Sefulu ma le ono tausaga o feagai pea se aiga ma mafatiaga
E 16 tausaga o feagai pea se tasi o aiga mai le afioaga o Saleimoa ma mafatiaga.
Sa fa’ailoa mai foi e Faatonu Afemai o le umi foi lea o latou fa’aaogaina lava pepa iila lapopoa e fai ma tapoleni e tali ai le timu mai le sao mai i totonu o le latou fale pe a oo ina loulouā le tau.
E le gata i lea a’o le nonofo ai i se fale toetoe lava ina a paū ae leai foi se suavai ae sili ai o le le lava o le fa’asoa i le itu tau seleni.
Ae le na o le pau ai lea, sa faaalia foi e lea tama e oo mai lava i le taimi lenei o loo latou faaaogaina lava fale le ta’ua mai aso ia anamua ma e ono aafia ai lo latou soifua maloloina.
Sa ia ta’ua foi e tele lava faamai e ono maua gofie ai si ana fanau ona o le siosiomaga o loo latou iai ma tele ai foi namu e feaveaia nei faamai.
I lana saunoaga i le vaega o le Fofoga o Samoa sa ta’ua ai e lea tama e toaono si ana fanau.
“Ua manaomia lava se fesoasoani mo au ma si ou aiga,” o lana saunoaga lea.
“O le tulaga lava lea o loo iai matou i lenei vaitaimi ma ua leva tele ona matou nonofo faapenei.
“e matou te faaaogaina lava nei pepa iila e tali ai le timu mai le pisi mai i totonu o le fale.
“Matou te taumafai foi ina ia matou ofi uma i totonu o le matou fale lenei faatasi ai ma matou meatotino e ala I atopau faapea le tele o matou lavalava.
“o le tele o taimi e tate momoo ai maimau e pe ana mafai ona ota tali atu i nei mau faafitauli.
“O le popolega tele lava lea ia te au o le pepesi lea o faamai ona o le namu tele o lenei nofoaga ona o le fale e taalaelae.
“E pei ona e tagai atu i le tulaga o loo iai le fale nei o le tulaga lava lena o loo iai le aiga i le taimi nei.
“E ese le faigata o le olaga ma o mea uma lava e manaomia e faaleleia e tatau lava ona ia le tupe e faatino ai.”
Sa taua foi e Faatonu o le itu tau i le suavai o loo latou faalagolago I o latou aiga ina ia maua ai se vai e latou te faaaogaina i aso uma.
“E manaomia lava se tane vai mo si ou aiga nei,” o lana tala lea,.
“E matou te o lava e faanoi mai le paipa a nisi o aiga ina ia faatutumu ai talone vai e matou te faaaogaina I aso uma.
“O le suavai lava e manaomia iinei aua a leai se suavai e le mafai ona fai ni galuega aemaise lava i le gaseseina o meataumafa faapea ai vai e inu.”
Sa ia ta’ua foi e nao lona toalua lava e faigaluega ma o lana galuega o le tausitama ae e le gafatia foi e lona totogi ona fai mea uma o le aiga.
“o le totogi uma lava o le tina o le aiga e lau i aoga a le fanau.
“e toafa le maua fanau ma o loo aooga uma lava ae o au ou te galue i le faatoaga ma e pau foi lea o le matou alagatupe maua.
“sa ia taua foi le taugata o le soifuaga ua iai nei ma o le isi lenei itu ua le mafai ai e tagata ona soifua ona o le tau o le soifuaga.”