Manatu O Le Fa’atonu - O se faamalō i le kapeteni o Falemiga Selesele

By Mata'afa Keni Lesa 18 May 2016, 12:00AM

Se’i o tatou ifo atu i le kapeteni o Falemiga Selesele! O lena ua e faatinoina.

O tagata o lenei atunuu-ma tagata Samoa i le lalolagi atoa-e le gata ina tatau ona latou tuuina atu ia te oe se faafetai mai le loto; ae tatau foi ona latou tuuina atu se faatoesega.

O lena tulaga e aofia ai le Palemia o Tuilaepa Sailele Malielegaoi, le Taitaifono o le Iuni Lakapi a Samoa, o ia lea ua lauiloa mo nisi o faaupuga aupito matuitui na ia faia e uiga ia te oe i le tele o tausaga.Ina ia faia le amiotonu i le Palemia, e le na o ia e aafia ai.

O le toatele o i matou-ioe e aofia ai ma lenei tagata tusitusi-na latou aveese oe mai lea taimi i lea taimi-e mafua ona o nisi o taaloga e le lelei a le ‘au i le tele o tausaga. E o’o lava i le taimi na tofia ai oe e avea ma kapeteni, e toatele tagata sa le talitonu ia te oe.

E anoano tagata na fesiligia lea faaiuga, o le latou faitioga sa faavae i luga o mea na o latou vaaia. Ma  a’o faaauau pea ona faaletonu le ‘au i le faagasologa o aso amata o Damian McGrath, o le mea moni o ia taunuuga sa le maua ai se fesoasoani mo lou faamoemoe..

Ae peitai-e mafai ona maua le tulaga faaaloalogia, e tusa ai ma lou matou talitonuga. I le Asō, matou te fia faailoa atu ua e maua lo matou faaaloalo. Ma ona o lea itu-matou te faapea atgu ai faafetai tele.

Faafetai tele mo lou tutumau i lau matafaioi ina maua e Samoa le mitamita e ui lava i le tele o tulaga faigata. Faafetai tele ona o lou tumau pea i le avea ma toa e loto maulalo e pei ona e faaalia.

E ese ai ma isi tagata, e te le’i tali mai i soo se faiga e le talafeagai ai i ia faitioga, le faalumaluma mai tagata uma e aofia ai ma le Palemia, ma a o’o ai ina avea oe ma taunuuga o mea malie e uiga i le le mafai e le ‘au ona faatino le latou taalo- e o’o lava i nisi o mea e le mafua mai sou faatamala.

Faafetai mo lou tauivi pea ae ana o nisi tagata semanu ua leva ona togi le solo ma faia’ina. E mafai ona matou iloa le faigata o le tumau pea i la mafaufau tonu i totonu o le lotolotoi o faitioga-aemaise ai lava i totonu o se atunuu lea e manatu tagata uma-e mafai ona sili atu lo latou lelei i lo oe.

Ae ui lava i mea mea uma-e te le’i solomuli ai pe faavaivai. Na e matua tu i lou tulaga, na e fai le mea e tatau ona e faia ma ua matou vaai i ai i le tele o tausaga i le faiga na tulai mai ai lau taaloga mai le malosi i le malosi.

Ona o lenei mafuaga, ua avea oe ma malosi e una’ia ai. O oe o se faata’ita’iga lelei o lana taumafaiga ia faamanuiaina lea e tatau ona mulimuli ai ma faata’ita’i i ai.

I totonu o lenei atunuu i aso nei, o loo saili e tupulaga talavou ni toa. Latou te manaomia ni tagata lelei e faata’ita’i i ai. O lenei tusitusiga o le manatu e faapea matou te le tau vaai mamao.  

O Selesele o se tasi lea o i latou. O le mafuaga e faigofie lava. Tuu mai la a’u se’i faamalamalama atu. E le’i soifua mai o ia o se tagata iloga. E le’i avea o ia ma fetu anapo. O ia o le oloa o se mana’o e matua loloto ma le loto atoa e faafeagai ma mea faigata ma tulai mai ma le manumalo.

Ua tatou vaaia le tulaga e sili ona lelei ia Selesele-o lona loto maulalo lea. O ia o se ta’ita’i e le leoleoā na te le poina se laumata pe a fita le finauga. O le toa moni lena i la matou vaai. O ia lea ua avea ma siamupini moni.

I Pale i le faaiuga o le vaiaso talu ai-ua sili atu ona talafeagai mo le Lakapi a le Lalolagi ona faaaloalogia Selesele e avea ma Tama Taalo o le Tauvaga.  Na ia faaalia le agaga o lana ‘au i le faagasologa atoa o le tauvaga.

Sa lototele ma faatoatoa o ia, sa matua galue punoua’i, ma ta’ita’i mai luma ma sa tumau pea lona loto tele i lalo o le tauiviga faigata. I le taaloga mulimuli ma Fiti, sa tulaga ese lava o ia; o ia lava o se sau’ai ma pagā le talafeagai ai mo ia ona sikoa i le sikoa na manumalo ai.

A’o lumana’i ai le taaloga e saili ai le siamupini, na ia faia se pu’e lea na taofia ai Argentina mai le gaoi o se manumalo mulimuli, ma faapea ona teena ai Samoa mai se taaloga o le Ipu. O le itu taua e ao ina manatua e faapea o le taalo a Selesele talu ai nei e le’i faafuase’i ona tupu mai.

E le’i tulai mai ina ua mavae se po. O le taunuuga lena o tausaga e tele o le matua galue mamafa, tuuina atu atoatoa o ia ma le agaga moni ina ia faamanuiaina. E moni o le manumalo i le Ta’ito’afitu i Pale e le o le mutaaga lea o faaaloaloga a le Lakapi Ta’ito’afitu.

O loo totoe pea le anoano o galuega a Selesele ma ana tama e tatau ona fai, e amata i le faaiuga o lenei vaiaso i se vaega o le Taito’afitu i Lonetona lea ua leva ona aofia ai Aferika i Saute, le Iunaite Setete o Amerika ma Kanata.

Ae tatou te le’i see ese mai le uiga ese o le manumalo o le Ta’ito’afitu a Samoa i Pale, se’i o tatou tuu atu le faafetai i le mea e tatau ai. E ui lava ina toatele isi toa i le faagasologa o le tauvaga, ae matou te talitonu- e tulaga ese ai lava Selesele. 

Matou te toe fia faafetai atu. Ma e faamalūlū atu ona o lo matou masalomia pea o oe. 

I le taimi nei-alu i ai ma faaauau pea ona faa-agiagia le tagavai a Samoa. Malo fai o le faiva, ia te oe le alii lelei!

By Mata'afa Keni Lesa 18 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>