O le talitonuga o le tamā i a Ta’amale To’elau, 77 tausaga o le afio’aga o Sapunaoa, Falealili – e mafua ona fa’afaupu’e fa’amanui’aga o so’o se tagata soifua – ona ua ola e alofa ma atia’e le galuega ma le Ekalesia a le Atua.

O lona finagalo lea na fa’ailoa i le Fofoga o Samoa a’o ia fa’atauina ai ato talo ma le anoanoa’i o teu ma nisi o vaega i le mamalu o le atunu’u i le maketi o Fugalei i le aso ananafi.

E sefulu lua ona alo , ma na ia ta’ua ua matutua ma ua fai fanau uma.

“O la’u ia lea tala e fai i la’u fanau, a fa’amuamua le galuega a le Atua, e latou te va’ai i manuia, e fiu e fa’asoa e le mafai ona uma o latou manuia.” Ta’amale To’elau.

“E le gata i lea ae o le fesoasoani ma tufatufa atu ni mea ua o latou maua mo isi tagata…e pei ona ou faia fo’i pe a le uma ni talo ona fa’atau i le vaiaso…

“O lea ua e maitau mai ua ou matua, ae  o la’u ia lea fa’amalosi ou te mana’o i la’u fanau ina ia ola e tauivi, ma ia aua ne’i fa’alagolago i isi tagata.

“Ia ola lava le tagata mo ia lava.

Na ia ta’ua o le tele lava o fa’alavelave o le aiga ma le tele o vaega e mana’omia ai le tupe, o lo’o ia fa’atinoina uma.

“E mo le silafia, o a’u ou te le mana’o ou te aisi atu i la’u fanau pe a i ai ni mea e fai o le nu’u ma tulaga fa’apena.

“A ua alolofa mai lava ia lelei, a leai fo’i ia lelei….e pau lava la’u tala i ai, aua ne’i galo le alofa o le Atua, a’o i ai nisi o mana’omia sa latou fesoasoani ia ave i ai.

“O la’u ia molimau atu , o la’u galuega lenei o lo’o faia ai le galuega a le Atua, ma o le fe’au lava lea olo’o tu’u atu i le fanau.

“Ou te le manao ou te fa’alagolago i a’i latou, ou te iloa lava e tele a latou tupe ae leai so’u agaga ou te fa’alagolago aua ua uma ona fai ai la’u tala, a matutua aua le ola fa’apena a ia atia’e lava le aiga a le tagata.

Na saunoa le tamā, ma ta’ua ai e fa’apea e lua ni se’i a le fale ta’avale a Sigapoa na ia manumalo ai.

“Ia ua fa’atau le isi ta’avale ae o le isi ta’avale ua fa’aaoga e la’u mai ai le fa’ato’aga e fa’atau.

“Aua o le mea moni lava  o la’u Ekalesia, o le E.F.K.S. ma e le avea se isi i le falepuipui pe a leai ni mea fa’alelotu e faia…aua  e lē fa’amalosia , o lau fo’ai i le galuega a le Atua e afua mai i lou loto fiafia…o a fo’i ni vaega e fa’aletonu i le fa’aaogaina o na tupe, ia e leai se mea lilo i le silafaga a le Atua, e pau le mea tatou te faia o le galulue pea, tu’u le fa’amasinoga i le Atua i le Atua aua e leai lava ma se isi e atoatoa se lelei…e fa’aletonuga uma lava.

O lona talitonuga e o lua le fa’atuatua ma galuega.

“E ala ona mativa Samoa o le paie, aua  o le mea sa’o lava ia e le mafai ona tatalo i le Ali’i e foa’i mai le oa ma le tamaoaiga, ae uma na tatalo ona alu lea ua fa’amalū, ma moe.“E leai se mea fa’apena e mafai ona fai – e fa’afefea ona fesoasoani mai le isi tagata ma le Matai Sili i a te oe pe afai e le mafai ona e fesoasoani lava oe i a te oe.“Ia o le tali e faigofie lava – e oti le fa’atuatua pe afai e paie ma leai ni galuega e faia.