1. Matauina i Tala Fou se mataupu sa i luma o le Faamasinoga o Talosaga Toe Iloilo-lea na talia ai e lea Faamasinoga ni faamatalaga molimau fou na tuuina atu e Kirita Maria Kolokika Pune- e faasaga i le Loia Sili a le Malo- lea ua faamavae mai le tofi o le Loia Sili.

O le tagi la a lena tina matua- e faapea na faasaga muamua i le Matagaluega o Puna’oa Faale-Natura ma le Siosiomaga ma le Loia Sili muamua a le Malo-ona o se finauga e uiga i le faaliliuina atu o se fasi fanua i Tuloto.

O loo tuua’ia la Aumua poo le Loia Sili muamua a le Malo -talu ai lona soli o ona tiute faale-tulafono ma lana auaunaga- sa tatau ona ia tuuina atu i le Itu Talosaga.Na tuua’ia e faapea o le Loia Sili muamua a le Malo na ia fautuaina le Matagaluega o Puna’oa Faale-Natura ma le Siosiomaga-ina ia aveese se taofiga faale-tulafono sa puipuia ai lea fanua.

O le mau la a Pune fai mai o lea soliga o le tulafono ua tulai mai ai le fete’ena’I o aia tatau –talu ai- ona o le Loia Sili o Aumua -o se tagata fai sea i le kamupani lea na faatauina lea fanua! I le faamasinoga la ananafi-na talia ai e le Alii Faamasino o Fisher ia molimau fou! Ia o se tala umi lenei tala –ae o le mea moni lea ua tatou iloa nei i Samoa-ua matua pisia tagata uma o Samoa-i faiga pi’opi’o a le Malo! E faapefea ona tulai mai ni tagata faapenei i tofi maualuluga o le atunuu ae le mafai ona latou faatinoina le amiotonu ma le faamasinoga? O le a sou taofi?

2. Matauina foi i Tala Fou le afaina o se tasi o aiga i ni faiga a se tagata taufaasese ma le pepelo!

O iinei foi la ua tatou iloa ai le maoa’e o le atamamai o nisi tagata o Samoa i le taimi nei- i faiga tau faasese ma le faimea pi’opi’o. E aliali mai la o se tasi lenei o auala poo faiga ua faigofie ai ona maua e nisi mea o loo latou manaomia! Ia-e moni lava e taua le alofa i le uso- a -tagata-ae o le fesili-o se taui lea o le alofa atu? Afai la ua matua a’oa’oina le toatele o tagata Samoa i nei faiga-ia atonu ua sili ona aoga lea i nisi ona ua matua malosi le mativa ma le fia’ai! E le fia alu e gagau le vao ma fai se ma’umaga leaga e tigaina ma afu ai-ae lelei lava ma faigofie le ola tau faasese! Ae ui o lea fai mai le isi toeaina-“e lelei lava ae ‘aua le fai sooa! O le a sou taofi? 

3. Matauina i lenei taimi le fiafia o isi sui faatutu e faaulu tagi e faasaga i isi sui faatutu mo le faiga-palota! Afai o ni sui faatutu mai se itumalo e tasi-aisea ua fai ai lea faiga o le tagi o le tasi sui faatu mo le palota ina ia taofia le isi sui faatu?

O fea aia tatau e taulagi soo nei? Afai la o le fesiligia o le tautua e mafua ai-o le a la lea ituaiga o tautua? O le tautua faale-aganuu e fia tausaga lona umi? A faapefea ona fesiligia e le tasi sui faatu le tautua a le isi sui faatu-ae a vaai i le toatele ua avea nei ma matai-na te lei faia se suavai i lona olaga atoa! O se mea talafeagai la le fesiligia e le tasi sui faatu o le tautua a le isi sui faatu? Faamata ana le seanoa le Palota-e leai lava se isi na te fesiligia le tautua a le isi. E to’afia ni ta’ita’i o lo tatou atunuu i le taimi nei sa tautua tuāvae pe sa tautua matavela-ona faatoa sau ai lea Faipule? O le a sou taofi? 

4. Matauina foi i Tala Fou le teena e le Palemia o faiga faavalevalea!. O lea la faaupuga a le Palemia e faasino i le fuafuaga a le Tautua Samoa Party-ina ia faataga tagata Samoa uma o nonofo i fafo e palota mai le mea o nonofo ai mo Faiga Palota Lautele!

O lea la ua faailoa mai e le Palemia ananafi- fai mai o taimi uma lava e avea ai o ia ma Palemia-na te le faatagaina le faia o lea mea faavalevalea! O le fesili la-na faapefea ona iloa e le Palemia e faavalevalea lea mea? A toe faamalamalama atili le fesili-o le faigamalo a ai lea na faatagaina muamua tagata Samoa o loo nonofo i fafo-ina ia palota mai iinei? O manatua sa palota tagata Samoa o loo i fafo ia tatou faiga-palota-ae o ai na taofia?

Afai la o le HRPP na faatagaina muamua tagata Samoa o loo nonofo i fafo e palota mai i Samoa nei-ae na toe taofi-o le a le pogai? Na taofi ona o se mea faavalevalea pe leai? O le popole la o le Palemia i le palota mai o tagata Samoa o i fafo ia tatou faiga-palota-e le o se mea leaga-talu ai -o le faatinoina lena o aia tatau a tagata Samoa o loo i fafo! A o mai la tagata na e palota iinei-ona faatoa mafai loa lea ona taunuu le faamoemoe o le Tautua- ina ia sui le faigamalo! Aisea?

O tagata tonu lava ia o loo malamalama lelei i le tulaga o loo i ai Samoa ma le pogai atoa o le mativa ma le fia’ai! O latou na o loo tigaina e la’u mai tupe ma isi mea e tausi ai o latou aiga, ma soo se mea fai a nuu ma itumalo! O le pogai la lena o le popole o le Palemia-leaga o tagata Samoa o loo i fafo- e malamalama lelei lava i le pogai o le mativa ma fia’ai ua i ai nei Samoa- e pogai mai faiga pi’opi’o a le faigamalo! O le a sou taofi?