Solo
Talofa e, ua maliliu Toa
Ua maumau ai auupega o le taua
Ua e sola ma lau ato ponapona
O lau komipiuta, fusia uma ai ou lagona
Sa lilo i manatu o le a e mou atu
Le finagalo o le Atua
E le tutusa ma o ta manatu
So’o se mea i le Aganuu
Ou te fesili lava ia te oe,
A’o lenei, oi aue! Ua gape lau foe
Aua ua lava lou iloa,
I le aganuu fa’asamoa
Ou mafaufauga, ua so’o ai le lalolagi atoa
Lau tofa ma le faautaga loloto
Molimau ai pea, “Vao Filifili Auau manogi o le lolo”
Mea uma sa e faasoa mai ai
Ua ou taiina i lo’u fatu
Ma lo’u agaga, ou te mafaufau pea i ai
Maimau e, lenei olaga
Pe ana leai le oti
Ae ui i lea, pule pea le Tupu moni
Mafutaga mafana i lenei olaga
Tuua mea uma ae alu lava na o le tagata
O le oti, o lo ta manuia lea
Oi le lagi lo ta nuu moni
E te le toe popole i se mea!
Malaga ia i lagima Tuaopepe, Faumuina, Aulaea, Aperila Faumuina
Ia maua sou nofoaga mau i le lagi i luga
Alofaaga mo tatou matua, ma aiga pele o e na muamua
Matou tapua’i ma tu’i atu le mulipapaga
Aua so ta ‘ai i le Ola Faa-le-Agaga