Mana’omia lava se tane vai

Tusia Aruna Lolani ma Fetalai Tuilulu’u ,

49 Hits

Tautua Atesa, 57 o Tufulele.

Tautua Atesa, 57 o Tufulele.

O le maua ai o le fa’atalatalanoaga le Fofoga o Samoa ma le tamā ia Tautua Atesa o Tufulele sa ia talosagaina ai se tane vai mo si ona aiga.  

O le aso lua na te’a nei sa motusia ai le suavai i si ona fale ona o le pili $1200 tala. 

“Ia e o’o mai foi le lua polokalame i  lenei aso, o le fa’afitauli o lo’o iai nei o le leai se suavai. 

“Talu ai o le aso lua le vaiaso nei lava na tipi ai le matou vai ona ua $1200 le pili ua le gafatia ona totogi. 

“Talu ai ona si o matou aiga nei e tusa ma le to’a 10 la’u lava ia fanau ia o le tulaga lava ia i le fa’aogaina o le vai ia e fa’aoga lavai taimi uma. 

“Ia e mo’i lava e iai le fanau faigaluega, ae silafia foi, o le fanau e le totogi tetele e mafaia ia ona totogi lenei pili.

“Talu lava la ona tipi le vai le taimi nei, ia pei lava o si o matou tuaoi o lo’o fa’alagolgo iai mo le vai. 

“Ou te iloa foi e le mafai ona fa’alagolago umi foi nai tuaoi tei foi emo ane ua tipi ai a latou paipa. 

“Ia o le taimi nei, e le’o mautonu po afea tonu o le a maua ai se seleni e totogi ai le pili. 

“Ae pau lava le tulaga lea o lo’o mafaufau iai o le talosagaina o se tane vai tau na mapu ane ai. 

“E pei na le pau lea o le tulaga e mana’omia tele o se tane vai aua o matou nei e to’atele lava i le fanau aoga. 

“E mana’omia lava la le vai i aso uma e le gata foi le fanau aoga, o meaai ia ae maise foi nisi itu e mana’omia ai le suavai. 

Sa o’o lana fa’amatalaga i vaega lelei sei vagana ai le vai. 

“O lo’o lelei lava mea uma i nei. 

“Taga’i atu le pito lea i uta o lo’o tu’u mai ai le maumaga o le maumaga lena e tele na fa’amoemoe iai mo mea’ai ia a sina seleni foi pe a tele le toaga. 

“O le ave lava le fa’amuamua le fanau aua lava aso uma ma o latou olaga tuputupu a’e. 

© Samoa Observer 2016

Developed by Samoa Observer in Apia