A’oa’iga lelei ua fai ma fa’ata’ita’iga

By Sarafina Sanerivi 20 February 2017, 12:00AM

“O le usiusita’i lava e maua mai ai manuia,” 16 tausaga, Darryl Roache o Vaitele-Uta i le fa’atalatalanoaga ma le Fofoga o Samoa.

“O a’u o lo’o i le  Tausaga 10 o le Kolisi o Avele i le tausaga lenei,” o lana tala mai lea.

I lou olaga mai a’o e laititi?

“Ia ou te ola ane ou te  va’ai lava i le tinā o lo’u tamā e fiafia lava e alu i le lotu ma ave i matou ma nai o’u tei i le falesa.

“O lea la ua o’o mai le taimi lenei o lo’o ua taumafai lava  ina ia ou ola ai lava, ma e o’o mai lava le taimi lenei ia o lo’o ua ou to’aga ai lava e alu i le aoga ma ave nai o’u tei.

“O se fa’ata’ita’iga lelei tele lea na aumai e le tinā o lo matou tamā i a’i matou.

“E sasa matou e le lo’omatua pe a tuai ona usu i le Aoga Aso Sa i taeao uma, ia lea la ua matou matutua ma o i  Aoga Maualuluga o lea lava le tulaga o lo’o ua i ai nei.

“O lo’o mulimuli ai lava i fa’ata’ita’iga na ia a’oa’o ai matou a’o o matou laiti.

Na ia ta’ua e leai lava ni fa’afituali  o lo’o feagai ma ia i aoga i le amataga ai o lenei tausaga.

“Ia ou te iloa lava e a’u e pau lava le tulaga e fai ma fa’afitauli i le tele o taimi, ia e fai lava ma ou le usita’i i o’u matua, ae alofa lava nai o’u matua i a te a’u.

“O nisi o taimi, ua ai fo’i le salulima ia ae o le tele lava o taimi e otegia a’u e lo’u tinā ma  fai mai o le usita’i lava ma le fa’alogo ou te maua ai le mea lelei.

“Ae o vagea uma lava, o lo’o solo lelei lava.

O a mai le amataga o le aoga i lenei tausaga?

“Ia o lea  fa’atoā amata, ma o lo’u iloa i ai, ia o lea lava o lo’o ua lelei le amataga, e leai lava ma se mea o fa’aletonu.

“O lea fo’i ua amata lenei tausaga , ia ou te iloa o le to’aga lava e fai mea aoga ia e maua ai se tulaga i le fa’ai’uga o le nei tausaga, e pei ona fai mai si o’u tinā ia o le   fa’alogo lava ma usita’i.

“O le itu e pito sili lea ona lelei.

O le a se miti o i a te oe?

“Ia ona o si o’u tamā e inisinia tau suavai, ia o lea fo’i le manaoga o lo’o i a te a’u pe a ou matua,  ia avea ai a’u.

“Ou te iloa o se galuega e le faigofie, ae ou te fia mana’o pea ou te taumfai ia ou ausia, se’i o’u tofo i ai le tigaina o lo’o fa’atino e si o’u tamā ina ia mafai ona o matou maua ai le ola ma manuia ai a matou aoga.

“O le itu lava lea o lo’o i ai le taimi lenei, ia taumafai lava ia ou tama lelei, ia i’u lelei la’u aoga, maua le galuega e fesoasoani ai i o’u matua aemaise o nai o’u tei laiti.

O Darryl o ia o le lona tolu o le fanau e to’aono a ona matua.

By Sarafina Sanerivi 20 February 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>