Talitonu le tamā i le suāmalie o fua ana galuega

By Fetalai Tuilulu’u 19 March 2017, 12:00AM

O le mau mautū lava ia o le tamā o fanua ma o tatou eleele o nisi ia o mea’alofa sili ua foai i tagata Samoa ma e ao ona tatou fa’afetaia ai. 

“Ou te fa’afetai lava a’u ia ona o fanua ua tatou maua e nonofo ai.

Na maua le fa’atalatalanoaga a le Fofoga o Samoa ma Mulinu’u Mataia e 64 ona tausaga mai le afioaga o Tufulele le aso ananafi, ma sa ia fa’ailoa ai le tusa ma le 10 tausaga o galuega i lona maumaga.

“O le maumaga o le ola lea o le matou aiga, e tusa ma le 10 tausaga o matou gafa lava ma le galuega fītā o le maumaga. 

“To’atele lava tagata ua fai le maumaga ma tausi aiga ma ua tele lava ina fa’atau mo se seleni. 

“O lea foi le tulaga o lo’o o’u fa’amoemoe tele ai i le tausiga le fanau. 

“Ou te ta’utino atu, o le maumaga o le fesoasoani tele lea i totonu si o matou aiga, tou silasila atu foi o le maumaga ua ala ai ona tū le matou fale fou. 

“Ia o luga lava o le galue malosi ma le fa’aoga tatau o tatou fanua. 

Sa taua e le tamā o le fa’atinoina ma le faia o galuega o se tasi lea o galuega faigata ma le fītā o lo’o feagai ai nei. 

“O le faigata o le tōtōina o talo ma le faigata o le galue le lā ae maise foi o timuga. 

“O le maumaga foi e ta’i 3 i le 3 masina e fa’amili ai pe tōtō ai ona fa’atoa fua mai lea ma ave ai e fa’atau le maketi. 

“Ou te iloa e fai lava sina faigata le galue le maumaga peitai e fa’aosofia lava ona o le naunua e fesoasoani le aiga i le tele o mea e fai. 

O le manatu fa’alia foi le tamā ia Mulinu’u o le maumaga o se tasi le o tupe tele, aua foi ua masani lava le fa’atauina ma e iai foi tagata e masani lava ona fa’atau atu. 

“E galo lava le faigata le fai maumaga i le taimi e maua ai le tupe, ma o lea foi le itu o lo’o naunua ai lava e galue aua lava le lumana’i le aiga. 

“O lea foi le itū e vatu ai se manatu e tatau lava ona galuega ma aua le ola fa’alagolago le tasi i le tasi , ma ia iloa lelei e o tatou tagata ina ia fa’aoga tatau fanua e fai ai atina’e.  

“Fa’afetai foi ona o ni fanua ua tatou maua e le pei o nisi o atunu’u o lo’o nonofo totogi i ni fanua. 

“O nei aso, e tau le fa’amatalina lava o le galue malosi ma fa’aogā tatau o tatou eleele.

“O le fautuaga lava ia le atunu’u e le mafai ona manuia aiga pe nofoa’i solo.

“O le tele o manatu o nisi o tagata i le taugata le soifuaga e ao ona tatou galue malosi, aua ua tatou silafia lelei le faigata le sailiga o le seleni.  

By Fetalai Tuilulu’u 19 March 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>