E leai a sesi sa fa’apea e faigofie le fai fa’ato’aga

Tusia Aruna Lolani ,

23 Hits

Otineru  Faleiva mai Alamotu Saleimoa.

Otineru Faleiva mai Alamotu Saleimoa.

E le mafai ona tatou toe le amana’ia le taugata o le soifuaga. O le taimi lenei tatou te toe fo’i ai i le olaga sa amata mai ai tagata Samoa.

O le fa’atalatalanoaga a Otineru Faleiva, 45 le matua o lona soifua, mai le nu’u o Alamotu Saleimoa, ma le Fofoga o Samoa, sa ia ta’ua mai ai le taua o le olaga fai fa’atoaga.

Sa maua atu lenei tama a’o fa’atau ana esi ma koko Samoa i le itu o le ala tele.

“Ia o esi ma le koko Samoa a lea e fa’atau aua le tau su’eina o se tupe,” sa ia fa’apea mai.

“O isi taimi e fa’atau ai fa’i ma isi meamata o le fa’ato’aga pea fai ua ola lelei.

“E leai sesi o le aiga e faigaluega ma o lo’u aiga, ua na’o le tina ole aiga (to’alua) ma le ma fanau e toa’tolu o lo’o a’o’oga nei i le Kolisi o Sagaga.

 “O le mafua’aga lea o lo’o fa’atau ai meamata aua le totogiina o pili aoga ma pasese o le fanau.

Sa fa’apea Faleiva e tele a le fesoasoani e maua mai le fanau mo le ma’umaga pea  tu’ua a’oga.

Ina ua fesiligia lenei tama ini fa’afitauli po’o ni lu’itau fo’i o lo’o feagai ai o ia i le olaga faifa’ato’aga sa ia fa’apea mai “ua to’atele a le au fai fa’ato’aga ma ua o’o fo’i i se itu fo’i lele ua tautava uma tagata i meamata e fa’atau atu.

“E iai a la taimi e sikuea ai le matou tupe maua, e iai fo’i taimi e gau ai matou.

“A e mafaufau la i le 20 o talo i totonu o le ato talo lea e fa’atau atu ae a o’o i le taimi ua mana’omia vave ai e le fai fa’ato’aga le tupe, ia ua fa’atau lava i le $10-00. A’o e tele le matou afu lea e alu ai i le totoina o le talo ma e le’o se galuega faigofie fo’i.

“E ese le faigata ona toto ma tau fa’aola ae toe faigata pe a taumafai e tau fa’atau ese atu i se tau fetaui ma totoe.

“Ia o le olaga a ia e fa’apena, o ai fo’i sa fa’apea mai e faigofie se olaga fai fa’ato’aga.

Sa fa’apea mai Otineru pe faigata i fea le olaga fai fa’ato’aga, e sili atu ia ia lea galuega.

“O le meatotino a lea a Samoa e fa’alagolago ai lo’u aiga mo mea’ai ma e lelei fo’i lea aua e fa’amanatuina mai ai ia tatou, o le olaga a lea o le Samoa.

© Samoa Observer 2016

Developed by Samoa Observer in Apia