Soo se fa’aiuga e te faia e iai lava ona aiaiga

Tusia Nefertiti Matatia ,

33 Hits

Laina Ete

Laina Ete

Soo se fa’aiuga lava e te faia e iai lava ona aiaiga ma ona o’oo’oga.

Lea na fa’aalia ai e Laina Ete mai le afioaga o Nu’u lona vaivai’ga na fa’apena ona motusia ai lona mafutaga ma lona aiga, ona o le Ava Malosi.

“Na tuua a’u e si o’u to’alua ma la’u fanau e to’afa ona ua le mafai lava ona ou tete’e atu I le ava malosi.”

Na ia saunoa ai I le Fofoga o Samoa I le aso ananafi o lana vaivaiga o le ava malosi ua le mafai ai ona ia toe aumaia lona aiga.

Na saunoa le Tama ia Laina o Tama o I latou nei ua tofia e taitaia aiga ma nu’u, ae talu ai lona le fa’amaoni I ona tofiga ua mafua ai ona ia nofo to’atasi I lenei taimi.

“Fa’atoa ou iloa nei lava lava le faigata o lenei mea ina ua tuua a’u e lo’u aiga.

“O tatou nei o Tama e taumafai lava ia fautuaina le fanau aemasie le ave lea iai o fa’ata’ita’iga lelei mo le fanau.”

Na saunoa foi le Tama ia Laina Ete ua lagona lava lona fa’anoanoa I lenei vaitau ona ua le toe mafuta I lana fanau aemaise ua ia le toe vaaia I latou, aua o ana meaalofa ia ae ua mamulu.

Na ia saunoa foi o aiga e fa’avavau ma o aiga foi e maua ai le tatou sulufaiga I taimi faigata o lenei olaga,ae paga lea o ia ua leai sana aiga.

O le fautuaga lava a le Tama ia Laina I Tama o Samoa ina ia aua nei avea mea o lenei lalolagi e fai ma mea e fiafia ai ma galo ai o tatou aiga.

“O le mea lea e iai nei na’o le momo’o lava o le loto e pei o isi Tama o lo’o fa’apena ona foi atu I o latou aiga ae o le mea lea ua iai ua leai lava seisi e alu atu I le fale o lo’o nofo mai iai.

“Ia taofi nei loa lena olaga manu o iai le taimi, saunoaga lea a Laina Ete.”

© Samoa Observer 2016

Developed by Samoa Observer in Apia