O LA’U TALA FO’I

20 July 2016, 12:00AM

1. Matuina i Tala Fou se ulutala fai mai-“O LE LUMA O LE ATUNUU”-ma o lea ulutala e peiseai e afua mai se faalavelave lea na toso faamalosi ai e le pagota o Lauitiiti Tualima se tamaitai mai Ausetalia o Angie Jackson. 

O le tulaga mata’utia la o lenei tala- e peiseai ua otegia ai e le Palemia ma faatonu sia tamata’ita’i na afaina ai-ma ua talau ai fua ma le faatoa alu ese o Samoa mai le lisi o atunuu e maulalo lo latou atiina a’e…! 

Fai mai la le Palemia-e le faapea e te sau mai Ausetalia ona pei ai lea o Samoa nei o Ausetalia…! A tilotilo la i lenei tali ma le faaseā a lea tamaitai-‘e matua vala lava i Sini ma le faaupuga a le Palemia’! 

O le fesili la-“O le a le mea a Ausetalia e fai i pagota sosola i tua a Samoa? Sa tatau ona fai i lea tamaitai-“Ua ‘ou matua le iloa lava se mea e fai i lea faafitauli” ma o le tali sa’o lava lena.O le a foi le mea o le a toe o mai ai Ausetalia e vaai a tatou pagota-ae o lena foi e aumai e Ausetalia fesoasoani ia Samoa? 

Afai la ua le iloa e le Malo se mea e togafiti ai le faafitauli lea o le sosola so’o i tua o pagota-o le tali-‘faamavae loa ae o atu se isi faigamalo e iloa togafiti le faafitauli! 

O le fesili-o anafea na tulai mai ai ni faafitauli faapenei-a’o leaii ni vaega faaupufai? E mafua uma nei faafitauli-ona o le fai vaega! O lona uiga-ua le toe mafai e sui usufono uma na filifilia e le atunuu-ona filifili faatasi ma fai se tonu lelei e tasi-e fo’ia ai lea faafitauli! 

O le a le mea ua tupu i le falepuipui fou sa ta’uta’u nei? O le ata ua manino mai e peisea’i- a ta’u lava-ia o lena ae leai se mea e tasi o faia.  

Afai la o loo totogi tagata e vaaia le ‘falepuipui’ae sosola lava pagota i fafo-o lona uiga-‘e le o maua tagata tonu ma le talafeagai ai-e faafoeina lea matafaioi! O le a sou taofi? 

2. Matauina foi i Tala Fou se ulutala  fai mai ua tuua’ia le faia o faiga sese i totonu o le falepuipui-ma o lea ua talosagaina ai e faletua o se alii o loo falepuipui- se fesoasoani!

O ia la faiga sese e pei ona faaalia e le faletua o lea alii o loo falepuipui i le Samoa Observer- fai mai  o le faaaoga sese o pagota ma le fasi tagata- aemaise ai- o le soli o aia tagata faale- tagata. Ona o lea itu -na talosagaina e lea tamaitai se su’esu’ega i ia tuua’iga. Fai ma sa fasi lona to’alua i totonu o le Pa Sima e isi pagota e to’afa…..! 

O lea la tulaga- ua talosagaina ai e lea tamaitai-se fesoasoani mo lona to’alua o Ropati Nauer! Ia –afai la e moni ma faamaoni nei mea e pei ona lipotia-o le fesili-“O LEA LE POGAI?! O ni pagota na avatu e fai ma polotu’i a isi pagota? 

O ai na faatagaina ia faiga? 

O le Pule o le Falepuipui poo se isi lava tagata? Afai la e moni ma faamaoni nei tuua’iga-o le fesili la-“O le a tonu lava le ata o Samoa o loo aumai ai? A toe faaupu-“O le a le ata o le faigamalo o loo aumai ai? 

Pule lava oe ia ma latu tali-ae o la’u tali-“O le ata lenei o le matua le mafai lava e le faigamalo o loo i ai nei-ona toe togafiti le tulaga mata’utia o olaga o tagata! Silasila i le faateteleina o solitulafono i ona po nei? O ai e mafua ai? 

Silasila i le gaoi, talepe fale-toso teine, mata-i-fale ma le isi anoano-o ai e mafua ai? A faapefea ona le pi’opi’o tagata- pe afai e tausolomua i le faigamalo ona faimea pi’opi’o? O silafia ‘ea e le atunuu-ua laumanu’ia le igoa o Samoa i atunuu e mamao i mea mataga ma le faalumaina? O le a sou taofi? 

Matauina pea le toatele o le atunuu ma le latou mau faifai pea i le taugata o le soifuaga ua i ai nei.O le toatele la o i latou fai mai pe aisea ua faapea ai! E mafua ona fai mai- o ia aso sa maua se oloa i le sisipeni poo le seleni ae ua le toe i ai lava se mea faapena i aso nei! O le latou matau foi fai mai ua taugata le soifuaga ae peiseai ua matua le tutusa lava oloa o aso nei ma le lelei o oloa i aso ua mavae! 

O isi ua o’o lava ina fai mai sa sili atu ona manuia i aso ua mavae i lo ona po nei! Fai mai o ta’ita’i o le atunuu i aso ua mavae-o ni tagata “faaola totoga” i soo se mea! Fai mai e leai se tagata Samoa sa fealua’i solo i le Taulaga e ‘aisi ai!  

Sa leai foi se mea faapenei o le tutuli o tamaiti e o faatau atu oloa i luga o alatetele-ae le o i le a’oga! Sa leai foi ni aiga e faapea e le lava a latou tupe e ola ai-aua sa la’u i fafo le fa’i. talo, taamu ma le anoano o oloa e pei o le kofe, popo ma le koko. 

Sa fai foi fale e gaosi ai mea inu ile sua o le pasio, mago ma le fala! I le taimi nei la ma le manatu o le to’atele-o lenei tulaga mativa o le atunuu e faatetele! O le pogai-ua leai se fa’i, talo, popo ma le koko o toe ave i fafo! 

A le faigaluega lava la le tagata ia-pe maua mai se tupe i aiga ma fanau i fafo-e le taitai ona kea i ai le faigamalo-vagana ai lava o latou manuia! Aisea la ua siitia ai le Tau o le Soifua? O le tali- ‘e saili ai tupe a le Malo! O le a sou taofi?

20 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>