Ia fa’amama Samoa
Ia tumama i le faiga o laueleele o Samoa.
O le manatu faaalia lea a Douglas David mai Leulumoega tuai ina ua faatalatalanoaina e le Fofoga o Samoa i le aso ananafi.
Na maua atu o ia ao agai atu e aumai ni fafie e fai ai le latou afi.
“O lea lava e sologa lelei totonu o le matou nuu, leai a ni faafitauli tetel o tutupu mai ai,” o lana tala mai lea.
“Pau a lena o le faafitauli o le fai lapisi o tagata ia e omai latou taavale.
“Aua o le fanua lea, o le fanua a le tasi o matai o le nuu ma o lau a ia galuega masani lea ou te sau foi lea e asi pe leai ni lapisi sa tatiai mai fafo e tagata i le taimi o momoe ai tagata o le nuu.
“Aua ua fai ma le masani a le toatele, le tiai o lapisi i le itu lea. Ua e vaai atu, o la e iai lava pu e togi ai totonu le lapisi ae e le mafai a ona uma le omai tatiai lapisi i luga o le auala.
“E aafia ai la matou ia e nonofo iinei, aua o le manogi e le manaia ia matou.
“O le matou galuega tele la, o le pikiina o nei lapisi ma fa’aoo atu i totonu o le pu lea e iai lapisi.
“Aua a matou le faia foi lea galuega, ia e sala le matai toe sala ai foi le nuu aua o fanua ia a matou ae le’o matou ia e faia le tiaiina o lapisi i luga o le auala.
“E manaia pea fa’aaoga tatau le mea loua uma ona saunia mo lapisi ae aua le faalapisi iinei aua e tigaina ai tagata o le nuu i le manogi ma e mamai ai foi le toatele o tagata pea le fai se fuafuaga iai.”
O Douglas o loo tausi aiga nei i lona aiga; i lona tina, lona tuafafine ma lana fanau o loo aooga i le taimi nei.