua’i ai i aoga ae le’i malama lelei le taeao.

 “O le mea lea e i ai ua sau le lelava e talosaga so’o i le malo, pe sili ai lo’u alu i se isi faigamalo.

 “Na i ai fo’i le aso na omai ai fai mai e totogi le $60 mo le moli i luma o le auala..ae o la’u va’ai i le moli e pei se moli ua uma ona fa’aaoga.

By Vatapuia Maiava 20 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>