Afio mai o le Tupu

Tusia Fa’aliliu e Maiava ,

276 Hits

Toe mafaufau tasi lava…I nai tausaga ua mavae, na alu ai se asiasiga pu’upu’u a le Tupu Tama’ita’i o Egelani i le Iunaite Setete o Amerika. E 4,000 pauna le mamafa o ana ‘ato-lavalava na tapena.

E ta’ilua ‘ofu-lelei e fuafua mo so’o se sauniga fa’apitoa. E 40 paina-toto na ‘ave, ne’i mo’omia fa’afuase’i sona ta’otoga. Na ‘ave lana tama’ita’i teu-ulu fa’apitoa, e to’alua ‘aveta’avale ma le anoanoa o tagata e faia fe’au ma isi galuega.

O le asiasiga pu’upu’u lea a le Tupu Tama’ita’i i Amerika, e 20 miliona tala Amerika le tupe na fa’aalu ai!

Fa’atusa la le asiasiga lea i le asiasiga a Le Tupu Moni, Le Atua, i le lalolagi nei. Na afio mai Iesu Keriso i le lalolagi, i se tama’i-fale o manu.. Na moe le pepe-fou ma fafaga ai i le fale o manu.

Moni o le kalena a le lalolagi, o lo’o ua fua nei i le fanau mai o le Tupu lea, ae atonu e aupito to’atele atu manu sa fa’afeiloa’ia le afio mai o Iesu nai lo tagata. O Maria – le tina o Iesu – o se teine sa fa’atoa 14 – 15 tausaga lona matua, e le’i fa’aipoipoina fo’i ina ua ma’itaga ia Iesu.

Ioe, o se la’asaga e ono-fa’alumaluma. A o le mea moni, ana tupu se mea fa’apea i se teine pei o Maria i aso nei, e tele lava le avanoa e ono fai iai se togafiti, pe fa’apau fo’i! Aua o se nu’u e matitiva lava ma le-aloa’ia le nu’u o Iesu.  

Ae na filifilia lava e Le Atua e afio mai fa’apea, e fa’ailoa mai ia tatou, e ui ina le-amana’ia ma leaga fo’i mea e tutupu ia tatou i le ola nei, ae a ‘auai Iesu ma tatou i aso ta’itasi, e mautinoa lava le maua o se olaga fiafia ma manuia mo ‘Oe ma a’u.

Afai la o manatu sa leaga ma le-lelei le amataga o lou olaga, e silafia lelei e Iesu ou lagona o iai. Sa tiga ma sauaina ma ‘amusia fa’asoloatoa i lona olaga. Na i’u lava ina fasiotia ma tauemua o ia o le tagata agasala, ona o mea na te le’i faia. Ae le’i taofia ai e le maliu ma le oti. Na toe tu mai aso e tolu ma toe afio mai lava e fa’amaonia, o Ia o le Alo o Le Atua Soifua, le Fa’aola mo tagata uma. 

I lenei kerisimasi, o mana’o Iesu Keriso ia e talia lona filemu ma lona malosi atoatoa, ina ia e manuia ai i le foia o mea-leaga ma mea le-sa’o e tutupu ma faia ia ‘Oe. Aisea e le tatalo ai nei ia Iesu e fa’amagalo

‘Oe ona o lou ola pea i ou ala tuai, ae amata mai e Ia ona e ola i Ona ala tonu mo aso o totoe o lou soifua? Toe mafaufau tasi lava…            

© Samoa Observer 2016

Developed by Samoa Observer in Apia