Lauga - “A o Noa, ua alofagia o ia e Ieova”

Tusia Rev. Petaia Setu ,

118 Hits

Rev. Petaia Setu

Rev. Petaia Setu

O le upu a Solomona, o le atilii poto e fiafia ai le tamā. O nei foi aso a lelei lau taalo i soo se taaloga, e le gata ina ta’uta’ua ai oe, ae e aloa’ia ai foi oe. e faapena foi i galuega. Afai e maualuga lou tulaga, e amana’ia ma faaaloalogia oe e tagata. a lelei foi lau amio ma e tausaafia, e viia oe ma alofagia. Fai mai le tusitala o le Kenese, ua silasila atu Ieova ua leaga tele lava tagata i le lalolagi. A o Noa, ua alofagia o ia e Ieova. Aisea?

O a ni mea o luuluu e Noa i le Atua? Ua fai ni ana faatosina ina ia sao ai? O loo tā’ua i le lesoni le salamō o le Atua ina ua ia faia tagata i le lalolagi, ma ua tiga ai lona finagalo.

Ua matua leaga amio o tagata ma mea uma latou te fai. O manatu uma ua mafaufau ifo ai i o latou loto ua na o mea leaga lava i aso uma. I le, ua tatau la ona tiga le finagalo o le Atua. Aua e le o ni foliga na o le Atua. E le o ona uiga ia. E leai se leaga i le Atua. O le Atua e atoatoa ona lelei o ia (Mat.5:48). O lona natura e paia, e mamā, e faamaoni ma amoitonu. O le uiga la lea o loo atagia mai i le tagata lea o Noa, ua afua ai ona alofagia e le Atua. Ua faapea le tala, o Noa o le tagata amiotonu ma le amio sao. O lea uiga paia ma le tausaafia sa soifua ai le tamā  nei, na aloa’ia e le Atua, ma la feoai ai o le Atua ma Noa.

E taua tele le feoai ma le Atua. E tatala mai ai faamanuiaga silisili a le Atua ia i tatou. E mafai ai foi ona tatou vaai tino ma molimauina lona mamalu i galuega uma na te faia. Ae pagā lea, e le mafai ona tatou feoai ma le Atua pe afai ua le alofagia i tatou e le Atua. Ae o le a faapefea ona alofagia oe ma au e le Atua pe afai tatou te le amio Atua? E le mafai ona alofagia oe e le Atua pe afai e te le o tausia ana poloaiga ma olaina lona finagalo o loo a’oa’o mai ai pea lona Agaga, e ala i lana Afioga Paia ma le folafolaina o le talalelei o le faaolataga.

O Noa na faasaoina mai e le Atua mai lana tupulaga. Na laveaiina lona  aiga     ona o lona faamaoni ma lona mata’u ia Ieova. O lana tofā faatoeaina lea. O le tofā sa taoto i le pule ma le faasinomaga mai le Atua. O faamanuiaga silisili o lana tofā, o ia sa faa’autagata iai le lalolagi fou. Ua fai ma tupuga o lo tatou nei lalolagi. O le tama na tofi. Na filifilia e le Atua e fai ma ola o le foafoaga fou. O le  ulu o le Amataga fou.

Manatua, o faamanuiaga ia na maua mai i le feoai ma le Atua;  pipii ma mafuta i le Alii;  faatuatua ma faamoemoe i le Atua ; faamaoni ma mata’u ia Ieova.

Silasila foi ia Iopu. O se tamā sa maoa’e ona tala e afua i ona tiute faa-tamā i totonu o le aiga. E lima ola i mea fafaga, o faatoaga. E faamaoni i mea uma na foaiina iai e le Atua. Na te a’oa’oina lana fanau i le va fealoa’i ma ola fealofani. Na te taitaiina lona aiga i le olaga tapuai i le Atua i aso uma, atoa foi ma le faatinoina o taulaga i le Atua ona o le pelega a fanau. Sa matuā tamaoaiga i faamanuiaga a le Atua. Auā foi sa mata’u i le Atua, ma ‘alo’alo ese i mea leaga. (Iopu. 1:1-5). Sa viia e le Atua (Iopu.1:8).  E oo lava ina faataugāina i tofotofoga matautia sa fā’i a fano ai, e le i gase ai le faatuatua o Iopu. E le i avea ai le tofā a Iopu i tigā tutui ma le ogaoga sa lu’iina ai lona tulaga faa tamā, poo lona tiute faa ulu o le aiga. O le tamā na inu i mea leaga uma a le alii o lenei lalolagi, ma ia manumalo ai iā Satani. E le tioa a faaeaea e le Atua “…e leai sē tusa ma Iopu i le lalolagi” (Iopu.1:8)

Samoa e, ou te le viviia le itupa o tamā. A o tamā, e faasino iai upu a le poto o Solomona. “E afua mai mauga manuia o nuu. A lelei le pule, ua ola le nuu.” E le o tautala le poto i le vaomatua poo le sami, a o le mauga. O luga o le mauga, e manino lelei ai lau vaai i mea uma lava o i lalo. E te iloa mai luga le lelei ma le leaga; le malosi ma le vaivai; le poto ma le valea; le mativa ma le maumea; le fiafia ma le faanoanoa; le oono ma le saoloto. O mea uma e faatonu mai luga. E sau i le ulu. E leai se mea e amata atu i se siusiu. A feainai ma malepelepe aiga ma nuu, o le ulu e leaga. A taugatā le soifuaga ma āisi solo tagata, o lona uiga o loo faaletonu luga i le mauga! A mativa le atunuu ,  ma oi le ekalesia, e le o lelei le pule!

Samoa, e le o le aso o tamā e tāūa; a o le uiga ma amio a tamā i aso uma. O uiga ma amio a tamā, e malu ai fanau; e ola ai aiga; e tauleleia ai galuega, ma manuia ai tagata uma. E alofagia ai oe e le Atua atoa ma tagata. Tatou tamā, faamasani e fai lotu ma lou toalua ma lau fanau i le taeao ma le afiafi. O le mea lena sa fai e Iopu (Iopu.1:5). Ona fealofani lea ma feavatai a tatou fanau. Ona le toe faamisa lea ma amio mataga a tatou fanau. Ona lagona lea e fanau ma tatou uma le alofa faamaoni o le Atua ia te oe ma au na maliu ai Iesu Keriso, o le Ulu ia o tatou uma.

Se a se mea e popole ai pe afai ua feoai oe ma le Atua? Poo le a lava lou toaga i le lotu ma tetele au taulaga ae a e le amiotonu ma sa’o lau amio i luma o le Atua, e le aoga lava. Auā e afua ona e faia o le amiotonu ma tausia poloaiga a le Atua, ona o lou olafa i le Atua. O le amio e tauleleia ai oe. O le amio na faasaoina ai e le Atua Noa ma lona aiga. O le amio na faamanuiaina ai e le Atua Iopu. O lena foi, e fausia ai sou amataga fou ia Keriso Iesu. 

Se a se mea e te faia ina ia alofagia ai oe e Ieova?

 

Amene

7737063/7783782

© Samoa Observer 2016

Developed by Samoa Observer in Apia