O aiga lava e faigofie ai le olaga

Tusia Aruna Lolani ,

22 Hits

Sinatailua Wright mai Leauva’a Uta ma le tasi o alo a lana fanau.

Sinatailua Wright mai Leauva’a Uta ma le tasi o alo a lana fanau.

O Sinatailua Wright e sau mai Leauva’a uta ma sa ia ta’ua i le Fofoga o Samoa lona fiafia i le olaga ua iai nei lona aiga.

“So’o se tina a ia, e iloaina a le fa’amoemoe o le fanau ia te ia e tusa lava po’o le a le matutua ua iai. E o’o fo’i la pe a maua a latou fanau, o le mea a e tasi. O le li’o lena o le olaga.

 “E faigata le olaga ae ou te fa’afetai a a’u ia i le fanau aua o lo’u manuia tele lenei ma o latou fo’i lea o lo’o fa’amalosi au i a’u galuega fai i aso uma.

Sa ta’ua e Sinatailua o latou o se aiga e le tele ni a latou mea e maua aua na’o ia sa avea ma alagatupe o lona aiga. E ui lava ina faigata ae sa ia taumafai pea e galue malosi mo lona fanau.

O Sinatailua o ia o se tina ma se faia’oga i le aoga a Malie.

“Sa matou le maua se vai fa’apea fo’i se eletise ae lea ua matou maua.

“Sa matou nonofo i le ‘aai ia a’o lea ua matou omai i uta nei e atia’e atu ai le isi matou fale ae ua amata fo’i ona fa’ateteleina le matou aiga aua o lea ua fai aiga uma la’u fanau ma ua fai fo’i latou fanau. 

 “O le fanau a sa ave ai le fa’amuamua ia o lea la ua tu mai tofi lelei ma ua maua ai fo’i se fesoasoani i le aiga.

Sa fa’apea mai lenei tina o lana fanau uma ua faigaluega, to’atasi o lo’o faigaluega i le fale talimalo o Sheraton ao lesi to’alua o lo’o avea laua ma faia’oga.

“E matutua a si a’u fanau ae e fa’alagolago mai lava ia te a’u. E mana’omia a e so’o se tamaitiiti lona tina po’o lona tama tusa lava po ua fai aiga. Ou te fiafia fo’i la iai, aua ou te fia galue a a’u ia mo lo’u fanau a o maua lenei malosi mai le Atua.

Sa ta’ua fo’i e Sinatailua, o lo’o sauni nei fo’i oloa o lona faleoloa lea la’a amata na atia’e aua se si tupe maua.

“O a’u o se tina glaue ma ou te talitonu e maua a lo’u fale fou i se aso a sau i a’u a ia galuega.

“O le olaga lenei taimi o lo’o lelei lava ma ou te fa’afetaia lava le Atua mo mea uma ua matou maua.”

© Samoa Observer 2016

Developed by Samoa Observer in Apia